Dio jeʼe Thi Juinchechjian Kainxin thi jii. Ko xruʼin inaa Dio jii juʼo jeʼe ko se̱ʼan (Salmo 90:2). Jeʼe thi jichjaaná juajna jian ke dunthuuna ngaa Biblia (1 Timoteo 1:11). Ixi jeʼe mexinxin techuná. Ko mexinxin, juʼo jeʼe thi jikininxiʼin suthikauna ko sunthusayeʼena (Detsjeʼe Apocalipsis 4:11).

Ninaa chujni chruʼa dikun Dio ixi jeʼe naa nchaun. Mexinxin, jaʼana chruʼa dukuna ixi jaʼana de nthauná ko luruná (Juan 1:18; 4:24). Aro, jaan nchao tsunuana kexrein ncheʼe jeʼe are chunkuniná thi jeʼe juinchechjian. Ínchi thuchjuin ko tsjo ke jeʼe juinchechjian tjaguaná ke jeʼe thjuaná ko ke jeʼe anto nuʼen. Ko kai, are dunthena xraxauná de kainxin thi nuana ke jii sasendajni, nthakianxiná ke Dio anto tsanga (Detsjeʼe Romanos 1:20).

Ko kai nchao satsuana icha de Dio are tsjeʼená keʼe ndachro Biblia. Ixi nthiʼi ndathjuná kexrein ncheʼe jeʼe ngai chujni, keʼe nchexruxiʼin ko keʼe nchexruxiʼan, ko keʼe ncheʼe are tuʼen nanaa de jiʼi (Detsjeʼe 1 Juan 4:8 ko Santiago 4:6).

Jesús ndachro: “Ndudanana ke thjen ngajni, ke tsunthjua ko ke chujni tsunuʼena kexrein diʼin jaʼa” (Mateo 6:9 TNM). Mexinxin, maski jejee chunxinxiná Dio, jaan nuana kexrein diʼin jeʼe. Chunda ke sikun keʼe tha nichjaná. Mexinxin, thinga dixingixin kexrein ndachruni. Ngai tha ngigua ndachruni Jehová jaña xraa thenajni, aro ngai tha thenajni kai ndachruna Yavé. Ko Salmo 83:18 (TNM) (82:19 ngai inchi Biblia) ndachro: “Para ke chujni tsunuʼena ke jaʼa, diʼin Jehová”.

 Ngai icha Biblia, tadigasengixina ko ndachruʼana kexrein diʼin Dio, juʼo ndachro Dio o Nchaana. Aro are kji̱na Biblia, nthiʼa kji̱na kexrein diʼin Dio ínchi naa, yato jino bée. Ko are Jesús bakjague chujni de Dio, jeʼe jaan bakjago kexrein diʼin Ndo (Detsjeʼe Juan 17:26 TNM). *

Tsjeʼe video:“Kexrein diʼin Dio”

Si denduaxin thjuaaná Jehová, unda ixi tanchrjanda ke tuniana. Inchina ndachruna ke Dio ncheʼe jiʼi para ke sikun a jaan tsixiana. Aro yaa nduaʼa (Detsjeʼe Santiago 1:13).

Jehová chjaaná juachaxin tsincheʼená keʼe rinauná sunthuʼuna. Ko nchao sunthugundana juachaxin jiʼi para ke tsincheʼená sunthusayeʼena Ndo (Josué 24:15). Aro, tsje chujni thincheʼena ncheʼena thi jiaʼan jii. Ko mexinxin, anto tsje chijni jii. Ko jiʼi ncheʼe ke Jehová tatajuachjaun ixi kainxin thi jiaʼan ke jituʼen (Detsjeʼe 1 Pedro 5:7).

Ixi Jehová anto thjuaaná ko rinao ke ruchaana. Mexinxin, tasinthjian chi̱n ko kain chijni ke jii jai. Aro ngui sikuʼen jiʼi, jeʼe nuʼen kedunda jitanchrjanda ke jaʼana tedathuná thi tangi. Ko de jiʼi tsanginá ngai lección 8 (Detsjeʼe 2 Pedro 2:9 ko 3:7, 13).

Jehová rinao ke tsuncheená ngai. Mexinxin, runichjeená ngai thenchauʼana. Ko jeʼe jitsjeʼe ixi nanaa de jaʼana (Salmo 65:2; 145:18). Kai jeʼe nthatjañaaná ko tjañeʼan kainxin thi nthuʼuna ixi jeʼe, maski tebée tjajiná. Ko maski, guankuʼuná thi jiaʼan, nchao ruxrakjiuʼuná Ndo jian (Detsjeʼe 1 Juan 1:9 ko Santiago 4:8).

Ko nuana ke ixi jeʼe Ndo mexinxin techuná. Mexinxin, jikininxiʼin Ndo ke icha ruthjueʼená Ndo (Marcos 12:30). Ko tjaguná ke thjueʼená Dio are tanginá icha de jeʼe ko are duthikauna thi jeʼe kuetuʼan. Ko are nthuʼuna jiʼi, jiʼi sincheʼe ke icha jian ruxrakjiuʼuná Ndo (Detsjeʼe 1 Timoteo 2:4 ko 1 Juan 5:3).