Kainxin thi ubekangi ke tjago Biblia jiʼi juincheʼe ke icha begatsuan Jehová. Anchee, rugunda ke sekinthueʼa de sekangi ko icha sethjueʼe Ndo (1 Pedro 2:2). Para ke suixin segarichun ko i sege̱ʼan, rugunda ke chiaun segariʼi de Jehová ko sekinthueʼa de sekangi thi ndachro Thee Ndo (Detsjeʼe Juan 17:3 ko 1 Timoteo 2:3, 4).

Are suixin sekangi icha de Dio, icha sechunthia ngai Ndo, ko jiʼi sekengijna sencheʼe thi rinao Ndo (Hebreos 11:1, 6). Thi kuanginá sincheʼe ke tatsinthuʼená thi jiaʼan ko tsexiʼiná sunthuʼuna thi jian jii (Detsjeʼe Hechos 3:19).

Kainxiná rinauná tsekiiná chujni are tunuaná de naa thi anto renthe, ko nchao sekekiʼina thi suixin bekangi. Yao ko yao sekinxin icha jian thi tjago Biblia, kai sekangi senchegunda Thee Dio ko nchao sekekin de Jehová ko de kainxin thi jian ke sincheʼe Ndo ixi chujni (Detsjeʼe Mateo 28:19, 20).

Nchao sekexinxin ngai ni te nchianduintha ko ni jian dexrakjiuʼo. Aro dekjanuaʼana ixi thi jeʼena xraxauna. Dendachruʼa ke thi tencheʼena yaa ndakuaʼa jii, suixin juʼo dekekiʼina keʼe sincheʼe Dio. Thi tsengijnana yaa kexrein rundachenaná ko jiʼa thi ndachruná (Detsjeʼe 2 Timoteo 2:24, 25).

Si sekinthueʼa de sekangi thi ndachro Biblia icha tsje sekangi de Jehová ko icha jian sexrakjiuʼo Ndo. Ko asta tarukjantha xraa inaa de ni jii ngai nchianduʼa Ndo (Detsjeʼe 2 Corintios 6:18).

Dekinthueʼa de dekangi thi ndachro Thee Dio (Hebreos 5:13, 14). Deganchieʼe naa ni testigo de Jehová ke senthakuaʼana kunixin xrun diʼin ¿Qué nos enseña la Biblia? Si sekinthueʼa de sekangi, jiʼi sincheʼe ke icha chrjuin sekunuʼan (Detsjeʼe 1 Timoteo 4:15, 16 ko Romanos 12:2).

Dexraxaun ke juajna jian ke jii ngai Biblia thixin de Jehová, Dio ke anto chee, ko suixin nchao sekuncheʼen ngai Jehová si sekji thi xrathe ni nchexree (Hebreos 10:24, 25). Si suixin sencheʼe xree Jehová de nguixin ansaantha, jiʼi sincheʼe ke anto chrjuin sekunuʼan: segarichun ko i sege̱ʼan. Yaa thi icha renthe ke nchao sencheʼe ixi jaña icha jian sexrakjiuʼo Dio (Detsjeʼe 1 Timoteo 1:11 ko 6:19).