Jiʼi naa nchixin ke tsetuʼan desde ngajni ko i seʼa ditjaan ko tasinthjian kainxin xi nchixin jii nthiʼi ngataʼa Nunthe ko nchixin jiʼi sincheʼe ke tsuʼen inchi rinao Dio nthiʼi ko ngajni. Nchixin jiʼi thi rugundaana kainá, jeʼe sincheʼe ke kainxin chujni jian ruxrakao chuuna nthiʼi ngataʼa Nunthe. Ndaʼa ke jiʼi naa juajna anto jian (Detsjeʼe Lucas 4:43; Mateo 6:9, 10, ko 24:14).

Ngai naa nchixin rugunda naa xi tsetuʼan. Mexinxin, Jehová bakeʼe Xeʼen, Jesucristo, para ke rukjan Xi Nchixin ngai Nchixiʼin Ndo (Detsjeʼe Apocalipsis 11:15).

Tsjeʼe video:“Keʼe mée thi Nchixiʼin Dio”

Xruʼin inaa xi nchixin icha jian jii ke Jesucristo ixi jeʼe thukunueʼen ko rinao tsengijna kainxin chujni (Mateo 11:28-30). Kai, jeʼe anto tsanga. Mexinxin, nchao tsengijna chujni, ko xrajuʼo sincheʼe are tsetuʼan ngataʼa Nunthe desde ngajni. Are tabe̱ʼen ko kjan bingatjen, Jesús sakjui ngajni, nthiʼa tabeʼe ngakee Ndudee no rajianxin ko chuʼen asta ke rugayee juachaxin ko rukexiʼin ruketuʼan (Hebreos 10:12, 13). Ko Dio bajun juachaxin jiʼi (Detsjeʼe Lucas 1:32, 33).

Biblia ndachro ke inchi ni nchexree Dio tsengijnana Jesús tsetuʼana. Ngai Daniel 7:27 nichja de thi ni tsji ngajni. Ni saʼo kuincheʼe Dio para tsji ngajni yaa thi ni kuincheʼe Jesús ko rua̱ʼan are juii ngataʼa Nunthe. Ko Jehová xra jithincheʼe jai  nchauana inchi chujni, xii ko nchrii ke chunthia ngai Dio para ke tsjina ngajni. Jaña xraa Jesús, ni teʼi are tade̱ʼena, Dio kjan nchengathjena ko takjana naa nchaun xraa ni te nthiʼa ngajni (Detsjeʼe Juan 14:1-3 ko 1 Corintios 15:42-44).

Kieʼen ni tsji ngajni. Ngai Biblia dunthuuna kieʼen ni tsji, ko Jesús juinchegiʼin ni teʼi xraa naa “tajo nchinchjan” (Lucas 12:32). Juʼo 144,000 chujni tsji ngajni ko tsengijnana Jesús tsetuʼana ngataʼa Nunthe (Detsjeʼe Apocalipsis 14:1).

Náno 1914 aremée Jesús takjan Xi Nchixin, ko thi saʼo juincheʼe yaa ke tabantsje Xi Jiaʼan ko ni ángeles ke saruee de ngajni ko sajuina nthiʼi ngataʼa nunthe. * Anto guñao, mexinxin juincheʼe ke kununxin anto tsje chijni nthiʼi ngataʼa Nunthe (Apocalipsis 12:7-9, 12). Ko mexinxin, jai ínchi jidatho nchaʼun icha tangi tajideʼe. Thi thetukaʼo chuo país, thingi nunthe, chin ko jintha, jitjago ke jixethja thi bajin Dio ke Nchixiʼin i seʼa ditjaan ko tsexiʼin tsetuʼan nguixin ngataʼa Nunthe (Detsjeʼe Lucas 21:7, 10, 11, 31).

Nchixiʼin Dio jinchegunda thi juajna jian ke jithji nguixin ngataʼa nunthe para ke jidatse “tsje chujni” de kainxin rajna. Ko tsje millón de chujni tedijina tedithikauna de nguixin anseena thi kjuago Jesús. Ko kainxin ni teʼi se̱ʼana are Nchixiʼin Dio tasuen kainxin chujni jiaʼan ke jii nthiʼi. Mexinxin, si rinauná sunthena ngai Nchixiʼin Dio, chunda ke suthikauna thi kjuago Jesús (Detsjeʼe Apocalipsis 7:9, 14, 16, 17).

Ngai thi naa jino de náno, aremée Nchixiʼin Dio tsunkjan Nunthe jaña xraa jeʼe Ndo juinao Ndo are nakuexinxun. Nunthe tarukjan naa nthajie chrjuin seʼe. Kuthejan, Jesús tsunkjan Nchixin jiʼi ngai Ndudee (1 Corintios 15:28). A ruenthaxruxiʼan ruekekiʼin inaana de Nchixin jiʼi (Detsjeʼe 2 Pedro 3:13).