اپنے سارے دل نال یہوواہ تے بھروسا رکھ تے اپنی سمجھ تے بھروسا نہ کر۔ اپنیاں ساریاں راہواں چ اوہنوں اپنے سامنے رکھ تے اوہ تیریاں راہواں نُوں سدھا کرے گا۔‏‏—‏اَمثال 3:‏5، 6‏، ترجمہ نوِیں دُنیا۔‏

 ‏”‏سارے دل سے خداوند پر توکل کر اور اپنے فہم پر تکیہ نہ کر۔ اپنی سب راہوں میں اُس کو پہچان اور وہ تیری راہنمائی کرے گا۔“‏‏—‏اَمثال 3:‏5، 6‏، اُردو ریوائزڈ ورشن۔‏

 اہم فیصلے لیندے ویلے، سانوں رہنمائی لئی یہوواہ a خدا کولوں مدد منگنی چاہی دی اے نہ کہ اپنی سمجھ تے بھروسا کرنا چاہی دا اے۔‏

 اپنے سارے دل نال یہوواہ تے بھروسا کرو۔‏ یہوواہ دی مرضی مطابق کم کر کے اَسی ظاہر کرنے آں کہ سانوں اوہدے تے بھروسا اے۔ سانوں اپنے پورے دل نال یہوواہ تے بھروسا کرنا چاہی دا اے۔ بائبل چ لفظ دل دا اشارہ اکثر اِک بندے دے جذبات،احساسات، سوچ تے رویے وَل ہوندا اے یعنی ایہہ کہ اوہ اندروں کیہو جیہا انسان اے۔ ایس لئی پورے دل نال یہوواہ تے بھروسا کرن دا تعلق صرف ساڈے جذباتاں نال ای نئیں اے۔ سگوں ایہدا مطلب اے کہ سانوں پورا یقین اے کہ ساڈے خالق نُوں پتہ اے کہ ساڈے لئی کیہہ چنگا اے تے ایس لئی اَسی اوہدی مرضی مطابق چلنا چاہنے آں۔—‏رومیوں 12:‏1‏۔‏

 اپنی سمجھ تے بھروسا نہ کرو۔‏ سانوں اپنے خدا تے بھروسا رکھن دی لوڑ اے کیونکہ اَسی عیب‌دار آں تے اپنی سمجھ تے بھروسا نئیں کر سکدے۔ جے اَسی اپنے جذبات یاں اپنی سمجھ تے بھروسا کراں گے تے شاید اَسی ایہو جہے فیصلے کرئیے جیہڑے شروع چ تے صحی لگن پر بعد چوں اوہناں دے بھیڑے نتیجے نکل سکدے نیں۔ (‏اَمثال 14:‏12؛‏ یرمیاہ 17:‏9‏)‏ خدا دی حکمت ساڈی سوچ توں کتھے زیادہ اُچی اے۔ (‏یسعیاہ 55:‏8، 9‏)‏ جدوں اَسی اوہدی رہنمائی مطابق چلنے آں تے اَسی اپنی زندگی چ کامیاب ہُنے آں۔—‏زبور 1:‏1-‏3؛‏ اَمثال 2:‏6-‏9؛‏ 16:‏20‏۔‏

 اپنیاں ساریاں راہواں چ اوہنوں اپنے سامنے رکھو۔‏ سانوں زندگی دے ہر معاملے بارے تے ہر اہم فیصلہ لین توں پہلاں ایہہ جانن دی کوشش کرنی چاہی دی اے کہ خدا دی ایس بارے کیہہ سوچ اے۔ اِنج کرن لئی اَسی اوہدے کولوں رہنمائی لئی دُعا کرنے آں تے اوہنے اپنے کلام بائبل چ جو کجھ لکھوایا اے اوہدے تے عمل کرنے آں۔—‏زبور 25:‏4؛‏ 2-‏تیمُتھیُس 3:‏16، 17‏۔‏

 اوہ تواڈیاں راہواں نُوں سدھا کرے گا۔‏ خدا ساڈی مدد کردا اے کہ اَسی اوہدے نیک معیاراں مطابق زندگی گزارئیے تے اِنج اوہ ساڈیاں راہواں نُوں سدھا کردا اے۔ (‏اَمثال 11:‏5‏)‏ اِنج اَسی بوہت ساریاں مشکلاں توں بچ جانے آں تے خوشیاں بھری زندگی گزارنے آں۔—‏زبور 19:‏7، 8؛‏ یسعیاہ 48:‏17، 18‏۔‏

 اَمثال دی کتاب چ ایہو جہے بنیادی اصول دَسے گئے نیں جنہاں تے چل کے اَسی ایہو جہی کامیاب زندگی گزار سکنے آں جدے توں خدا خوش ہوندا اے۔ پہلے 9 باب اِنج لکھے گئے نیں جیویں اِک پیو اپنے پیارے پُتر نُوں نصیحت کر رہیا اے۔باب تِن چ اوہناں فائدیاں بارے دَسیا گیا اے جیہڑے اوہناں لوکاں نُوں حاصل ہوندے نیں جیہڑے ساڈے خالق دی حکمت لئی قدر وکھاندے نیں تے ایہدے مطابق چلدے نیں۔—‏اَمثال 3:‏13-‏26‏۔‏