LECCIÓN 14
Keʼe ncheʼe ni denduaxin nchesayeʼe Jehová
1. Unda ixi juinao Dio ke rajna Israel ndakua runcheʼena xrá
Dio juinchechjian naa rajna ke ndakua runcheʼe xrá ke juixin de Abrahán ko jeʼe kuetuʼan inchi thi runcheʼena. Rajna jiʼi, binchegiʼin Israel, juʼo ni teʼi ni denduaxin banchesayeʼe Dio ko juʼo ni teʼi ni bagithikaun thi ndachro Ndo (Salmo 147:19, 20). Ko ixi ni jiʼi, chujni de kainxin rajna nchao rugijina rugatsuana Dio (Detsjeʼe Hechos 3:25).
Dio kuincheʼe ni israelita para ke ruguana ni testigoe. Thi kuʼen ni teʼi tjago ke si sithikauni thi thetuʼan Dio, jian tsjiʼini (Deuteronomio 4:6). Ko Isaías 43:10 (TNM) ndachro: “Jaʼara ni testigona -jaña ndachro Jehová-, jaʼara thi kuincha̱ʼara” ko ixi ni jiʼi, tsje chujni de kainxin rajna nchao sijina satsuana Dio ke juinthachjianá (Isaías 43:12).
2. Keʼe ncheʼe ni denduaxin nchesayeʼe Jehová
Are Israel, thi rajna ke kuincheʼe Dio i bithikauʼan, jeʼe i kuengijnaʼana, Jehová kuexiʼin juinchegunda ni bithikaun thi kjuago Jesús (Mateo 21:43; 23:37, 38). Mexinxin, jai thi ni denduaxin tenchesayeʼe Jehová yaa ni jeʼe nchegiʼin ni testigoe, ko i jiʼa ni israelita (Detsjeʼe Hechos 15:14, 17, 18).
Jesús kjuague ni baruee kexrein rugikauna juajna jian ko rukengijnana chujni nguixin ngataʼa Nunthe para ke ruruena Jesús (Mateo 10:7, 11; 24:14; 28:19, 20). Jai, thi nchaʼun xra dithueʼe nunthe jiʼi, icha suji jiduan xrá jiʼi. Anxun, jai nchauana Jehová jidatse tsje millón de chujni de kainxin rajna para ke ruruena thi religión tjago thi ndua (Apocalipsis 7:9, 10). Ko ixi ni teʼi tjauna kexrein sincheʼena xrá, nchao thengijna chuuna ko jiʼi tuʼen ixi denduaxin nchesayeʼena Jehová. Ko kai, are tangina de Biblia kainxina xrajuʼo tangina are xrathena (Detsjeʼe Hebreos 10:24, 25).
3. Kexrein kjan kununxin ni testigo de Jehová jai nchauana
Are ubatho náno 1870 kjan kununxin ni teʼi. Binthe inchi ni kuexiʼin kuangi thi ndachro Biblia ko kuinxina kexeʼe thi ndua, ko bijina kuinxina keʼe ruchro kain thi jeʼena tetangina. Kuinxina ke are Jesús juii nthiʼi ngataʼa Nunthe kjuague ni baruee ke rugikauna juajna jian, ke chunda ke runichjana de Nchixiʼin Dio nguixin ngataʼa Nunthe ko jiʼi thi juincheʼena. Kuincheʼena biʼina testigo de Jehová ngai náno 1931 (Detsjeʼe Hechos 1:8; 2:1, 4 ko 5:42).
4. Unda ixi ndakua jituʼen thi tencheʼe ni testigo de Jehová
Ngai siglo NAA, beʼe inchi ni batsjeʼe keʼe icha nchao runcheʼeni, o naa comité ke bakengijna kainxin congregación ke binthe nguixin ngataʼa Nunthe, ni teʼi bagithikauna ke Jesús jeʼe thi bagitauʼen nthiʼa kainxin congregación (Hechos 16:4, 5). Jaña kai, jai jii naa Comitee ni Testigo de Jehová ke jithengijnaná, ko ni te ngai comité jiʼi juxo ni anto nuʼen, ko tetsjeʼena kainxin nchia Betel ke jii ngataʼa Nunthe. Nthiʼa jitunchjianxin xruun ngai icha tha, jidachrje xruun ke jinichja de Biblia ko jichjeeya ngai icha de inkjaun ciento tha. Ni teʼi nchegundana Biblia, para thengijnana thi icha de naa ciento jino congregación, ko ngai congregación te ni tetaun nthiʼa, ke tethengijnana ni nchexree Dio, xraa ni dayakuʼen kuthuchjunchjan (Detsjeʼe 1 Pedro 5:2, 3).
Ni testigo de Jehová ndakua ncheʼena xrá. Mexinxin, nchao dikauna juajna jian ke tjago Biblia ko thengijnana icha chujni para ke sinchesayeʼena Jehová. Jaña xraa ni rua̱ʼan Jesús, ni teʼi kai thjina de nchia ko nchia dikauna juajna jian (Hechos 20:20). Kai nchekueʼena chujni ke rinao tsangi de Dio. Aro jiʼa juʼo ndakua ncheʼena xrá; kai dikun ko thjueʼe chuuna, xraa si rukji ichuuna, ko dikuna Dio xraa naa Ndudaʼa (2 Tesalonicenses 1:3). Ko ngai Salmo 33:12 (TNM) ndachro: “Chee thi rajna ke chunda de Dio Jehová”, ixi thjeena ncheʼena thi thetuʼan Ndo ko thengijnana chujni, jiʼi ncheʼe ke anto cheena are ncheʼena jiʼi (Detsjeʼe Hechos 20:35).
