Wanem nao tingting blo iu?

• Waswe, eni danger stap sapos mi readim horoscope, iusim olketa samting wea join witim demon, or go lukim pipol wea sei olketa savve wanem bae happen lo future?

• Waswe, olketa story abaotem spiritism hem just olketa story wea piksarem olketa gudfala pipol faetem olketa nogud pipol, or hem wanfala really samting wea savve spoelem mi?

Disfala article bae explainim reason why pipol savve interest lo spiritism and why iu mas careful.

•  Why nao pipol interest lo diswan?

•  Why nao iu shud careful?

•  Wanem iu savve duim

•  Wanem olketa nara young wan talem

Pipol wea raetem olketa buk or mekem olketa movie, TV show, or video game luksavve olketa bae kasem staka selen sapos olketa mekhae lo spiritism. And bikos lo datwan, plande young wan laek for savve lo astrology (biliv wea sei olketa star, moon, and olketa planet savve affectim laef blo pipol), olketa demon, vampire, and magic man. Why nao olsem? Samfala reason hem olsem:

• Pipol interest for savve: Pipol laek savve sapos olketa spirit really stap

• Wari: Pipol laek savve wanem bae happen lo future

• Laek story: Pipol trae for story witim fren or relative wea dae finis

Maet olketa reason hia here stret nomoa. Olsem example, iumi evriwan laek savve wanem bae happen lo future or iumi misstim tumas olketa fren and relative wea dae finis. Bat samfala danger stap wea iu shud luksavve lo hem.

Bible tok strong againstim eni samting wea join witim spiritism. Wanfala example hem olsem:

“Yufala mas no letem eniwan mekem sakrifaes fo save abaotem wanem bae hemi kamap bihaen [“lo future,” NW]. Yufala mas no letem eniwan fo mekem enikaen majik o poesen. Yufala mas no letem eniwan wakem grinlif. An yufala mas no letem eniwan fo kolem olketa devoldevol, o toktok long spirit blong man hu hemi dae. Eniwan hu hemi mekem olketa kaen wei ya, hemi barava nogud tumas long ae blong [Jehovah].”​—Diutronomi 18:10-​12.

Why nao Bible tok strong againstim spiritism?

• Sapos iumi story witim olketa demon or duim eni samting wea join witim olketa, hem showimaot iumi sapotim olketa. Bible explainim hao samfala angel againstim God and datwan mekem olketa kamap enemy blo hem. (Jenesis 6:2; Jude 6) Olketa wicked angel hia wea Bible kolem olketa demon, olketa iusim olketa magic man, pipol wea followim astrology, and olketa wea sei olketa savve talemaot future for giamanim pipol. Sapos iumi duim kaen samting olsem, iumi kamap enemy blo God.

• Spiritism hem mekhae lo false teaching hao samfala man and woman savve wanem bae happen lo future. Bat God nomoa savve duim datwan. Bible sei: “Longtaem bifoa yet, mi talemaot finis olketa samting wea hemi hapen. Longtaem bifoa, mi talemaot finis olketa samting wea bae hemi hapen bihaen.”​—Aesaea 46:10; James 4:13, 14.

• Spiritism hem mekhae lo false teaching hao olketa wea dae finis savve story witim iumi. Bat Bible sei: “Olketa hu i dae finis, olketa nating save long enisamting . . . Taem yumi go long ples blong man dae [“Grev,” NW], bae yumi no waka, o tingting, o garem save, o garem waes.”​—Eklesiastes 9:​5, 10.

Dastawe Olketa Jehovah’s Witness no duim eni samting wea join witim spiritism. And olketa stap klia lo eni samting wea showim or storyim olketa zombie, vampire, and olketa samting wea garem olketa spesol paoa. Wanfala young woman, Maria, hem sei: “Sapos movie hem garem eni samting wea join witim spiritism lo hem, then mi shud no lukim datwan.” *

• Disaed strong for “garem gudfala konsens” front lo Jehovah lo wei for stap klia lo eni samting wea join witim spiritism.​—Acts 24:16.

• Torowem eni samting wea iu garem wea join witim spiritism. Readim Acts 19:19, 20, and tingim gudfala example blo olketa Christian lo first century.

Tingim diswan: Taem iu stap klia lo olketa samting wea join witim spiritism, iu showimaot iu sapotim Jehovah. And datwan mekem hem hapi!​—Provebs 27:11.