Iu savve comparem konsens blo iu lo wanem samting?

•   compass

•   mirror

•   fren

•   judge

 Stretfala ansa hem fofala evriwan. Disfala article bae explainim why nao olsem.

•  Wanem nao konsens?

•  Why nao iu shud trainim konsens blo iu?

•  Hao nao iu savve trainim konsens?

•  Wanem olketa nara young wan talem

 Konsens hem mekem iu luksavve lo wanem hem stret and wanem hem no stret. Bible sei hem “olsem law wea stap finis insaed lo heart blo man.” (Rome 2:15, Contemporary English Version) Gudfala konsens bae helpem iu for luksavve sapos samting wea iu laek duim or wea duim finis hem stret or nomoa.

•   Konsens blo iu hem olsem compass. Hem leadim iu lo stretfala road mekem iu no kasem nogud samting.

•   Konsens blo iu hem olsem mirror. Hem showimaot tingting blo iu, mekem iu luksavve wanem kaen man nao iu.

•   Konsens blo iu hem olsem gudfala fren. Hem savve givim gudfala advaes lo iu and helpem iu for kasem olketa gud samting sapos iu lisin lo hem.

•   Konsens blo iu hem olsem wanfala judge. Hem judgem iu taem iu duim samting wea no stret.

 Main point: Konsens hem important samting wea savve helpem iu for (1) mekem olketa wise disison and (2)  showimaot iu sorre lo olketa mistek blo iu and trae for stretem olketa mistek hia.

 Bible talem iumi for “gohed for garem gudfala konsens.” (1 Peter 3:16) Datwan hem hard sapos iu no bin trainim konsens blo iu.

 “Mi savve laea lo parents blo mi abaotem wea nao mi go and haedem lo tufala. Firstaem, konsens blo mi pokem mi, bat gogo mi no tingse mi duim rong samting.”—Jennifer.

 Gogo konsens blo Jennifer pokem hem for talem parents blo hem wanem hem duim and for no gohed laea lo tufala.

 Tingim diswan: Konsens blo Jennifer shud pokem hem for changem wei blo hem start lo wanem taem?

 “Hem no isi for haedem nogud samting wea iu duim and hem mekem iu stress tumas. Taem konsens blo iu letem iu mekem wanfala nogud disison, hem isi nao for mekem nara nogud disison.”—Matthew.

 Samfala pipol nating lisin lo konsens blo olketa. Bible sei “olketa no savve long wanem hem stret and wanem hem no stret.” (Ephesus 4:19) Good News Translation sei: “Olketa nating feel shame nomoa.”

 Tingim diswan: Waswe, pipol wea no feel guilty lo olketa nogud samting wea olketa duim really garem gudfala laef? Olketa wanem kaen problem nao bae olketa kasem?

 Main point: For garem gudfala konsens, iu need for iusim evritaem tingting blo iu “mekem [iu] fit for luksavve long wanem hem stret and wanem hem no stret.”—Hebrew 5:14.

 For trainim konsens blo iu, iu mas putim samfala rul wea iu laek followim and then comparem wanem iu duim witim datwan. Samfala pipol followim olketa rul blo:

•   famili and culture

•   olketa fren

•   olketa famous pipol

 Bat wei for followim standard lo Bible nao hem winim evriwan hia. Iumi no sapraes lo datwan bikos Bible hem “kam from God.” God nao creatim iumi and savve lo best samting for iumi.—2 Timothy 3:16.

 Tingim samfala example.

 STANDARD LO BIBLE: “Mifala laek for honest long evri samting wea mifala duim.”—Hebrew 13:18.

•   Hao nao datfala standard savve affectim konsens blo iu taem iu kasem temptation for cheat lo exam, laea lo parents blo iu, or for steal?

•   Sapos konsens blo iu mekem iu for honest lo evri samting, hao nao datwan savve helpem iu distaem and lo future?

 STANDARD LO BIBLE: “Ranawe from eni samting wea switim iufala for durong.”—1 Corinth 6:18.

•    Hao nao datfala standard savve affectim konsens blo iu taem iu kasem temptation for lukluk lo pornography or for duim sex bifor iu marit?

•   Sapos konsens blo iu mekem iu ranawe from eni samting wea switim iu for durong, hao nao datwan savve helpem iu distaem and lo future?

 STANDARD LO BIBLE: “Iufala mas kaen long narawan and sorre long hem. Iufala mas willing for forgivim narawan.”—Ephesus 4:32.

•    Hao nao datfala standard savve affectim iu taem iu no agree witim samwan lo famili or witim fren blo iu?

•   Sapos konsens blo iu mekem iu for forgivim hem and sorre lo hem, hao nao datwan savve helpem iu distaem and lo future?

 STANDARD LO BIBLE: “Jehovah heitim eniwan wea laekem raf wei.”—Psalm 11:5, NW.

•    Hao nao datfala standard savve affectim iu taem iu disaedem wanem movie and TV program for lukim and wanem video game for pleim?

•   Sapos konsens blo iu mekem iu for nating laek lukim or pleim eni samting wea raf, hao nao datwan savve helpem iu distaem and lo future?

 TRU STORY: “Mi garem olketa fren wea pleim olketa raf video game, and mi tu pleim. Then dadi blo mi stopem mi for pleim olketa game hia. So mi gohed pleim olketa game hia taem mi visitim olketa fren blo mi. Taem mi kam bak lo haos, mi no storyim wanem mi duim bat stap kwaet nomoa. Dadi askem mi wanem nao rong, bae mi savve sei mi olraet nomoa. Bat wanday mi readim Psalm 11:5 and start for feel nogud lo wanem mi duim. Mi luksavve mi mas stop for pleim olketa video game hia, and hem nao wanem mi duim. Wanfala fren blo mi lukim wanem mi duim and hem tu stop for pleim olketa raf video game.”—Jeremy.

 Tingim diswan: Wanem taem nao konsens blo Jeremy hem start waka, and wanem taem nao hem start lisin lo konsens blo hem? Wanem nao iu lanem from story blo Jeremy?

 Main point: Konsens blo iu showimaot wanem kaen man nao iu and wanem hem important lo iu. Wanem nao konsens blo iu showimaot abaotem iu?