LECCIÓN 6
A xra chrujan sincheʼe Dio ixi ni tabinthege̱ʼen
1. Keʼe sincheʼe Dio ixi ni tabinthege̱ʼen
Are Jesús beʼe nthiʼi ngataʼa Nunthe, Lázaro xi jian baxrakao tabe̱ʼen. Xi jiʼi beʼexa ngai rajna Betania, naa rajna ke jii chiaun de Jerusalén. Are Jesús biji, Lázaro ubechunda nuo nchaʼun ke tabe̱ʼen. Marta ko María -xachuo Lázaro-, bikauna Jesús thi xrabaa Lázaro, ko anto tsje chujni kjui bitsjeʼe. Degariʼi dexraxaun kexrein chrjuinxin kunuʼe Marta ko María are bikuna kexrein Jesús juinchengathjen xachuuna (Detsjeʼe Juan 11:21-24, 38-44).
Ngai Biblia ndachro ke rukjan singathjen ni tabinthege̱ʼen ko jiʼi naa de thi juajna jian ke chjaaná Dio. Ko Marta ubinuʼen jian ke Jehová ndachro ke sinchegathjena para sinthena nthiʼi ngataʼa Nunthe (Detsjeʼe Juan 11:24).
2. Keʼe tuʼeni are tade̱ʼeni
Dio ndache Adán: “Ixi jinche kunchjianxin ko jinche tarukjan” (GÉNESIS 3:19)
Kainxiná de “jinche” kunchjianxiná (Génesis 2:7; 3:19). Jaʼana jiʼa xraa naa nchaun ke rugeʼe ngai nthao ko luro. Naʼi, sino ke jaʼana de nthauná ko luruná. Mexinxin, are tade̱ʼená xruʼin thino inaa sathjiná. Are thjelejaani i ncheʼa xrá ixi tade̱ʼeni, i xruʼin xraxauni. Mexinxin, are naa chujni tade̱ʼen, i xruʼin tunuʼen. Ko are Lázaro kjan bingathjen, jeʼe kuekiʼan ixi chrujan runcheʼe are tabe̱ʼen (Detsjeʼe Juan 11:11-14).
Inchina xraxauna ke jii naa thi jiche xruʼi ko nthiʼa Dio sincheʼe ke chujni, tsjenganana ixi thi jiaʼan ke juincheʼena, aro yaa nduaʼa. Ínchi tetanginá, ni tadinthege̱ʼen i xruʼin tunuʼena. Mexinxin, thi tjaguna ixi jii naa thi jiche xruʼi ke thji ni dithikauʼan, yaa nduaʼa, Jehová ncheʼa yaa, jeʼe ninchi nchexruxiʼan ixi jaña tjaguna (Detsjeʼe 1 Juan 4:8).
Tsjeʼe video:“Keʼe tuʼeni are tade̱ʼeni”
3. A nchao runichjeeni ni tadinthege̱ʼen
Ni tadinthege̱ʼen i nichjaʼana ko i thiʼana (Salmo 115:17). Aro, jii inchi ni ángeles anto jiaʼana ke ni teʼi nichjeena ko ncheyeʼena chujni ixi datheʼena jaña xraa si ni tadige̱ʼen rugatheʼe (Judas 6). Mexinxin, Jehová ninchi nchexruxiʼan ke kai jaʼana tsjeena runichjeená ni tadinthege̱ʼen (Detsjeʼe Gálatas 5:20, 21).
4. Kexeʼe ni rukjan singathjen
Tsje millón de chujni ke tabinthege̱ʼen rukjan singathjena ko nthiʼi sinthena ngataʼa Nunthe. Ko kai singathjen thi ni kuiʼan de Jehová ko juincheʼe thi jiaʼan (Detsjeʼe Hechos 24:15).
Thi ni rukjan singathjen nchao tsangina de Dio, sithikauna thi juincheʼe Jesús ko sincheʼena thi ndachro (Apocalipsis 20:11-13). Si sincheʼena jiʼi, sinthechuna ngataʼa Nunthe ko i se̱ʼana (Detsjeʼe Juan 5:28, 29).
5. Keʼe tjaguaná de Jehová ixi rukjan sinchengathjen ni tadinthege̱ʼen
Thi singathjen ni tadinthege̱ʼen, tjago ke Jehová anto thjuaaná ko anto rinauná maski jikininxiʼaná. Ko ixi Dio rua̱ʼan xeʼen bige̱ʼen xan ixi jaʼana. Mexinxin, chunthianá ke jaan sikuʼen jiʼi. Anchee suixin, kensen dejinao segikun (Detsjeʼe 1 Juan 4:9 ko Romanos 6:23 TNM). *
^ párr. 8 Romanos 6:23: Ixi thi jia’an ke guanku’una nche’e ke tade̱’ena, aro thi juajni ke chjaaná Dio, ixi xe’en xan Cristo Jesús, yaa ke sunthechuna ko ise̱’aná.
