Para jaʼara ni chiana:

Ixi thjueʼená Ndo Dio ko chujni jiʼi ncheʼe ke duthikauna thi dituana: “Thjira ko nchekueʼenra kainxin chujni ngai kainxin nunthe ko ndacherana sithikauna juajnana, ko nchegitherana” (Mat. 28:19, 20; Mar. 12:28-31). Are denduaxin thjueʼená chujni, jiʼi anto thengijnana, ixi nchao diji asta thi ngai anseen chujni ke rinao sechun ko i se̱ʼan (Hech. 13:48).

Are saʼo tanuinka banthuʼuna para bakanginá inchi presentación ko bakinthuʼená tsje xruun ngai chujni. Aro jai rugunda ke icha jian runichjeená chujni. Tjaguná ke thjueʼená ni icha are nichjeenána de thi jeʼena taxina juachjaun. Jiʼa xrajuʼo xraxaun kainxin chujni, mexinxin chunda ke sithuaxina runichjaná de thi nchexruxiʼin o de thi taxin juachjaun chujni ke tenichjeená. ¡Xrun jiʼi tsengijnaná para nchao sunthuʼuna xrá jiʼi!

Xrun jiʼi dikiaʼo 12 lección ke nichja de 12 cualidad ke kainxiná rugundaana para tsjaguná ke thjueʼená chujni ko sunthukueʼenana. Nanaa lección nichja de thi juincheʼe Jesús o inaa ni cristiano de siglo saʼo ke kjuaguna naa cualidad are níchjana de juajna jian. Jai i chundaʼa ke tsanginá naa presentación para runichjeená chujni, icha jian chunda ke tsjeená kexrein tsjaguná ke thjueʼenána. Maski rugundaana kainxin cualidad ke jitaxin ngai xrun jiʼi para sunthuʼuna xrá de tsjiuʼuná juajna jian, kai segikun ke inchi cualidad icha rugunda are tsexiʼiná runichjeená chujni, are kjan sitsjeʼenána o are utsangikuʼunána de Biblia.

Are sekangi nanaa lección, degariʼi dexraxaun kexrein sekjago cualidad yaa are sekjiuʼo juajna jian ngai chujni ke jii ngai rajnaantha. Icha renthe tsjaguná ke thjueʼená Jehová ko chujni, ko jiʼa juʼo tsanginá kexrein runichjaná. Mexinxin tanuinka dencheʼe ko denchesuji thi dethjueʼena. Jiʼi sekengijna para senchexethja thi dejinao: senchekueʼen chujni.

Naa juajni anto chrjuin ixi tenthukuʼo chuuna xrá (Sof. 3:9). ¡Ke Jehová anto sinchenchaun thi tanuinka dencheʼe para denchexethja xrá jiʼi ko denchekueʼen chujni ixi dethjueʼena!