LECCIÓN 3
A na denduaxin de Dio jithixin kain thi ndachro Biblia
1. Kensen kji̱n Biblia
Thi juajna jian ke bayeená ixi sunthechuna ko i se̱ʼaná nthiʼi ngataʼa Nunthe, tununxin ngaa Biblia (Salmo 37:29). Dio kuincheʼe ínchi 40 xii ke anto bithikaun para ke kji̱na 66 xruun, ko kain xruun teʼi xratse xrun ko jaña kunchjian Biblia. Chunda ínchi nii jino ko naʼo ciento náno ke Moisés kji̱n thi naʼo xruun thexinxin tununxin ngaa Biblia, ko chunda naa jino ko náa ciento náno ke thi xi rua̱ʼan Jesús ke biʼin Juan kji̱n xrun thjexinxin. Thi jitjago Biblia yaa juixin de Dio. Jeʼe juinchegunda nchauʼen ko jaña nichjee kain ni kji̱n Biblia (2 Samuel 23:2). Chujni teʼi kji̱na thi ndachro Dio ko jiʼa thi jeʼena xraxauna. Mexinxin, ndachruná ke Jehová thi kji̱n Biblia (Detsjeʼe 2 Timoteo 3:16 ko 2 Pedro 1:20, 21).
Tsjeʼe video:“Kense kji̱n Biblia”
2. Unda ixi suthikauna ke Biblia tjago thi ndua
Biblia juixin de Dio. Ko nuana jian jiʼi, ixi nthiʼi ndachro keʼe sikuʼen nchaʼun nandaʼa tsii ko jaña dikuʼen, ko ninaa chujni chruʼa dajin keʼe sikuʼen (Josué 23:14). Juʼo Dio thi icha tsanga ko nchao sincheʼe jiʼi (Detsjeʼe Tito 1:2, 3).
Si Dio jichjaaná naa xruun, kainxiná chunda ke sunthurenthena xrun. Biblia, chjeeya tsje jino de millón ngai tsje ciento de tha. Maski anto see kji̱na xrun, tjago xrun thi nandaʼa tedithja xi científico. Ko kai, thi 40 chujni ke kji̱n xrun de xrajuʼo nichja kainxina. Ko kai, nguixin ngaa xrun thi rutsjeʼená sunthuuna ke Dio anto thjuaaná ko jai nchauana kai xra jithengijna chujni para ke icha jian tsjiʼina. Ko mexinxin, tsje millón de chujni xra dithikauna ke Biblia yaa Thee Dio (Detsjeʼe 1 Tesalonicenses 2:13).
Tsjeʼe video:“Unda nchao ruchunthianá ke Biblia ndachro thi ndua”
3. De keʼe jinichja Biblia
Biblia juʼo dajun juxun juajna jian. Nichja de thi sincheʼe ko tsiaʼo Dio para kainxin chujni, ke anto chrjuin sigeʼe. Ko thekin ke chujni i chruʼa binthechuna ngai nthajie anto chrjuin beʼe ixi i bithikauʼana Dio ko kai ndachro kexrein rukjan sigeʼe jiʼi inaa bée (Detsjeʼe Apocalipsis 21:4, 5).
Ngaa Thee Dio dunthuuna thi jeʼe kuetuʼan, thi ndua ko ndathjuná keʼe sunthuʼuna. Kai ndathjuná keʼe ncheʼe Jehová ngai chujni, ko jaña datsuaná Ndo icha. , Jaña thengijnaná Biblia datsuaná Ndo. Kai tjaguaná kexrein nchao ruxrakjiuʼuná Ndo (Detsjeʼe Romanos 15:4 ko Santiago 2:23, ko 4:8).
4. Keʼe tsengijnaná para ke icha jian tsinxiná thi ndachro Biblia
Para ke rukinxina keʼe ruchro thi ndachro Thee Dio, Jesús banchegunda icha versículo ko jaña banchekinxina. Xrun jiʼi kai jaña dunda para thengijnaná tsinxiná icha jian keʼe tjago Biblia (Detsjeʼe Lucas 24:27, 45).
Nunana jian ke suixin ruenthaxruxiʼan ruekangi icha de thi juajna jian ke jichjaaná Dio. Aro, te tsje chujni ke nchexruxiʼana jiʼi, ko tena asta duñauna are thekiinina de jiʼi. Aro maski jaña ncheʼena, suixin dexrauʼan. Biblia ndachro, ke thi ni tsangi de Dio sinthechuna ko i se̱ʼana (Detsjeʼe Juan 17:3).
