لوک اکثر زندگی بارے فرق فرق سوال پچھدے نیں جیویں کہ اَسی دُنیا تے کیوں آئے آں؟ یاں ساڈی زندگی دا مقصد کیہہ اے؟ بائبل چوں پتہ چلدا اے کہ ساڈی زندگی دا مقصد ایہہ وے کہ اَسی خدا نُوں جانیے تے اوہدے نال دوستی کریئے۔ ذرا ایس بارے بائبل دِیاں کجھ سچائیاں تے غور کرو:‏

•   خدا ساڈا خالق اے۔ بائبل چ دَسیا گیا اے کہ خدا نے سانوں بنایا اے۔—‏زبور 100:‏3؛‏ مکاشفہ 4:‏11‏۔‏

•   خدا نے ایس کائنات دی ہر چیز نُوں کسے نہ کسے مقصد لئی بنایا اے۔ سانوں بنان دا وی اوہدا اِک مقصد اے۔—‏یسعیاہ 45:‏18‏۔‏

•   خدا نے سانوں ایس طرحاں بنایا اے کہ سانوں اوہدی رہنمائی دی ضرورت محسوس ہووے۔ ایہدے چ ایہہ گل وی شامل اے کہ اَسی زندگی دے مقصد نُوں جانن دی خواہش رکھئے۔ (‏متی 5:‏3‏)‏ خدا چاہندا اے کہ اَسی اوہدے نیڑے جائیے۔—‏زبور 145:‏16‏۔‏

•   اپنی زندگی دے مقصد نُوں جانن دی ایہہ خواہش اوہدوں ای پوری ہوئے گی جدوں اَسی خدا نُوں جاناں گے تے اوہدے نال دوستی کراں گے۔ پر شاید تواڈے ذہن چ سوال آئے کہ خدا نال دوستی کرنا کیویں ممکن اے؟ بائبل سانوں حوصلہ دیندی اے کہ خدا دے نیڑے جاؤ تے اوہ تواڈے نیڑے آئے گا۔—‏یعقوب 4:‏8؛‏ 2:‏23‏۔‏

•   خدا دے دوست بنن لئی سانوں اپنی زندگی اوس مقصد دے مطابق گزارنی چاہی دی اے جدے لئی اوہنے سانوں بنایا اے۔ بائبل دَسدی اے کہ سانوں خدا دا گُوڑھا احترام کرنا چاہی دا اے تے اوہدے حکماں نُوں مننا چاہی دا اے۔ ایہی ساڈی زندگی دا مقصد اے۔—‏واعظ 12:‏13

•   مستقبل چ ساڈی زندگی بالکل اوہو جہی ہوئے گی جیہو جہی خدا شروع چ چاہندا سی۔ اوہدوں اوہ ہر طرحاں دے دُکھ تکلیف نُوں ختم کر دے گا تے اوہناں لوکاں نُوں ہمیشاں دی زندگی دے گا جیہڑے اوہدے دوست نیں تے اوہدی عبادت کردے نیں۔—‏زبور 37:‏10، 11‏۔‏