Jniana anto renthe. Ko si ruchundaʼaná jiʼi, xruʼin kensen rugechun. Ixi Dio juinthachjianá, jeʼo jeʼe jikininxin nchao rundathjuná kexrein sunthugundana jniana. Keʼe ndachro jeʼe de jni. A nchao sineni o nchao sayeeni jni. Ko keʼe nchao sekengijna para ke ndakua sekincheʼe thi sencheʼe ngai thi chunda ke sikun ngai jni.

1. Kexrein dikuʼen Jehová jni

Are saʼo, Jehová ndache ni nchexree: “Thi jichunxin naa chujni o naa uxigo yaa jni” (Levítico 17:14). Para Jehová, jni ruchro thi techuni. Ko, ixi thi techuná yaa naa juajni anto thjua ko anto renthe ke chjaaná Dio, jiʼi ruchro ke jniana kai anto renthe.

2. Kexrein ndachro Dio ke sunthugundaʼana jni

Icha saʼo de rukunchjian congregación, Jehová kuetuʼen ni nchexree ke runeʼana jni (tsjeʼe Génesis 9:4 ko Levítico 17:10). Ko are ukunchjian congregación, Jehová kjan kuetuʼan jiʼi. Ni apóstol ko ni bitauʼen nthiʼa congregación ke biʼina cuerpo gobernante, kuetuʼana jiʼi ngai ni cristiano: “Dithuaxiʼanra […] sayeʼera jni” (tsjeʼe Hechos 15:28, 29).

Keʼe ruchro jiʼi. Si xi nchexruan ruendathjuntha ke i chruʼa siʼintha xrandasua, ndaʼa ke ruenthe̱ʼa thi dichjeena inchi alcohol ko ruexranduʼa jiʼi ngai venaantha. Ko xrajuʼo tuʼen ngai thi kuetuʼan Dio de jni. Sithikauni Dio ruchro sineʼani o siʼani jni ko sineʼani nthao ke digingungiʼa jni. Kai chruʼa sineni thi digithekjan jni.

Aro mee are chunda ke tsjiná ngai xi nchexruan. Kaxi tratamiento ke dajun xi nchexruan rueʼa thi kuetuʼan Dio, ínchi thi sayeená jni o naa de thi nuo dikunchjianxin jni: glóbulo rojo, glóbulo blanco, plaqueta ko plasma. Aro te bee dinkueʼani ke chrujan tratamiento nchauʼa jii ngathe kun Dio. Ínchi are dunda naa fracción icha nchiin de jni. Ko te bee are dunda jnii ni niʼin. Kuthejan de tsjeʼeni kainxin opción ke jii, nanaa chujni chunda ke tsincheʼe keʼe sincheʼe (Gálatas 6:5). a

 TANGI ICHA

3. Dekincheʼe thi nchexruxiʼin Jehová

Kexrein nchao sekincheʼe thi sinchexruxiʼin Ndo Dio ke chunda ke sikun kunixin jni. Tsjeʼera VIDEO kuthejan tjaura unda anto renthe ke sencheʼe thi jitaxin nthiʼi nunthe:

• Deganchieʼe Ndo Dio ke sekengijna (Santiago 1:5).

• Dekjee keʼe ndachro Biblia de jiʼi ko detsjeʼe kexrein nchao sencheʼe (Proverbios 13:16).

• Detsjeʼe kekaa tratamiento nchao seginchii chiaun de thi tentha.

• Detsjeʼe kexeʼe thi de plano segayeʼa.

• Detsjeʼe ke thi sekincheʼe sincheʼe ke concienciaantha chrjuin tsunuʼen (Hechos 24:16). b

• Detjañaʼa ke -ni tatitaa, ni nanitaa, ni naa ni ditauʼen nthiʼa congregación o ni jitjaguʼa de Biblia- chruʼa rundathjunthana keʼe thi chunda ke sencheʼentha (Romanos 14:12).

• Dekentaxin thi bekincheʼe ko dejinao ke tsuʼen.

4. Xro testigo de Jehová thjeená ke jian sintha atendeaná xi nchexruan

Sithikauni thi thetuʼan Dio de jni yaa ruchruʼa ke rinauʼaná ke jian sintha atendeaná xi nchexruan. Tsjeʼera VIDEO.

Tsjeʼera Tito 3:2 ko tjaura de jiʼi:

• Unda ndakua runichjeená xi nchexruan ko suthikauna thi rundachro xa.

 5. Thi diʼin fracción de jni

Jii nuo thi dikunchjianxin jni: glóbulo rojo, glóbulo blanco, plaqueta ko plasma. Ko de jiʼi dachrjeninxin inchi thi icha nchinchin ke diʼin fracción sanguínea.  c Inchi de fracción teʼi dunda ngai xruan para nchexrueʼena chi̱n o kai para thengathjena hemorragia.

Are chunda ke sikun ngai fracción de jni, nanaaná chunda ke tsincheʼená keʼe chunda ke sunthuʼuna aro ke jiʼi chrjuin sinchekunuʼen concienciaana ke unuʼen thi ndachro Biblia. Menxun inchina tsinche’ena sayeʼana naa tratamiento o procedimiento ke chunda ke sikun ngai fracción de jni. Ko tena jaan tsincheʼena jiʼi.

Are sekincheʼe thi sencheʼe, deganchangi:

• Kexrein runthakianxin xi nchexruána unda sayaʼa o jaan sayaa inchi fracción de jni.

 THI KUANGINÁ

Jehová rinauʼan ke ndakuaʼa sundaana jni.

A xraxaun thi kuangi

• Unda para Jehová jni yaa naa thi anto renthe.

• Kexrein nuanxina ke thi kuetuʼan Ndo Dio yaa kai ruchro ke sayeʼaná jni.

• Keʼe sekengijna para ke ndakua sekincheʼe keʼe tratamiento segayeʼe are chunda ke sikun ngai jni.