LECCIÓN 9
Keʼe rugunda para ke jian sintheni ngai naa nchia
1. Unda ixi are tsutheʼeni sincheʼeni thi thetuʼan xi nchixin
Jehová Dio ke anto chee, jeʼe thi jichjaaná juajna jian, ko rinao ke ni te ngai naa nchia rucheena (1 Timoteo 1:11). Jeʼe thi bakeʼe ixi chujni tsutheʼena. Tsutheʼeni ínchi thetuʼan xi nchixin thengijna chjan ko jiʼi sincheʼe ke kain ni te ngai nchia jian tsjiʼina ko rucheena. Ni testigo ncheʼena thi thetuʼan xi nchixin thi chunda ke sincheʼe yuo chujni ke rinao tsutheʼe (Detsjeʼe Lucas 2:1, 4, 5).
Dio ndachro ke are naa xii ko naa nchrii tutheʼena i chruʼa sachrjendeʼe chuuna. Jeʼe rinauʼan ke xii sincheyeʼe chriʼi ko ke nchrii sincheyeʼa xixiʼi (Hebreos 13:4). Jehová dingakuʼen thi tadachrjendeʼe chuuna (Malaquías 2:16). Juʼo nchao sachrjendeʼe chuuna ko rukjan tsutheʼena si naa de ni teʼi juincheyeʼe ni jikaʼo (Detsjeʼe Mateo 19:3-6, 9).
2. Keʼe chunda ke sincheʼe ni udinthekutheʼe
Jehová juinchechjian xii ko nchrii para ke ni teʼi tsengijna chuuna are utsutheʼena (Génesis 2:18). Xii thi chunda ke tsetuʼan ngai nchia. Mexinxin, jeʼe thi rutsjeʼe kexrein tsiaʼo thi rugundeʼe ni nchianduʼe ko jeʼe thi chunda ke tsjaguena de Dio. Kai te bée ke jeʼe chunda ke sincheʼe thi rinao chriʼi, kuthejan thi jeʼe rinao. Mexinxin, ni dinthekutheʼe sinao chuuna ko tsjaguna ke dithikaun chuuna. Aro kayuixina guankaʼuna thi jiaʼan. Mexinxin, chunda ke tsangina sinchetjañeʼe chuuna para ke jian tsjiʼina (Detsjeʼe Efesios 4:31, 32; 5:22-25, 33, ko 1 Pedro 3:7).
3. A chunda ke tasachrjendeʼe chuo ni dinthekutheʼe si chundana chijni
Si ngai naa nchia ni dinthekutheʼe chundana chijni, tanuinka sincheʼena tsjauna keʼe nchao sincheʼena (1 Corintios 13:4, 5). Thee Dio ndachruʼa ke tasachrjendeʼe chuuna para ke jaña i xruʼin chijni ruchundana (Detsjeʼe 1 Corintios 7:10-13).
4. Kexrein rinao Dio ke tsjiʼi chjan
Jehová rinao ke chjan jian tsjiʼi xan. Mexinxin, tjague xan keʼe sincheʼe xan para chrjuin tsunuʼe xan ko ruchee xan. Kai rinao ke tsangi xan kain thi nuʼen ni nduʼa xan ixi thi jeʼena ubathuna (Colosenses 3:20). Kai tjago ke icha chrjuin tsunuʼen xan si sincheʼe xan xree Dio ko Xeʼen Ndo (Detsjeʼe 2 Timoteo 3:14, 15; Mateo 19:13-15, ko 21:15, 16).
5. Keʼe chunda ke sincheʼe ni ndudaʼa para ke jian tsjiʼi xeʼena
Ni ndudaʼa chunda ke ruchjeena xeʼena thi sine xan, thi sinthexiʼin xan ko thi sinthengaa xan (1 Timoteo 5:8). Aro jiʼa juʼo jiʼi sincheʼena. Kai chunda ke sinchekueʼena xan ruthjueʼe xan Dio ko sincheʼe xan thi jeʼe rinao (Deuteronomio 6:4-7). Are ni ndudaʼa thjueʼena Dio jiʼi thengijna xeʼena tangi xan dithikaun xan Dio. Thi tangi xan de Thee Dio jiʼi ncheʼe ke ruxraxaun xan jian keʼe sincheʼe xan (Detsjeʼe Efesios 6:4 ko 2 Timoteo 3:15).
Are naa chjan ncheʼe xan thi jian jii, rugunda ke rundachená xan ke anto nchao beʼe. Aro te bée rugunda rundachená xan keʼe thi ndakuaʼa jii tencheʼe xan, ko jaña xruʼin chijni ruchunda xan (Proverbios 22:15). Ko are sunthuʼuna jiʼi ndakua rundachená xan, ko jiʼa sunthusathekana xan (Detsjeʼe Colosenses 3:21).
Ni Testigo de Jehová bantsjena tsje xruun ke thengijna ni ndudaʼa ko chjan. Xruun teʼi bachrjexin xrun de thi ndachro Biblia (Detsjeʼe Santiago 1:25).
