Wanfala survey hem sei 80 percent lo olketa young pipol lo America savve prea, bat 40 percent lo olketa nomoa prea evritaem. Samfala lo olketa mas laek savve: ‘Hao, prea hem samting for mekem man feel gud nomoa, or hem samting wea barava important?’

•  Prea hem for wat ia?

•  Hao, God lisin lo olketa prea?

•  Wat nao mi savve prea abaotem?

•  Wanem olketa nara young wan talem

 Prea hem taem man story witim Creator wea wakem evri samting. Datwan hem spesol tumas! Nomata Jehovah hem barava hae winim iumi olketa man, “hem no hard nomoa for savve long hem.” (Acts 17:27) Bible garem disfala spesol invitation: “Fren gud witim God and bae hem fren gud witim iufala.”​—James 4:8.

 Wat nao iu savve duim for fren witim God?

•   First samting, hem nao for prea, bikos hem nao hao iu story witim God.

•   Mek tu samting, hem for studyim Bible, bikos hem nao hao God story kam lo iu.

 Taem iu prea and story lo God, then Hem story kam lo iu taem iu studyim Bible, datwan bae helpem iu for fren gud witim hem.

 “For iumi story witim Jehovah, wea hem Barava Haefala God, datwan hem spesol samting wea iumi olketa man savve duim.”​—Jeremy.

 “Taem mi prea lo Jehovah and storyim feeling blo mi lo hem datwan mekem mi fren gud witim hem.”​—Miranda.

 Nomata sapos iu biliv lo God and iu prea lo hem, maet hem hard for iu bilivim Hem lisin lo iu taem iu prea. Nomata olsem, Bible sei Jehovah hem God wea savve “ansarem olketa prea.” (Sams 65:2) Bible sei tu for iu “putim evri wari bilong [iu] long hand bilong hem.” Why nao olsem? “Bikos hem tingim [iu].”​—1 Peter 5:7.

 Samting for tingim: Hao, iu story witim olketa fren blo iu evritaem? Iu savve story olsem lo God tu. Prea lo hem evritaem and iusim nem blo hem, Jehovah. (Sams 86:​5-7; 88:9) Tru nao, Bible sei for iu “prea evritaem.”​—1 Thessalonica 5:​17.

 “Prea hem story blo mi witim Dadi blo mi lo heven. Taem mi prea mi talem evri samting mi tingim and feeling blo mi.”​—Moises.

 “Taem mi story lo Jehovah mi talem evri samting, olsem hao mi story lo mami or lo wanfala gud fren blo mi.”​—Karen.

 Bible sei: “Long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu.”​—Philippi 4:6.

 Hao, datwan minim hem oraet for prea abaotem olketa problem blo iu? Yes! Bible sei: “Yufala mas givim go olketa wari blong yufala long [Jehovah], an bae hemi gadem yufala.”​—Sams 55:22.

 Hem tru, taem iu prea lo God iu shud no storyim nomoa olketa problem blo iu. Wanfala gele wea nem blo hem Chantelle sei: “Mi nating fren gud witim Jehovah sapos evritaem mi askem hem nomoa for helpem mi. Lo tingting blo mi, first samting hem for thankiu lo Jehovah and mi shud garem long list blo olketa samting for sei thankiu for hem.”

 Samting for tingim: Wat nao samfala samting wea iu laek for talem thankiu lo God for hem? Hao, iu savve tingim thrifala samting wea iu laek talem thankiu for hem lo Jehovah tuday?

 “Iumi savve talem thankiu lo Jehovah nomata for wanfala smol samting, olsem wanfala naes flaoa wea iumi lukim.”​—Anita.

 “Meditate abaotem eni samting lo creation or eni verse lo Bible wea iu tinghae tumas lo hem, then talem thankiu lo Jehovah.”​—Brian.