LECCIÓN 21
Kexrein tedikao ni nchexree Dio juajna jian
Utuin Jehová kunixin Nchixiʼin tasinthjian kainxin chijni ke jii ngataʼa Nunthe. ¡Ndaʼa ke asta rinaunkaná sikekiná jiʼi ngai ni icha! Jesús juinao ke ni baruee ruikauna juajna jiʼi nguixin ngataʼa Nunthe (Mateo 28:19, 20). Keʼe tencheʼe ni testigo de Jehová para ke tedithikauna thi kuetuʼan Jesús.
1. Kexrein jixethja thi ndachro Mateo 24:14
Jesús bajin: “Juajna jian de Nchixiʼin Dio siji ngai kainxin chujni de nguixin ngataʼa Nunthe” (Mateo 24:14). Jaʼana xro testigo de Jehová anto nchexruxinaná ntha̱ʼaná xrá anto renthe jiʼi. Thjiʼaná juajna jian nguixin ngataʼa Nunthe ngai icha de 1.000 tha. Ko asta nuinka ntha̱ʼaná para ke xrá jiʼi jian sachrje xrá. Aro chruʼa rukuʼen jiʼi si Jehová rukengijnaʼaná.
2. Keʼe ntha̱ʼaná para ke chujni tsiʼina juajna jian
Thjiʼaná juajna jian thi jii chujni. Ko, jaña xraa ni cristiano de siglo saʼo, thjiná “nchia ko nchia” (Hechos 5:42). Jiʼi naa thi ntha̱ʼaná para ke kainxin nano tsje chujni thiʼina juajna jian. Aro, ixi te bee diraʼaná chujni nduʼana, thjiná thi siin tsje chujni. Ko thjeená kexrein nichjaaná chujni de Jehová ko de thi nandaʼa sincheʼe Ndo.
3. Kensen chunda ke sincheʼe xrá jiʼi
Kainxin ni denduaxin cristiano chunda ke sikauna juajna jian jiʼi. Para jaʼana jiʼi naa xrá anto renthe. Mexinxin asta nuinka ntha̱ʼaná de thjiʼaná juajna jian ixi nunana ke anto tsje chujni xra thiʼana juajna jian jiʼi (tsjeʼe 1 Timoteo 4:16). Xruʼin kensen thjengananána para ntha̱ʼaná xrá jiʼi. Biblia ndachro: “Ixi xruʼin kjuengarana, chueʼanra ruxengaʼarana” (Mateo 10:7, 8). Ko, maski jiʼa kainxin chujni thinaná, xra thjiʼaná juajna jian ixi nunana ke jaña nthasayaxiná Jehová ko ntha̱ʼaná ke chrjuin tunuʼen.
TANGI ICHA
Rutsjeʼená kainxin thi tentha̱ʼaná xro testigo de Jehová para thjiʼaná juajna jian nguixin ngataʼa Nunthe ko kexrein Jehová thengijnaná.
Thjiʼaná juajna jian nguixin ngataʼa Nunthe: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Tanuinka ntha̱ʼaná para ke kainxin chujni tsiʼina juajna jian
Xro testigo de Jehová tanuinka ntha̱ʼaná de thjiʼana juajna jian ngai kainxin chujni asta thi tena. Tsjeʼera VIDEO ko tjaura de jiʼi:
-
Keʼe thi icha denthaxruxiʼan ke ntha̱ʼaná are thjiʼaná juajna jian.
Tsjeʼera Mateo 22:39 ko Romanos 10:13-15, ko tjaura de jiʼi:
-
Kexrein tjaguná ke thjuaaná ni icha kunixin juajna jian ke thjiʼaná.
-
Kexrein dikuʼen Jehová ni dikao juajna jian (Tsjeʼera versículo 15).
5. Nthakiʼaná xrá Ndo Dio
Jii anto tsje thi tjago ke Jehová jiditauʼen nthiʼa juajna jian ke thjiʼaná. Rutsjeʼená keʼe kuʼen rajna Nueva Zelanda. Naa tsukjin, naa ni Testigo ke diʼin Paul bachrje bikao juajna jian nchia ko nchia ko bithja naa nanita. Nchaʼun mee are nduexin, nanita jiʼi bakeʼe naa thenchaun ngai Ndo Dio, ko nichjexin nombree, Jehová, ko banchieʼe ke rurua̱ʼan naa ni rukengijna rugatsuan Ndo. “Batho nii hora -ndachro Paul-, jaʼan binga puertee nanita jiʼi”.
Tsjeʼera 1 Corintios 3:9 ko tjaura de jiʼi:
-
Kexrein tjago thi kuʼen jiʼi ke Jehová jiditauʼen nthiʼa juajna jian.
Tsjeʼera Hechos 1:8 ko tjaura de jiʼi:
-
Unda ixi rugundaana ke Jehová tsengijnaná para ke tsjiuʼuná juajna jian
A benuʼan
Ngai reunión datho ngaa semana xragunana kexrein tsjiʼaná juajna jian. A chrujan bee bekji naa de reunión teʼi. Kexrein degikuʼen thi xragunana nthiʼa.
6. Are thjiʼaná juajna jian tedithikaʼuna Ndo Dio
Ngai siglo saʼo, ni bagingakuʼen ni baruee Jesús juinauna rukayakuenana para ke i rugikauʼana juajna jian. Kain ni cristiano binthe aremee nichjaxina ixi thi ndua “ngathexin kun xi nchixin” (Filipenses 1:7). Ko jai nchauana, xro testigo de Jehová xrajuʼo ntha̱ʼaná. a
Tsjeʼera Hechos 5:27-42 ko tjaura de jiʼi:
-
Unda ixi tsinthuaʼaná de tsjiʼaná juajna jian (Tsjeʼera versículo 29, 38 ko 39).
THI DANCHANGI INCHINA: “Unda ixi thji ni testigo de Jehová nchia ko nchia”.
-
Keʼe ruegatheʼe.
THI KUANGINÁ
Jesús kuetuʼen ni baruee ke ruikauna juajna jian ngai kainxin rajna. Ko Jehová jithengijna rajnee para ke nchao thencheʼena xrá jiʼi.
A xraxaun thi kuangi
-
Kekaa thi jituʼen para ke jithji juajna jian nguixin ngataʼa Nunthe.
-
Kexrein tjaguná ke thjuaaná ni icha kunixin juajna jian ke thjiʼaná.
-
A dexraxaun suixin ke xrá jiʼi nchao sincheʼe ke rucheeni. Ko unda.
THJEE ICHA
Detsjeʼe kexrein ni testigo de Jehová dikauna juajna jian ngaʼa ciudad.
Thi dinthendani exhibidor ngai thi anto siin chujni ngai rajna París (5:11)
Kexrein thengijna ni testigo de Jehová thi ni sathingaxin de rajnee ixi guerra.
Dekiʼin kexrein chrjuinxin thjiʼi naa ni thincheʼe ncheʼe xree Jehová de tiempo completo.
Detsjeʼe kexrein ni testigo de Jehová bachana inchi caso ngai tribunal para ke kuinthueʼana de bikauna juajna jian.
a Dio thi thetuʼan ke sikauni juajna jian. Mexinxin xro testigo de Jehová rugundanaʼaná juachaxin de xi nchixin te ngataʼa Nunthe para tsjiʼaná juajna jian.
