LECCIÓN 8
Unda ixi xra dinthjiaʼan Dio chijni ko kainxin thi jiaʼan
1. Kexrein kuexinxin juii thi jiaʼan
Thi kainxin náno ke kuanchrjanda Dio ke batho xrago jian ke ninaa xi nchixin nthiʼi ngataʼa Nunthe chruʼa sinthjian chijni
Thi jiaʼan juii nthiʼi ngataʼa Nunthe are Xi Jiaʼan kuexiʼin juincheeya. Jeʼe kjui naa ángel ke guankauʼa thi jiaʼan, aro jeʼe i juinauʼa juincheʼe thi jian (Juan 8:44). Juʼo Dio thi jikininxin sunthusayeʼena aro jeʼe juinao ke kai rukusayeʼe. Mexinxin, juincheyeʼe Eva ko tabithikaun thi ndachro jeʼe, ko i bithikauʼan Dio. Ko kai Adán jaña juincheʼe xraa chriʼi ko i bithikauʼan Dio. Thi juincheʼe kayui ni teʼi juʼo juiaʼo thi tangi ko thi tade̱ʼeni (Detsjeʼe Romanos 5:19 ko 2 Corintios 11:3).
Are jeʼe ndache Eva ke i rugithikauʼan Dio, Xi Jiaʼan kjuago ke kai i juinauʼan rugithikaun Ndo. Jeʼe jitjago ke i jiʼa juʼo Jehová thi Icha Jie, thi chunda ke rugithikauni. Ko anto tsje chujni tabithikauna thi jitjago Xi Jiaʼan ko i bithikauʼana Dio. Mexinxin, Xi Jiaʼan takjan “thi thetuʼan nunthe jiʼi” (Detsjeʼe Juan 14:30 ko 1 Juan 5:19).
2. A ndakuaʼa juinchechjian Dio kainxin thi jii
Xruʼin thi jiaʼan chunda kainxin thi juinchechjian Jehová. Ínchi Adán, Eva ko ni ángeles, jeʼena nchao rugithikauna thi kuetuʼan Dio (Deuteronomio 32:4, 5). Jeʼe juincheʼe ke jaʼana nchao tsincheʼená keʼe thi ndakua o ndakuaʼa jii. Ko jaña tjaguná ke de jaʼana dachrjexin duthikauna Ndo (Detsjeʼe Santiago 1:13-15 ko 1 Juan 5:3).
3. Unda ixi xra dinthjiaʼan Dio chijni
Jehová jitanchrjanda ke chujni i jidithikauʼana Ndo, aro i seʼa tsunchrjeʼen jiʼi. Unda juincheʼe Ndo jiʼi. Ixi jaña ruxrago ke si Dio tsengijnaʼan xi nchixin, juʼuxa chruʼa tsengijnaxa chujni (Eclesiastés 7:29; 8:9). Thi inkjaun jino náno ke ubatho, xrago jian: ke ninaa xi nchixin ke jii nthiʼi ngataʼa Nunthe chruʼa dinthjian thi jiaʼan ke tuʼen, chijni, chi̱n ko thi thetukaʼo chuo país (Detsjeʼe Romanos 9:17).
Si jaʼana suthikauna thi ndachro Dio, anto jian tsjiana (Isaías 48:17, 18). Abée nchiun ditjaan ko Jehová tasinthjian kainxin xi nchixin ke jii. Ko juʼo sithuʼe nthiʼi ngataʼa Nunthe chujni ke dithikaun Ndo (Isaías 11:9) (Detsjeʼe Apocalipsis 11:15).
Tsjeʼe video:“Unda ixi xra dinthjiaʼan Dio chijni ko kainxin thi jiaʼan”
4. Keʼe nchao sunthuʼuna ixi Dio xra jichuʼen
Xi Jiaʼan ndachro ke chujni nchesayeʼena Dio juʼo ixi nchenchaun Ndo na. Ixi Dio xra jichuʼen, jaʼana nchao tsjaguná ixi thi nthuʼuna, ke kainxin thi ndachro Xi Jiaʼan yaa nduaʼa ko ke jaʼana tethjeená suthikauna Nchixiʼin Dio ko jiʼa nchixiʼin chujni (Detsjeʼe Apocalipsis 12:10 ko 2 Juan 4).
5. Kexrein tsjaguná ke duthikauna Dio
Thi nthuʼuna tjago, a jaan rinauná sunthena ngai Nchixiʼin Dio
Saʼo rutsjeʼená kexrein rinao Dio ke sunthusayeʼena ko tsexiʼiná sunthuʼuna thi jitjago religión tjago thi ndua, ixi jiʼi jaan jitjago thi ndachro Biblia (Juan 4:23). Ko kai, si sunthuʼuna thi juincheʼe Jesús de suxintheʼana ngai política ni ngai thi thetukaʼo chuo país, jaña tsjaguná ke rinauʼaná suxinthena ngai nchixiʼin Xi Jiaʼan (Detsjeʼe Juan 17:14).
Xi Jiaʼan ncheʼe ke chujni thexiʼina ncheʼena thi jiaʼan ke tsiauʼena chijni ko thi thjuaʼa ke ncheʼena. Are i rinauʼaná nthuʼuna jiʼi, ni xrakjiuʼuná ko ni nchianduina tjanuananá ko taduñauanana (1 Pedro 4:3, 4). Mexinxin, tsjeená tsatuná ni denduaxin thjueʼe Dio ko jaña icha tangiʼa tsunuana suthikauna thi kuetuʼan Dio. Jaña tsjaguxiná ke thi ndachro Xi Jiaʼan yaa nduaʼa, ixi jaʼana jaan nthusayeʼena Dio maski dutana chijni (Detsjeʼe 1 Corintios 6:9, 10 ko 15:33).
Dio anto thjuaaná. Mexinxin, tasinthjian kainxin thi tangi ko thi jiaʼan ke jii jai. Thi ni tsjago ke chunthiana ko sithikauna Dio sinthechuna nthiʼi ngataʼa Nunthe ko i se̱ʼana (Detsjeʼe 1 Juan 5:13).
