LECCIÓN 35

Kexrein tsincheʼená jian thi sunthuʼuna

SÍKUNI O TSI̱ʼINI NGAI THÁ

Kainxiná chunda ke tsincheʼená keʼe sunthuʼuna. Tsje de jiʼi chunda ke sikun ngai kexrein sunthechuna ko kexrein xrakjiuʼuná Jehová. Ínchi jiʼi, menxun chunda ke tsincheʼená thino sunthechuna, keʼe xrá sunthuʼuna ko a tsuthaana ani naʼi. Si tsincheʼená jian thi sunthuʼuna, nchao ruchaana ko sunthuʼuna ke Jehová ruchee kai.

1. Kexrein sekengijna Biblia para ke sekincheʼe ndakua thi sencheʼe

Saʼo de sekincheʼe thi sencheʼe, deganchieʼe Jehová ke sekengijna. Dekjee ngaa Biblia keʼe thi xraxaun Jehová de thi sekincheʼe (tsjeʼe Proverbios 2:3-6). Te bee seginchii keʼe ndachro Jehová ke sincheʼeni. Aremee chunda ke segithikaun thi ndachro.

Aro, mee si Biblia ndachruʼa keʼe thi chunda ke sincheʼeni. Dekaʼa juachjaun, Jehová sekjaguʼa “thi nthiʼa” chunda ke serueʼe (Isaías 48:17). Kexrein. Kunixin thi diʼin principios bíblicos. Jiʼi thi ndua ke tjago Biblia ke thengijnaná para tsinxiná keʼe thi xraxaun Jehová ko keʼe thi tunuʼen. Ko tsje bee dunthuuna jiʼi are nthuleena Biblia. Are dukuna thi Jehová xraxaun, jiʼi ncheʼe ke thincheʼená ndakua thi sunthuʼuna.

2. Kekaa chunda ke sexraxaun saʼo de sekincheʼe thi sencheʼe

Biblia ndachro ke “thi deʼe xraxaun tsjeʼe jian keʼe thi sincheʼe” (Proverbios 14:15). Jiʼi ruchro ke saʼo de tsincheʼeni thi sincheʼeni, sintheni ruxraxauni thi jian ko thi jiaʼan tsiaʼo. Are usexraxaun kain jiʼi, deganchangi: “Keʼe thi ndua ke tjago Biblia chunda ke sikun ngai thi tsinchaa. Keʼe thi tsinchaa sincheʼe ke icha chrjuin tsununa. Kekaa tsiaʼo ngai ni icha thi jaʼan tsinchaa. Ko, thi icha renthe, a thi tsinchaa sincheʼe ke ruchee Jehová” (Deuteronomio 32:29).

Juʼo Ndo Dio thi jikininxin rundathjuná keʼe thi nchao jii ko thi nchauʼa jii. Are datsuaná thi thetuʼan ko thi ndua ke tjaguaná ko rinauná sunthuʼuna, dunthechundaná naa jian conciencia. Conciencia yaa xraa naa tha ke jii ngaxiʼiná ke ndathjuná keʼe thi nchao jii ko thi nchauʼa jii (Romanos 2:14, 16). Si tachrjuin sunthukueʼena concienciaana, jiʼi sincheʼe ke tsincheʼená ndakua thi sunthuʼuna.

TANGI ICHA

Rutsjeʼená icha jian keʼe chunda ke sikun thi ndua ke tjago Biblia ko concienciaana are tsincheʼená keʼe thi sunthuʼuna.

3. Dekanchrjanda ke Biblia sekjaguʼa

Kexrein thengijnaná thi ndua ke tjaguaná Biblia are tsincheʼená naa thi sunthuʼuna. Tsjeʼera VIDEO ko tjaura de jiʼi:

VIDEO: Rurueená thi ndua ke tjago Biblia (5:54)

Keʼe mee thi libre albedrío.
Unda ixi chjaaná Jehová libre albedrío.
Keʼe chjaaná Ndo Dio para thengijnaná ndakua sunthugundana libre albedrío.

Para sukuna naa ejemplo de keʼe mee naa thi ndua ke tjago Biblia, tsjeʼera Efesios 5:15, 16. Kuthejan tjaura de kexrein icha jian “sinchegundani tiempo” para…

. . . sincheleeni Biblia kainxin nchaʼun.
. . . icha jian sincheʼe ni tekaʼo chuo, ni ndudaʼa ko chjan.
. . . tsjini ruxratheni ngai congregación.

4. Tachrjuin denchekueʼen conciencia para ke ndakua sekincheʼe thi sencheʼe

Are ngaaya Biblia ndachro keʼe thi chunda ke sunthuʼuna, icha tángiʼa tsunuana tsincheʼená jian keʼe sunthuʼuna. Aro, mee si ndachruʼa. Tsjeʼera VIDEO ko tjaura de jiʼi:

VIDEO: “Darichundara naa jian conciencia” (5:13)

Ínchi dikuni ngai video, kekaa juincheʼe thi chuana para ke juinchekueʼen concienciee ko kuincheʼe naa thi juinchexruxiʼin Jehová.

Unda ixi chundaʼa ke rundachená inaana ke tsincheʼena ixi jaʼana. Tsjeʼera Hebreos 5:14 ko tjaura de jiʼi:

Maski icha tángiʼa tsunuana sanchieʼená inaana ke tsincheʼena ixi jaʼana, unda chunda ke tsunuana nanaa de jaʼana keʼe thi icha jian.
Kekaa nchao tsengijnaná para ke tachrjuin tsjaguená concienciaana ko ndakua tsincheʼená.

Conciencia jiʼi xraa naa mapa ke thengijnaná rutsjeʼená thino tsjiná.

5. Denche respetaa concienciee ni icha

Ixi kainá jejee xraxauná, jejee thincheʼená sunthuʼuna. Kexrein nchao tsjaguná ke nthurespetaana concienciee ni icha. Rutsjeʼená yuo ejemplo.

Ejemplo 1: Naa ni chuana ke anto nchexruxiʼin dinganxin satji ngai inaa congregación ko nthi̱ʼa ni chuana ndakuaʼa dikuʼena thi dingaxini.

Tsjeʼera Romanos 15:1 ko 1 Corintios 10:23, 24, ko tjaura de jiʼi:

Kunixin thi ndachro versículo teʼi, keʼe thi icha nchao rukincheʼe ni chuana. Mee suixin, keʼe ruencheʼe si concienciee inaana ndakuaʼa dikuʼen thi rencheʼe suixin.

Ejemplo 2: Naa thi chuuná nuʼen ke Biblia ndachruʼa ke chruʼa siʼini ni inchi thi ncheku̱ani; aro jeʼe thincheʼe siʼa. Aro thji naa juaxruxin ko nthi̱ʼa dikun inchi ni chuuná ke jaan tediʼina.

Tsjeʼera Eclesiastés 7:16 ko Romanos 14:1, 10, ko tjaura de jiʼi:

Kunixin thi ndachro versículo teʼi, keʼe thi nchao rukincheʼe runcheʼe thi chuuná. Mee suixin, keʼe ruencheʼe si ruegikun ke inaana thencheʼena naa thi concienciaantha ndakuaʼa dikuʼen.

Kekaa thi sencheʼe para ke ndakua sekincheʼe thi sencheʼe

1. Danchieʼentha Jehová ke sekengijna sekincheʼe keʼe thi sencheʼentha (Santiago 1:5).

2. Dekjee keʼe icha ndachro Biblia ko xruun dantsje organización de thi sekincheʼentha. Kai nchao seganchangiʼi icha ni chuuná.

3. Dexraxaun kekaa tsiaʼo ngajintha ko ngai ni icha thi sekincheʼe.

THI XRAXAUN INCHINA: “Jaʼa nchao sincheʼe thi sinao. ¡Tanchrjanda chujni deporsi runichjana!”.

Unda chunda ke sunthurenthena thi tunuʼen Dio ko ni icha.

THI KUANGINÁ

Thincheʼená jian thi sunthuʼuna are thjeená keʼe thi xraxaun Jehová de thi sunthuʼuna ko tsjeʼená si thi sunthuʼuna tsengijna o sincheniʼi ni icha.

A xraxaun thi kuangi

Kexrein nchao sekincheʼe sencheʼe thi nchexruxiʼin Jehová.
Keʼe nchao sencheʼe para ke chrjuin senchekueʼen concienciaantha.
Kexrein nchao sekjago ke dencherespetaa concienciee ni icha.

Thentaxin kesa juaʼa lección jiʼi:

A nchao sincheʼe jiʼi

Dexraxaun ngai naa thi nandaʼa sekincheʼe sencheʼe. Kuthejan dencheʼe kain thi ndachro ngai recuadro diʼin “ Kekaa thi sencheʼe para ke ndakua sekincheʼe thi sencheʼe”.

Inaa thi nchao sincheʼe:

Your other goal