LECCIÓN 47

A unchao segithe

SÍKUNI O TSI̱ʼINI NGAI THÁ

A unchao segithe

Ixi thi ubekangi ngaya Biblia, suixin utsje denuʼan de Jehová. Kai, menxun utsje begasengixin para sencheʼe thi retangi. Aro menxun jii naa thi jikayakuʼantha ko tanchrjandaʼantha sexrajuntha sencheʼe xree Jehová ko sigithentha. Ngai lección jiʼi rutsjeʼená keʼe bakayakuen inchina aro nchao bathujina para bigithena ko kai rutsjeʼená keʼe nchao sencheʼe suixin para segathujin thi jikayakuʼantha.

1. Kexrein tsjexin chunda ke sekunuʼan de Biblia para ke unchao segithe

Para ke naa chujni sigithe, chunda ke “tsunuʼena keʼe thi ndua” (1 Timoteo 2:4). Aro jiʼi ruchruʼa ke saʼo de segithe chunda ke sekunuʼan kexrein segatheʼe kain thi xranchangi ke senthaʼana de ngaa Biblia. Asta thi ni uanto see bigithe kai rugundeʼena tsinthueʼana de tsangina (Colosenses 1:9, 10). Aro jii naa thi jaan chunda ke sekinxin jian: thi tjago Biblia ke icha tángiʼa. Ni tetauʼen nthiʼa congregación nchao tsengijnanthana para segikuntha a jaan dekinxintha jian jiʼi.

2. Keʼe chunda ke sencheʼe saʼo de segithe

Biblia ndachro: “Duanra arrepentido ko kjanra” (tsjeʼe Hechos 3:19). Ko jiʼi naa thi chunda ke sencheʼe suixin saʼo de segithe. Aro, keʼe ruchro. Ruchro ke suixin chunda ke senthaniʼan ixi kexeʼo thi jiaʼan ke bencheʼe ko ke seganchieʼe Jehová ke senthatjañaʼan. Kai jiʼi ruchro ke i sejinauʼan sencheʼe thi jiaʼan jii ko ke ubekincheʼe segarichun ínchi danchia Ndo Dio. Kai, ruchro ke suixin usencheʼe xrá ngai congregación, senchetjangiʼa nchaʼun xrathená ko ke usekjiuʼo juajna jian maski xra digitheʼantha.

3. Unda nchauʼa jii ke juaxraun sekayakuʼantha sigithentha

Inchina xrauna ixi xraxauna ke chruʼa sinchexethjana thi ndachruna ngai Jehová. Ko jaan, te bee suixin setjajin, jaña ínchi kuʼen tsje ni xii ko ni nchrii ke dajin ngaya Biblia. Aro detjañaʼan ke Jehová chueʼan ke ni nchexree ninchi rutjajiʼana (tsjeʼe Salmo 103:13, 14). Jeʼe anto ruchee si suixin asta nuinka sencheʼe. Ko kai, Jehová tsinthueʼa de tsengijnantha. Ko asta ndachro ke xruʼin keʼe nchao “santsjendaná de thi thjuaaná Dio” (tsjeʼe Romanos 8:38, 39).

TANGI ICHA

Rutsjeʼená kexrein are icha jian segatsuan Jehová ko segithuaxin ke jeʼe tsengijnantha, kunixin jiʼi nchao segathujin kexeʼo thi jikayakuʼantha para segithentha.

4. Degatsuan Jehová icha jian

Kexrein tsjexin chunda ke sekunuʼan de Jehová saʼo de segithe. Suixin chunda ke segatsuan jian Jehová asta ke jiʼi sincheʼe ke suixin sethjueʼe Ndo ko segithuaxin segithikaun thi thetuʼan Ndo. Tsjeʼera VIDEO para sikunra kexrein juincheʼe jiʼi ni tetangi de Biblia nguixin ngataʼa Nunthe. Kuthejan tjaura de jiʼi:

VIDEO: Thi tsengijnaná para sigithená (3:56)

Ínchi bukuna ngai video, keʼe kuengijna inchina para ke nchao bigithena.

Tsjeʼera Romanos 12:2 ko tjaura de jiʼi:

A tángi dekunuʼan degithikaun chrujan thi tjago Biblia. A dexraxaun ke ni testigo de Jehová jaan tjaguna thi ndua.
Si tángi dekunuʼan degithikaun, keʼe nchao sencheʼe.

5. Degathujin kexeʼo thi sekayakuʼan

Kainxiná dutana thi tángi are thincheʼená xrajuná sunthuʼuna xree Jehová ko sigithená. Para sekunuʼan thi kuʼen naa ni chuana, tsjeʼera VIDEO. Kuthejan tjaura de jiʼi:

VIDEO: Are thjueʼená Jehová nchao dathujiná kexeʼo thi tángi (5:22)

Kekaa thi tángi chunda ke bathujin Narangerel para juinchesayeʼe Jehová.
Ixi jeʼe bathjueʼe Jehová, kexrein kuengijna jiʼi para bathujin kain thi tángi.

Tsjeʼera Proverbios 29:25 ko 2 Timoteo 1:7, ko tjaura de jiʼi:

Kensen nchao tsengijnaná para ke ruxrauʼaná are sathujiná thi tángi.

6. Dechunthia ke Jehová tsengijnantha

Jehová tsengijnantha sencheʼe thi jeʼe danchia. Tsjeʼera VIDEO ko tjaura de jiʼi:

VIDEO: Jehová tsengijna (2:50)

Unda ixi baxraun thi xii de video para rugithe.
Keʼe kuengijna icha chunthia ngai Jehová.

Tsjeʼera Isaías 41:10, 13 ko tjaura de jiʼi:

Unda nchao sechunthia ke jaan senchexetja thi sendache Ndo Dio are sexrajun sencheʼe xree Ndo.

7. Dekjago ke dencherenthe ke Jehová anto dethjuaʼa

Are icha sexraxaun kexrein dethjuaxin Jehová, icha tseuxruxiʼintha ko icha sejinao senchesayeʼe kainxin nchaʼun. Tsjeʼera Salmo 40:5 ko tjaura de jiʼi:

Keʼe juajni chjaaná Jehová icha dencherenthe.

Jeremías anto bathjueʼe Jehová ko juajna ke bayee, ko anto bancherenthe juajni de bakjago kexrein diʼin Dio. Jeʼe ndachro: “Thi ndáchro takjan ngai thi ncheʼe ke chee ansena, ixi jaʼan tjago kexrein diʼin jaʼa, oh, Jehová” (Jeremías 15:16). Anche degatheʼe thi xranchangi teʼi: