جی بالکل کر سکدا اے۔ پاک کلام دے ذریعے خدا اوہناں لوکاں نُوں تسلی دیندا اے جیہڑے مایوس ہو جاندے نیں۔ (‏2-‏کُرنتھیوں 7:‏6‏)‏ بھانویں کہ بائبل کوئی ایہو جہی کتاب نئیں جدے چ ذہنی یاں نفسیاتی علاج دَسے گئے ہون، پر ایہدے چ جیہڑے مشورے دِتے گئے نیں اوہناں تے عمل کرن دی وجہ توں کئی لوکاں نُوں خودکُشی کرن دے خیال تے قابو پان چ بڑی مدد ملی اے۔ ایہہ مشورے تواڈی وی مدد کر سکدے نیں۔‏

•  پاک کلام چ کیہڑے عملی مشورے دِتے گئے نیں؟‏

•  کیہہ پاک کلام چ ایہو جہے لوکاں دا ذکر ہے وے جیہڑے مرنا چاہندے سن؟‏

•  کیہڑیاں ایتاں خودکُشی کرن دے خیال نُوں ذہن چوں کڈھن چ مدد کر سکدیاں نیں؟‏

•  جے تواڈا کوئی دوست توانوں کہوے کہ ”‏اوہ مرنا چاہندا اے“‏ تے تُسی کیہہ کر سکدے او؟‏

•  جے تُسی پہلاں کدی خودکُشی کرن دی کوشش کیتی اے تے ہُن تُسی کیس گل دا یقین رکھ سکدے او؟‏

• ● دُوجیاں نُوں دَسو کہ تُسی کیہو جیہا محسوس کر رہے او۔‏

   پاک کلام چ لکھیا اے:‏ اِک سچا دوست ہمیشاں محبت ظاہر کردا اے ۔ اوہ ایہو جہے بھرا ورگا اے جیہڑا مصیبت چ کم آن لئی پیدا ہویا اے۔—‏امثال 17:‏17‏۔‏

   مطلب:‏ سانوں اوس ویلے دُوجیاں دے سہارے دی بڑی ضرورت ہوندی اے جدوں ساڈے ذہن چ ایہو جہے خیال آندے نیں جنہاں دی وجہ توں اَسی پریشان ہو جانے آں۔‏

   جے تُسی اپنے احساس اپنے دل وچ ای رکھو گے تے دُوجیاں نُوں نئیں دَسو گے تے ایہہ تواڈے لئی اِک ایہو جہے بوجھ وانگوں بن جان گے جنہوں چُکنا تواڈے لئی بوہت مشکل ہو جاوے گا۔ پر جے تُسی ایہناں بارے دُوجیاں نال گل کرو گے تے تُسی سکون محسوس کرو گے تے معاملے نُوں اِک فرق طریقے نال ویکھ سکو گے نالے اپنی سوچ نُوں وی صحی رکھ سکو گے۔‏

   ایہہ کرو:‏ اَج ای اپنے گھر دے کسے فرد نال یاں فیر کسے بھروسے مند دوست نال گل کرو۔‏ a تُسی جو کجھ محسوس کر رہے او، تُسی اوہ لکھ کے وی دَس سکدے او۔‏

• ● ڈاکٹر توں مدد لوو۔‏

   پاک کلام چ لکھیا اے:‏ تندرست لوکاں نُوں حکیم دی ضرورت نئیں ہوندی سگوں بیمار لوکاں نُوں ہوندی اے۔—‏متی 9:‏12‏۔‏

   مطلب:‏ جے اَسی بیمار آں تے سانوں ڈاکٹر کول جانا چاہی دا اے۔‏

   خودکُشی دا خیال آنا کسے ذہنی بیماری دی علامت ہو سکدا اے۔ جیویں اَسی جسمانی طور تے بیمار ہنے آں تے فوراً ڈاکٹر کول جانے آں اوسے طرحاں سانوں ذہنی بیماری دی صورت چ وی ڈاکٹر کول جان چ شرم محسوس نئیں کرنی چاہی دی۔ ذہنی تے نفسیاتی بیماریاں دا علاج ہو سکدا اے۔‏

   ایہہ کرو:‏ جِنّی چھیتی ہو سکے کسے چنگے جہے ڈاکٹر کول جاؤ۔‏

• ● یاد رکھو کہ خدا نُوں تواڈی فکر اے۔‏

   پاک کلام چ لکھیا اے:‏ کیہہ پنج چڑیاں صرف دو پیسے چ ای نئیں مِل جاندیاں؟ پر خدا فیر وی اوہناں وچوں ہر اِک نُوں یاد رکھدا اے۔ تُسی تے کئی چڑیاں توں وی زیادہ اہم او۔ خدا نُوں تے ایہہ وی پتہ اے کہ تواڈے سر تے وال کِنّے نیں۔ ایس لئی فکر نہ کرو۔—‏لُوقا 12:‏6، 7‏۔‏

   مطلب:‏ خدا دی نظر چ تُسی بوہت انمول او۔‏

   شاید توانوں لگے کہ کسے نُوں تواڈی فکر نئیں، پر خدا نُوں ہے وے۔ اوہ چنگی طرحاں جان دا اے کہ تُسی کیس تکلیف چوں لنگھ رہے او۔ اوہنوں تواڈی بڑی فکر اے۔ پاک کلام چ لکھیا اے کہ شکستہ دل خدا لئی قربانی اے۔ اَے خدا، تُوں ٹُٹے تے دُکھی دل نُوں کدی وی نئیں ٹھکرائیں گا۔ (‏زبور 51:‏17‏)‏ خدا توانوں بوہت پیار کردا اے ایس لئی اوہ نئیں چاہندا کہ تُسی خودکُشی کرو۔‏

   ایہہ کرو:‏ پاک کلام چوں ایہو جہیاں گلاں تے غور کرو جنہاں توں ثابت ہوندا اے کہ خدا توانوں بوہت پیار کردا اے۔ مثال لئی، مینارِنگہبانی نمبر 3، 2018 نُوں ویکھو جدا موضوع اے ”‏کیا خدا کو آپ کی فکر ہے؟“‏۔ (‏اُردو زبان چ دستیاب اے)‏۔‏

• ● خدا کولوں دُعا کرو۔‏

   پاک کلام چ لکھیا اے:‏ اپنیاں ساریاں پریشانیاں [‏خدا]‏ تے سُٹ دَوو کیونکہ اوہنوں تواڈی فکر اے۔—‏1-‏پطرس 5:‏7‏۔‏

   مطلب:‏ خدا چاہندا اے کہ اَسی کُھل کے اوہنوں اپنیاں پریشانیاں بارے دَسیئے تے اِنج اپنے دل دا بوجھ ہلکا کرئیے۔‏

   خدا سانوں دلی سکون تے مشکلاں دا سامنا کرن دی طاقت دے سکدا اے۔ (‏فِلپّیوں 4:‏6، 7،‏ 13‏)‏ اِنج خدا اوہناں ساریاں لوکاں نُوں سہارا دیندا اے جیہڑے مدد لئی اوہنوں پکار دے نیں۔—‏زبور 55:‏22‏۔‏

   ایہہ کرو:‏ اَج ای خدا کولوں دُعا کرو۔ دُعا چ اوہدا ناں یہوواہ استمال کرو تے کُھل کے اوہنوں دَسو کہ تُسی کیہو جیہا محسوس کر رہے او۔ (‏زبور 83:‏18‏)‏ اوہدے کولوں اِلتجا کرو کہ اوہ تواڈی مدد کرے تاکہ تُسی ہمت نہ ہارو۔‏

• ● پاک کلام چ مستقبل بارے دِتی گئی شان‌دار امید تے سوچ وچار کرو۔‏

   پاک کلام چ لکھیا اے:‏ ایہہ امید ساڈیاں جاناں لئی لنگر وانگوں اے۔ ایہہ مضبوط تے بھروسے‌مند اے تے سانوں پردے دے پار لے جاندی اے۔—‏عبرانیوں 6:‏19‏۔‏

   مطلب:‏ شاید تواڈے جذبات سمندری طوفان چ گِھرے اِک جہاز وانگوں ہون جیہڑا ہچکولے کھاندا اے۔ پر پاک کلام چ دِتی گئی امید توانوں مضبوطی نال قائم رکھے گی۔‏

   ایہہ امید کوئی خواب نئیں سگوں ایہدی بنیاد خدا دا اوہ وعدہ اے جدا ذکر مکاشفہ 21:‏4 چ مِلدا اے کہ خدا ساڈیاں ساریاں تکلیفاں تے مشکلاں نُوں ختم کر دَوے گا۔‏

   ایہہ کرو:‏ پاک کلام چوں مِلن والی امید بارے ہور جانن لئی کتاب خدا وَلّوں خوش‌خبری دے سبق نمبر 5 نُوں پڑھو۔‏

• ● کوئی ایہو جیہا کم کرو جدے توں توانوں خوشی ملے۔‏

   پاک کلام چ لکھیا اے:‏ خوشی نال بھریا دل شفا دیندا اے۔—‏امثال 17:‏22‏۔‏

   مطلب:‏ جدوں اَسی کوئی ایہو جیہا کم کرنے آں جدے توں سانوں خوشی مِلدی اے تے ایہدا ساڈے ذہن تے جذباتاں تے بڑا چنگا اثر پے سکدا اے۔‏

   ایہہ کرو:‏ کوئی ایہو جیہا کم کرو جدے چ توانوں مزہ آئے۔ مثال لئی، ایہو جہی موسیقی سنو جدے توں تواڈا موڈ چنگا ہو جائے، کوئی ایہو جہی کتاب یاں رسالہ پڑھو جدے توں توانوں حوصلہ ملے یاں اپنی پسند دا کوئی ہور کم کرو۔ ایہدے علاوہ دُوجیاں دی مدد کرن نال وی تواڈی خوشی ودھے گی بھانویں تُسی ایہہ چھوٹے موٹے طریقیاں نال ای کیوں نہ کرو۔—‏اعمال 20:‏35‏۔‏

• ● اپنی صحت دا خیال رکھو۔‏

   پاک کلام چ لکھیا اے:‏ جسمانی تربیت کرن دا فائدہ اے۔—‏1-‏تیمُتھیُس 4:‏8‏۔‏

   مطلب:‏ ورزش کرن نال، صحت بخش خوراک کھان نال تے نیند پوری کرن نال صحت چنگی رہندی اے۔‏

   ایہہ کرو:‏ کوشش کرو کہ ہر روز گھٹ و گھٹ 15 منٹ لئی تیز تیز چلو۔ ایہدا تواڈی صحت تے چنگا اثر پوے گا۔‏

• ● یاد رکھو کہ وقت دے نال نال جذبات تے حالات بدل جاندے نیں۔‏

   پاک کلام چ لکھیا اے:‏ پر توانوں نئیں پتہ کہ کل تواڈے نال کیہہ ہوئے گا۔—‏یعقوب 4:‏14‏۔‏

   مطلب:‏ زندگی چ ایہو جہے مسئلے عارضی ہو سکدے نیں جنہاں بارے شاید اَسی سوچئے کہ اوہ کدی حل نئیں ہون گے۔‏

   بھانویں کہ اَج تُسی اپنے آپ نُوں حالات دی وجہ توں ہنیرے چ گِھریا محسوس کرو پر تواڈی زندگی چ روشنی آ سکدی اے۔ ایہدے لئی ضروری اے کہ تُسی حالاتاں دا سامنا کرن دے طریقے لبھو۔ (‏2-‏کُرنتھیوں 4:‏8‏)‏ یاد رکھو کہ جیہڑے مشکل حالاتاں وچوں تُسی ہُن لنگھ رہے او، اوہ اَگے چل کے بدل سکدے نیں پر جے تُسی خودکُشی کر کے اپنی جان گنوا دَوو گے تے اوہ دُبارہ واپس نئیں آ سکدی۔‏

   ایہہ کرو:‏ بائبل چوں کجھ ایہو جہے لوکاں بارے پڑھو جیہڑے اپنے حالات دی وجہ توں اینے مایوس ہو گئے سن کہ مر جانا چاہندے سن۔ نالے ایہدے تے وی غور کرو کہ وقت دے نال نال اوہناں دے حالات کیویں بہتر ہو گئے۔ کجھ نے تے سوچیا وی نئیں سی کہ اوہناں دے حالات ایس طرحاں بدل جان گے۔ آؤ ایہو جہیاں کجھ مثالاں تے غور کرئیے۔‏

 جی ہاں۔ پاک کلام چ ایہو جہے لوکاں بارے دَسیا گیا اے جنہاں نے کہیا کہ اوہ مرنا چاہندے نیں۔ خدا نُوں ایہناں لوکاں تے غصے نئیں آیا سگوں اوہنے اوہناں دی مدد کیتی۔ خدا تواڈی وی مدد کر سکدا اے۔‏

ایلیاہ

•  ● اوہ کون سی؟‏ ایلیاہ اِک دلیر نبی سی۔ پر کدی کدار اوہ وی ہمت ہار جاندا سی۔ یعقوب 5:‏17 چ لکھیا اے کہ ایلیاہ نبی ساڈے ورگا انسان سی تے اوہ ساڈے ورگے جذبات رکھدا سی۔‏

•  ● اوہ کیوں مرنا چاہندا سی؟‏ ایلیاہ دی زندگی چ اِک ایہو جیہا وقت آیا کہ اوہ بوہت ڈر گیا تے اپنے آپ نُوں کلّا محسوس کرن لگ پیا۔ اوہنوں لگ رہیا سی کہ اوہ کسے کم دا نئیں رہیا۔ ایس لئی اوہنے خدا اَگے اِلتجا کیتی کہ اَے خدا میری جان لے لے۔—‏1-‏سلاطین 19:‏4‏۔‏

•  ● پریشانی دا سامنا کرن چ کیس چیز نے اوہدی مدد کیتی؟‏ ایلیاہ نے اپنیاں پریشانیاں خدا نُوں کُھل کے دَسیاں۔ خدا نے اوہدی مدد کیویں کیتی؟اوہنے ایلیاہ لئی فکر ظاہر کیتی تے اوہنوں اپنی طاقت وکھائی۔ ایہدے علاوہ خدا نے ایلیاہ نُوں یقین دَوایا کہ اوہ اوہدے لئی کِنّاں اہم اے۔ خدا نے اوہنوں اِک ہمدرد تے قابلِ‌بھروسا دوست وی دِتا۔‏

•  ◂ ایلیاہ بارے پڑھو:‏ 1-‏سلاطین 19:‏2-‏18‏۔‏

ایوب

•  ● اوہ کون سی؟‏ ایوب اِک امیر تے راستباز بندہ سی۔ جیہڑا پورے دل نال سچے خدا دی عبادت کر دا سی۔‏

•  ● اوہ کیوں مرنا چاہندا سی؟‏ ایوب دی زندگی چ اچانک اِک توں بعد اِک مصیبتاں آن لگ پئیاں جیویں کہ اوہدا سارا مال‌ودولت لٹیا گیا، اوہدے سارے بچے اِک آفت چ مارے گئے تے اوہنوں آپ وی اِک بوہت ای دردناک بیماری لگ گئی۔ صرف ایناں ای نئیں سگوں اوہدے دوستاں نے اوہدے اُتے اِلزام لائے کہ اوہ اپنیاں مصیبتاں دا ذمے‌دار آپ اے۔ ایوب ایس قدر تکلیف چ سی کہ اوہنے کہیا کہ مینوں اپنی جان توں نفرت اے۔ میں زندہ نئیں رہنا چاہندا۔—‏ایوب 7:‏16‏۔‏

•  ● پریشانی دا سامنا کرن چ کیس چیز نے اوہدی مدد کیتی؟‏ ایوب نے خدا توں دُعا کیتی تے نالے اوہنے دُوجیاں نُوں دَسیا کہ اوہ کیہو جیہا محسوس کر رہیا اے۔ (‏ایوب 10:‏1-‏3‏)‏ ایوب دے اِک سچے دوست اِلیہو نے اوہدے لئی ہمدردی وکھائی تے اوہدا حوصلہ ودھایا۔ اوہنے ایوب دی مدد کیتی تاکہ اوہ اپنے حالات نُوں فرق نظریے نال ویکھے۔ نالے ایوب نے خدا وَلّوں مِلن والی مدد تے اِصلاح نُوں خوشی نال قبول کیتا۔‏

•  ◂ ایوب بارے پڑھو:‏ ایوب 1:‏1-‏3،‏ 13-‏22؛‏ 2:‏7؛‏ 3:‏1-‏13؛‏ 36:‏1-‏7؛‏ 38:‏1-‏3؛‏ 42:‏1، 2،‏ 10-‏13‏۔‏

موسیٰ

•  ● اوہ کون سی؟‏ موسیٰ خدا دا اِک وفادار نبی سی۔ نالے اوہ بنی اِسرائیل دا رہنما سی۔‏

•  ● اوہ کیوں مرنا چاہندا سی؟‏ موسیٰ اُتے بوہت وڈیاں ذمے‌داریاں سن۔ نالے لوک وی اوہدے تے بُڑبُڑاندے رہندے سن۔ ایہناں گلاں توں اوہ بوہت ای تنگ آ گیا سی۔ ایس لئی اوہنے خدا نُوں کہیا کہ توں مینوں ہنے ای مار دے۔—‏گنتی 11:‏11،‏ 15‏۔‏

•  ● پریشانی دا سامنا کرن چ کیس چیز نے اوہدی مدد کیتی؟‏ موسیٰ نے خدا نُوں کُھل کے دَسیا کہ اوہ اپنیاں ذمے‌داریاں بارے کیہو جیہا محسوس کر رہیا سی۔ سو خدا نے اوہدی مدد کیتی تے اوہدیاں ذمے‌داریاں گھٹ کیتیاں تاکہ اوہدی پریشانی وی گھٹ ہو جائے۔

•  ◂ موسیٰ بارے پڑھو:‏ گنتی 11:‏4-‏6،‏ 10-‏17‏۔‏