Are Jesús xra duaʼan nthiʼi ngataʼa Nunthe jeʼe ubeʼe ngajni ko nthiʼa jeʼe kjui naa nchaun, ko jiʼa xraa naa chujni ínchi jaʼana (Juan 8:23). Jehová saʼo juinchechjian Jesús, kuthejan jeʼe kuengijna Dio juinchechjiana kainxin thi jii (Proverbios 8:22, 23, 30). Ko Biblia nchegiʼin, Xeʼen Dio xan “jeuxinxun”, ixi juʼo Dio juinchechjian (Juan 1:14). Kai chunxinxini xraa “Tha”, ixi jeʼe thi dajun juajna dajun Ndudee (Detsjeʼe Colosenses 1:15, 16).

Dio rua̱ʼan xeʼen nthiʼi ngataʼa Nunthe. Juincheʼe ke guan xan, xraa naa xan nchinchjan ko janee biʼin María, naa xanchrii de rajna Judá. Mexinxin, Jesús bechundaʼa naa ndudaʼa nthiʼi ngataʼa Nunthe (Lucas 1:30-35). Jeʼe juii nthiʼi ngataʼa Nunthe para: 1) kjuague chujni thi ndua de Dio, 2) kjuaguaná kunixin thi juincheʼe ke nchao sincheʼeni thi rinao Dio, maski sutana thi tangi, ko 3) ixi guankauʼa thi jiaʼan. Mexinxin, nchao be̱ʼen ko “kjuengana ixi jaʼana” (Detsjeʼe Mateo 20:28).

Are xengana ixi naa chujni, yaa ruchro are thjenganina ixi naana para ke xruʼin sinchekaunana (Éxodo 21:29, 30). Dio jeʼe binauʼan ke rukujun ko taruge̱ʼen chujni. Nuana jiʼi ixi Jehová ujuinchenuʼen Adán ke si runcheʼe thi jiaʼan -o si rugithikauʼan-, taruge̱ʼen. Thinxiná remée ke si jeʼe rugithikaun, jeʼe rugechun ko ruge̱ʼan (Génesis 2:16, 17; 5:5). Biblia thekin ke  thi tade̱ʼeni “juixin” de Adán. Jiʼi ruchro ke jaʼana duankuʼuná thi jiaʼan ko tade̱ʼená ixi kainá juixiná de jeʼe. Mexinxin, rugundaana ke ruxeengana ixi jaʼana (Detsjeʼe Romanos 5:12, 18).

Anchee, kense nchao tsjengana ixi jaʼana ko jaña nchao sunthechuna ko i se̱ʼana. Are naa chujni tade̱ʼen, tathjengana ixi kainxin thi jiaʼan ke juincheʼe. Ko ixi kainxiná guankuʼuná thi jiaʼan, jaʼana chruʼa tsjengananá ixi thi jiaʼan ke juincheʼe inaana (Detsjeʼe Romanos 3:23).

Jesús jiʼa xraa jaʼana, ixi guankauʼa thi jiaʼan ko xruʼin thi jiaʼan juincheʼe. Mexinxin, jeʼe be̱ʼan ixi runcheʼe thi jiaʼan, naʼi, jeʼe be̱ʼen ixi ni icha. Are Dio rua̱ʼan Xeʼen bige̱ʼen xan ixi jaʼana, kjuago ke anto thjueʼe kainxin chujni. Ko Jesús kai kjuago ke thjuaaná ixi bithikaun thi ndachro Ndudee ko xrajun be̱ʼen ixi jaʼana ko jaña kjuengana ixi thi jiaʼan ke guankuʼuná ko thi tade̱ʼená (Detsjeʼe 1 Juan 4:9 ko Romanos 5:18, 19).

Tsjeʼe video:“Unda ixi be̱ʼen Jesús”

Are Jesús juii nthiʼi ngataʼa Nunthe, juinchexrueʼen ni niʼi, juinchengathjen ni tadinthege̱ʼen, kuengijna ni tedatho thi tangi, jaña kjuago ke nchao sincheʼe jiʼi nchaʼun nandaʼa tsii ngai chujni ke sithikaun Dio (Mateo 15:30, 31; Juan 5:28). Are Jesús be̱ʼen, Dio juinchengathjen ko jaña takjan inaa bée, naa nchaun xraa are ubeʼe nthiʼa ngajni (1 Pedro 3:18). Nthiʼa Jesús tabeʼe ngakee Ndudee no rajianxin ko xra tajichuʼen sayee juachaxin ko nchao tsetuʼan kai ngataʼa Nunthe (Hebreos 10:12, 13). Jai, Jesús ujithetuʼan nthiʼa ngajni, ko ni ruee tethekina jiʼi nguixin ngataʼa nunthe (Detsjeʼe Apocalipsis 11:15 ko Mateo 24:14).

Kunixin thi juachaxin ke bajun Dio, Xi Nchixin jiʼi, tasinthjian kainxin chujni jiaʼan ko kain thi jiaʼan ke jituʼen. Aro kainxin chujni ke chunthia Jesús ko dithikauna thi ndachro, anto rucheena sinthena nthiʼi ngataʼa Nunthe, ke aremée utarukjan naa nthajie anto chrjuin seʼe (Detsjeʼe Mateo 5:5).