یہوواہ دی وجہ توں بے‌حد خوشی پاؤ تے اوہ تواڈے دل دِیاں مُراداں نُوں پورا کرے گا۔—‏زبور 37:‏4‏، ترجمہ نوِیں دُنیا۔‏

 یہوواہ میں مسرور رہ اور وہ تیرے دل کی مُرادیں پوری کرے گا۔—‏زبور 37:‏4‏، اردو ریوائزڈ ورشن۔‏

 ایس زبور نُوں لکھن والا خدا دے بندیاں دا حوصلہ ودھا رہیا اے کہ اوہ ایس گلوں خوش ہون کہ اوہناں دا خدا نال اِک مضبوط رشتہ اے۔ یہوواہ a خدا دے دوست ایس گل دا یقین رکھ سکدے نیں کہ اوہ اوہناں دِیاں جائز خواہشاں نُوں پورا کرے گا۔‏

 ‏”‏یہوواہ دی وجہ توں بے‌حد خوشی پاؤ۔“‏ ایس اِصطلا‌ح دا ترجمہ اِنج وی کیتا جا سکدا اے کہ ”‏یہوواہ نُوں اپنی سب توں وڈی خوشی بنا“‏، ”‏خدا دی خدمت چ خوشی حاصل کر “‏یاں ”‏خدا دے وعدیاں دی وجہ توں خوش رہ۔“‏ ایہدا مطلب اے کہ سچے خدا دی عبادت کرنا ساڈی سب توں وڈی خوشی ہونی چاہی دی اے۔ (‏زبور 37:‏4‏)‏ پر اَسی اِنج کیوں کہہ سکنے آں؟‏

 بائبل چ دَسیا گیا اے کہ یہوواہ دی عبادت کرن والے لوک معاملیاں نُوں اوہدی نظر نال ویکھدے نیں۔ اوہ خدا نُوں صرف جان دے ای نئیں سگوں ایہہ وی من دے نیں کہ اوہدے حکماں تے چلنا عقل‌مندی دی گل اے۔ ایس وجہ توں اوہناں دا ضمیر صاف رہندا اے تے اوہ نقصان چُکن تے غلط فیصلے کرن توں بچ جاندے نیں۔ (‏امثال 3:‏5، 6‏)‏ مثال لئی، جدوں لالچی تے بے‌ایمان لوک کامیاب ہوندے نیں تے اوہناں نُوں ویکھ کے خدا دے بندے اپنے دل چ غصہ یاں حسد پیدا نئیں ہون دیندے۔ (‏زبور 37:‏1،‏ 7-‏9‏)‏ خدا دے بندے ایس گلوں خوش رہندے نیں کہ بوہت چھیتی خدا ناانصانی نُوں ختم کر دے گا تے وفادار لوکاں نُوں اوہناں دے چنگے کماں دا اجر دَوے گا۔ (‏زبور 37:‏34‏)‏ اوہناں نُوں ایس گل دی وی بڑی خوشی اے کہ اوہناں دا اسمانی باپ اوہناں توں راضی اے۔—‏زبور 5:‏12؛‏ امثال 27:‏11‏۔‏

 ‏”‏اوہ تواڈے دل دِیاں مُراداں نُوں پورا کرے گا۔“‏ ایس جملے دا ترجمہ اِنج وی کیتا جا سکدا اے کہ ”‏اوہ تواڈیاں دُعاواں دا جواب دَوے گا“‏ یاں ”‏اوہ تواڈی خواہش نُوں پورا کرے گا۔“‏ ظاہری گل اے کہ یہوواہ سانوں ہر اوہ شے نئیں دَوے گا جدی اَسی خواہش کرنے آں۔ اِک ماں پیو وانگوں یہوواہ نُوں چنگی طرحاں پتہ اے کہ اوہدے بچیاں لئی کیہہ بہتر اے۔ ایہدے علاوہ جے اَسی چاہنے آں کہ یہوواہ ساڈیاں دُعاواں سنے تے فیر ضروری اے کہ اَسی اپنی زندگی اوہدی مرضی تے اوہدے معیاراں مطابق گزارئیے‏۔ (‏امثال 28:‏9؛‏ یعقوب 4:‏3؛‏ 1-‏یوحنا 5:‏14‏)‏ جے اَسی اِنج کرنے آں تے اَسی یقین رکھ سکنے آں کہ دُعاواں دا سنن والا ساڈی وی ضرور سنے گا۔—‏زبور 65:‏2؛‏ متی 21:‏22‏۔‏

 زبور 37 نُوں بادشاہ داؤد نے لکھیا سی جیہڑا اِسرائیل دا بادشاہ سی۔ اوہنے ایس زبور نُوں عبرانی ہجیاں دی ترتیب دے مطابق لکھیا۔‏ b

 داؤد نُوں بوہت ساریاں نااِنصافیاں سہنیاں پئیاں۔ اوہنوں بادشاہ ساؤل تے ہور دُشمناں کولوں اپنی جان بچان لئی بھجنا پیا۔ (‏2-‏سموئیل 22:‏1‏)‏ پر فیر وی داؤد نے ہمیشاں خدا تے پورا بھروسا رکھیا۔ داؤد نُوں پتہ سی کہ یہوواہ آخرکار بدکاراں نُوں سزا ضرور دَوے گا۔ (‏زبور 37:‏10، 11‏)‏ بھانویں کہ ایہہ لگدا اے کہ بھیڑے لوک ہری گھاہ وانگوں ودھ رہے نیں پر آخرکار اوہ بالکل ختم ہو جان گے۔—‏زبور 37:‏2،‏ 20،‏ 35، 36‏۔‏

 زبور 37 چ دَسیا گیا اے کہ جیہڑے لوک خدا دے معیاراں مطابق چلدے نیں اوہناں دا انجام کیہہ ہوئے گا تے جیہڑے ایہناں معیاراں دے مطابق نئیں چلدے اوہناں دا انجام کیہہ ہوئے گا۔ (‏زبور 37:‏16، 17،‏ 21، 22،‏ 27، 28‏)‏ ایہہ زبور ساڈی مدد کردا اے تاکہ اَسی حکمت حاصل کرئیے تے ایہو جہے انسان بنیے جنہوں خدا پسند کردا اے۔‏

 زبور دی کتاب بارے ہور جانن لئی ایہہ ویڈیو ویکھو۔‏