خدا اوہناں قدرتی آفتاں دا ذمے‌دار نئیں اے جیہڑیاں اَج کل آ رہیاں نیں۔ پر اوہ اوہناں لوکاں دی فکر ضرور کردا اے جیہڑے ایہناں آفتاں دا شکار ہوندے نیں۔ خدا دی بادشاہی اوہناں ساریاں چیزاں نُوں ختم کر دَوے گی جنہاں دی وجہ توں انساناں نُوں تکلیف چُکنی پیندی اے۔ ایہدا مطلب اے کہ اوہ قدرتی آفتاں نُوں وی ختم کر دے گا۔ پر جدوں تک اِنج نئیں ہوندا، خدا اوہناں لوکاں نُوں تسلی دیندا رہوے گا جنہاں نُوں قدرتی آفتاں دا سامنا کرنا پیندا اے۔—‏2-‏کُرنتھیوں 1:‏3‏۔‏

•  اَسی کیوں یقین رکھ سکنے آں کہ قدرتی آفتاں خدا وَلّوں سزا نئیں ہوندیاں؟‏

•  کیہہ قدرتی آفتاں ایس گل دی نشانی اے کہ اَسی آخری زمانے چ رہ رہے آں؟‏

•  خدا قدرتی آفتاں دا شکار ہون والے لوکاں دی مدد کیویں کردا اے؟‏

•  کیہہ پاک کلام دے اصول قدرتی آفتاں لئی پہلاں توں تیار رہن چ ساڈی مدد کر سکدے نیں؟‏

•  قدرتی آفتاں دا شکار ہون والے لوکاں نُوں تسلی دین لئی پاک کلام دِیاں ایتاں

 بائبل توں پتہ چلدا اے کہ خدا نے لوکاں نُوں سزا دین لئی قدرتی طاقتاں نُوں استمال کیتا۔ پر جیس طریقے نال اوہنے ایہناں نُوں استمال کیتا، اوہدے چ تے قدرتی آفتاں نال ہون والی تباہی چ بوہت فرق اے۔‏

•   قدرتی آفتاں ہر طرحاں دے لوکاں نُوں ہلاک کردیاں تے نقصان پونچاندیاں نیں۔‏ ایہدے بجائے جدوں خدا نے لوکاں نُوں سزا دین لئی قدرتی طاقتاں نُوں استمال کیتا تے اوہنے صرف بھیڑے لوکاں نُوں ختم کیتا۔ مثال لئی، جدوں خدا نے سدوم تے عمورہ دے بھیڑے لوکاں نُوں تباہ کیتا تے اوہنے اپنے بندے لُوط تے اوہدیاں دو دِھیاں نُوں بچا لیا۔ (‏پیدائش 19:‏29، 30‏)‏ خدا نے اوس زمانے دے لوکاں دے دلاں نُوں پڑھ لیا تے صرف اوہناں لوکاں نُوں ختم کیتا جیہڑے بھیڑے کم کردے سن۔—‏پیدائش 18:‏23-‏32؛‏ 1-‏سموئیل 16:‏7‏۔‏

•   قدرتی آفتاں کدی وی دَس کے نئیں آندیاں۔‏ پر بائبل توں پتہ چلدا اے کہ خدا نے بھیڑے لوکاں نُوں قدرتی طاقتاں دے ذریعے تباہ کرن توں پہلاں اوہناں نُوں آگاہی دِتی۔ جیہڑے لوکاں نے ایہناں آگاہیاں تے دھیان دِتا، اوہناں نُوں تباہی توں بچن دا موقع مِل گیا۔—‏پیدائش 7:‏1-‏5؛‏ متی 24:‏38، 39‏۔‏

•   کسے حد تک انسان وی قدرتی آفتاں دے ذمے‌دار نیں۔‏ پر کیویں؟ انسان قدرتی ماحول نُوں خراب کر رہے نیں تے ایہو جہے علاقیاں چ عمارتاں بنا رہے نیں جتھے زلزلے تے سیلاب آن دا خطرہ ہوندا اے تے موسم وی بوہت خراب رہندا اے۔ (‏مُکاشفہ 11:‏18‏)‏ انساناں دے ایہو جہے کماں دا ذمے‌دار خدا نئیں اے۔—‏اَمثال 19:‏3‏۔‏

 جی بالکل، بائبل دِیاں پیش‌گوئیاں توں پتہ چلدا اے کہ ”‏دُنیا دے آخری زمانے‏“‏ چ قدرتی آفتاں آن گیاں۔ (‏متی 24:‏3؛‏ 2-‏تیمُتھیُس 3:‏1‏)‏ مثال دے طور تے ساڈے زمانے بارے گل کردے ہوئیاں یسوع نے کہیا:‏ ”‏تھاں تھاں کال پین گے تے زلزلے آن گے۔“‏ (‏متی 24:‏7‏)‏ بوہت چھیتی خدا زمین توں اوہناں ساریاں چیزاں نُوں ختم کر دَوے گا جنہاں دی وجہ توں سانوں دُکھ تے تکلیف سہنی پیندی اے یعنی اوہ قدرتی آفتاں نُوں وی ختم کر دَوے گا۔—‏مُکاشفہ 21:‏3، 4‏۔‏

•   خدا پا ک کلام دے ذریعے آفت دا شکار ہون والیاں نُوں تسلی دیندا اے۔‏ پاک کلام چ سانوں یقین دَوایا گیا اے کہ خدا نُوں ساڈی فکر اے تے جدوں اَسی تکلیفاں دا سامنا کرنے آں تے اوہ دُکھی ہوندا اے۔ (‏یسعیاہ 63:‏9؛‏ 1-‏پطرس 5:‏6، 7‏)‏ خدا نے وعدہ کیتا اے کہ اِک ایہو جیہا ویلا آئے گا جدوں قدرتی آفتاں دا ناں نشان مٹ جائے گا۔—‏بکس ”‏ قدرتی آفتاں دا شکار ہون والے لوکاں نُوں تسلی دین لئی پاک کلام دِیاں ایتاں‏“‏ نُوں ویکھو۔‏

•   خدا اپنے بندیاں دے ذریعے آفت دا شکار ہون والیاں دی مدد کردا اے۔‏ خدا چاہندا اے کہ اوہدے بندے یسوع دی مثال تے عمل کرن۔ یسوع مسیح بارے ایہہ پیشین‌گوئی کیتی گئی سی کہ اوہ ٹُٹے دل والیاں نُوں تے غم دے مارے لوکاں نُوں تسلی دَوے گا۔ (‏یسعیاہ 61:‏1، 2‏)‏ خدا دے بندے وی ایسے طرحاں کرن دی کوشش کردے نیں۔—‏یوحنا 13:‏15‏۔‏

   خدا اپنے بندیاں دے ذریعے آفت دا شکار ہون والے لوکاں دِیاں لوڑاں نُوں وی پورا کردا اے۔—‏اعمال 11:‏28-‏30؛‏ گلتیوں 6:‏10‏۔‏

 جی بالکل۔ بھانویں کہ بائبل ایس لئی نئیں لکھی گئی سی کہ ایہہ قدرتی آفتاں لئی پہلاں توں تیاری کرن چ ساڈی رہنمائی کرے پر ایہدے چ ایہو جہے اصول دِتے گئے نیں جیہڑے ساڈی مدد کر سکدے نیں۔ ایہناں وچوں کجھ اصول ایہہ نیں:‏

•   پہلاں توں منصوبہ بناؤ کہ جے کوئی قدرتی آفت آئے تے تُسی کیہہ کرو گے۔‏ بائبل چ لکھیا اے کہ سمجھدار بندہ خطرے نُوں ویکھ کے لُک جاندا اے۔ (‏اَمثال 22:‏3‏)‏ کسے آفت دے آن توں پہلاں ای ایہدے لئی تیاری کرنا سمجھداری دی گل اے۔ تیاری کرن چ ایہہ شامل اے کہ اَسی اِک ایمرجنسی بیگ تیار کریئے تاکہ جے کوئی قدرتی آفت آئے تے اَسی فوراً اوتھوں بھج سکئے۔ نالے اپنے گھر والیاں نال مِل کے پہلاں توں ای ایہہ سوچو کہ جے کوئی آفت آئے گی تے تُسی اِک دُوجے نُوں کتھے ملوِ گے۔‏

•   چیزاں نالوں زیادہ زندگی نُوں قیمتی سمجھو۔‏ بائبل چ دَسیا گیا اے کہ اَسی خالی ہتھ دُنیا چ آئے آں تے خالی ہتھ ای واپس جانواں گے۔ (‏1-‏تیمُتھیُس 6:‏7، 8‏)‏ آفت توں بچن لئی سانوں اپنے گھر تے چیزاں نُوں چھڈن لئی تیار رہنا چاہی دا اے۔ سانوں ایہہ گل ہمیشاں یاد رکھنی چاہی دی اے کہ ساڈی زندگی چیزاں نالوں بوہتی اہم اے۔—‏متی 6:‏25‏۔‏