LECCIÓN 10
Kexrein sunthuuna thi religión tjago thi ndua
1. Kieʼen religión tjago thi ndua jii
“Runthayaʼara chujni ndachro ixi dayeena [. . .] juajné Ndo Dio aro nduaʼa” (MATEO 7:15).
Jesús ko ni baruee kjuaguna kexeʼe religión tjago thi ndua, jeʼe ndachro ke jiʼi xraa naa nthiʼa ke tsengijnaná sunthechuna ko i se̱ʼaná, aro tsjeʼa ni ruee nthia jiʼi (Mateo 7:14 TNM). Dio juʼo tsianá si sunthusayeʼena aro juʼo jaña inchi tjaguaná Biblia. Thi ni denduaxin nchesayeʼe Dio kainxina xrajuʼo tangina ko xrajuʼo dithikauna (Detsjeʼe Juan 4:23, 24; 14:6, ko Efesios 4:4, 5).
Tsjeʼe video:“A kainxin religión ncheʼe thi rinao Dio”
2. Kexrein rukununxin ni tjago thi nduaʼa
“Ndachruna ixi chunxina Ndo Dio, aro kain thi jiaʼan ncheʼena tjago ixi nduaʼa thi ndachruna” (TITO 1:16).
Jesús bajin ke rukununxin chujni ke rundachro ke dayee juajné Dio ko rukexiʼina rukjaguna thi nduaʼa. Ko ndachruna ke ninguʼena thi jitjago thi ndua. Maski jaña ndachruna, thi jituʼen yaa ke, juʼo tencheyeʼena chujni. Ko naa chujni nchao sikun kexeʼe religión jitjago thi ndua, are dikun ke ni thji nthiʼa denduaxin tencheʼena thi tetangina (Detsjeʼe Mateo 7:15-23).
3. Kexeʼe ni te ngai religión tjago thi ndua
Rutsjeʼená keʼe tsengijnaná satsuaná kexeʼe ni teʼi:
-
Dithikauna ke Biblia juixin de Dio. Mexinxin, ni teʼi tjaguʼana thi tetjago ni icha, ko tanuinka ncheʼena dithikauna thi ndachro Biblia (Mateo 15:7-9). Ko kai, jeʼena tencheʼena thi tetjaguena ni icha (Detsjeʼe Juan 17:17 ko 2 Timoteo 3:16, 17).
-
Tjaguna ke Dio diʼin Jehová. Jesús juincheʼe jiʼi are kjuague chujni kexrein diʼin Ndudee. Nichjee chujni de Jehová ko kjuaguena kexrein ruganchiana ngai thenchauʼena ke tsunthjua ko ke chujni tsunuʼena kexrein diʼin jeʼe (Mateo 6:9 TNM). Ngai rajnaantha, kexeʼe religión tjago kexrein diʼin Dio (Detsjeʼe Juan 17:26 TNM). *
-
Nichjana de Nchixiʼin Dio. Jesús juii ngataʼa Nunthe para bikao juajna jian de Nchixiʼin Dio, ko juʼo Nchixin jiʼi thi nchao tsengijna chujni. Ko jiʼi juincheʼe asta thi nchaʼun ke tabe̱ʼen (Lucas 4:43; 8:1). Ko ndachro ke ni ruee kai runichjana de Nchixin jiʼi. Mexinxin, si siji naa ni segitsjaʼa ko sekekiʼana de Nchixiʼin Dio, a denuʼa de keʼe religión ni yaa (Detsjeʼe Mateo 24:14).
-
Ncheʼana thi jiaʼan ke tencheʼe chujni. Ni ruee Jesús dixintheʼana ngai política ni ngai chijni ke chundakaʼo chuuna (Juan 17:16; 18:36). Kai ncheʼana xraa chujni ke ncheʼe thi jiaʼan ke jii ngataʼa Nunthe jiʼi (Detsjeʼe Santiago 4:4).
-
Tjaguna ke thjueʼe chuuna. Thee Dio tjaguena ke jian ruxrakauna kainxin chujni, maski de jejee rajnana. Icha religión kai dixinthe are naa país thetukaʼo inaa país, aro ni ruee thi kjuago Jesús ncheʼana jiʼi (Miqueas 4:1-3). Ni teʼi nchegundana tumiina ko thjeena kexrein thengijnana ni icha (Detsjeʼe Juan 13:34, 35 ko 1 Juan 4:20).
4. A jaan ubegikun kexeʼe religión tjago thi ndua
Kexeʼe religión dendachro suixin ke jitjago thi ndachro Biblia, tjago kexrein diʼin Dio ko nichja de Nchixiʼin Ndo ko ke juʼo Nchixin jiʼi thi nchao tsengijna chujni. Kexeʼe religión dikuni ke jaan denduanxin thjueʼe chuuna ko thjiʼana are thetukaʼo chuo país. Kexeʼe ni teʼi (Detsjeʼe 1 Juan 3:10-12).
^ párr. 3 Juan 17:26: Ko ja’an kjuaguana kexrein di’in ja’a, ko tsinthua’a de tsjaguana ji’i, para ke je’ena kai ruthjue’ena ni icha jaña xraa ja’a rinauna ja’an, jaña ja’an sari’i ngaina.
