Jehová Dio ke juinthachjianá, jeʼe icha nuʼen ke jaʼana. Aro kai anto rinauná ko tajuachjaun ixi jaʼana. Juinthachjiaʼaná para ke jaʼuna tsincheʼená keʼe thi ndakua o ndakuaʼa jii sunthuʼuna (Jeremías 10:23). Jaña inchi xan nchinchin rugundeʼe xan ke ni nduʼe xan tsengijnana xan, jaña jaʼana kai rugundaana ke Dio rundathjuná keʼe sunthuʼuna (Isaías 48:17, 18). Ko thi ndua ke tjago Biblia jiʼi naa juajni ke jeʼe jichjaaná (Detsjeʼe 2 Timoteo 3:16).

Thi thetuʼan Jehová ko thi ndua ke tjago Biblia tjaguaná kexrein icha jian sunthena ko ndathjuná keʼe sunthuʼuna nchaʼun nandaʼa tsii para ke jeʼe sinthanchauná. Ko ixi jeʼe juinthachjianá, jaʼana chunda ke suthikauna (Detsjeʼe Romanos 15:4 ko Apocalipsis 4:11).

Thi kuetuʼan Dio ngai Biblia juʼo thengijnaná ngai inchi chijni. Aro thi ndua ke tjago Biblia thengijnaná rutsjeʼená keʼe sunthuʼuna ngai kain thi sutana (Deuteronomio 22:8). Para ke nchao tsinxiná naa thi ndua ke tjago Biblia, are tethincheʼená keʼe sunthuʼuna, rugunda ke sunthugundana juaxraxauana (Proverbios 2:10-12). Ínchi, thi tjago Biblia ke thi techuná yaa naa juajni ke jichjaaná Dio. Thi ndua ke tjago Biblia de jiʼi thengijnaná are nthuʼuna xrá, are tená ngai nchia ko are taridunthena, ixi jiʼi nthaxraxauná keʼe sunthuʼuna para ke xruʼin tsuana (Detsjeʼe Hechos 17:28).

Jesús nichja de yuo thi ndua ke tjago Biblia. Thi saʼo, tjago keʼe rinao Dio ke sunthuʼuna: satsuaná, suthikauna ko sunthusayeʼena Ndo. Rutjañaʼaná thi ndua ke jitjago Biblia de jiʼi, are tsincheʼená keʼe thi icha jian sunthuʼuna (Proverbios 3:6). Thi ni sithikaun jiʼi icha jian ruxrakauna Dio ko jiʼi sincheʼe ke sinthechuna ko i se̱ʼana (Detsjeʼe Mateo 22:36-38).

Ko thi yuxin, tjaguaná kexrein icha jian ruxrakjiuʼuná ni icha (1 Corintios 13:4, 7). Ko si jaʼana sunthuʼuna kayui jiʼi tenthuʼuna xraa ncheʼe Jehová ngai chujni (Detsjeʼe Mateo 7:12 ko 22:39, 40).

Thi ndua ke tjago Biblia thengijnaná para ke icha ruthjueʼená ni nchianduina (Colosenses 3:12-14). Ko kai dayakuʼen ni te ngai nchia, ixi tjago ke ni dinthekutheʼe ke sachrjendeʼa chuuna (Detsjeʼe Mateo 19:5).

Are duthikauna thi ndua ke tjago Biblia ncheʼe ke chrjuin tunuana ko ngai kain thi nthuʼuna. Jaña xraa ngai naa xrá, tsje bée xi najni thjeexa ni nchexra ke dithikaun thi ndachro Biblia, chujni ke themaʼa ko dingaxin ñao (Proverbios 10:4, 26; Hebreos 13:18). Ko kai Thee Dio tjaguaná ke tsaʼaná juachjaun si uchundaná thi rugundaana, ko ke para jaʼana xruʼin naa thi icha renthe ke thi jian ruxrakjiuʼuná Dio (Detsjeʼe Mateo 6:24, 25, 33 ko 1 Timoteo 6:8-10).

Thi ndua ke tjago Biblia kai thengijnaná para ke tsuniaʼana; ínchi thi kuetuʼan Dio, ke rukuaʼani, thengijnaná ko tuniaʼana ixi jiʼi, ko kai para ke jaʼana tsuaʼana thi tuʼen tsje chujni ke kuan (Proverbios 14:30; 22:24, 25; 23:20). Jaan ndua, Jehová tanchrjanda ke jaʼana tsincheʼená. A suʼuna xran o ni naʼi. Aro juʼo ke rukuaʼaná (Salmo 104:15; 1 Corintios 6:10). Thi ndua ke tjago Biblia thengijnaná, ixi jiʼi nthaxraxauná ke chunda ke rutsjeʼená jian keʼe tenthuʼuna ko keʼe texraxauná (Salmo 119:97-100). Aro, jaʼana xro ni nchexree Dio jiʼa juʼo duthikauna thi tjago Biblia para ke jian tsjiana; naʼi, nthuʼuna jiʼi ixi duthikauna Ndudaana ke jii ngajni, Jehová (Detsjeʼe Mateo 5:14-16).