جی ہاں۔ خدا نُوں اپنے بندیاں دی فکر اے۔ پاک کلام چ دَسیا گیا اے کہ خدا اپنے وفادار بندے نُوں اوہدی بیماری دے بسترے تے سنبھالدا اے۔ (‏زبور 41:‏3‏)‏ جے تُسی کافی لمے عرصے توں بیمار او تے تھلے دَسے گئے تِن کم کرن نال تُسی ایس بیماری دا سامنا کرن دے قابل ہو سکدے او:‏

1.   خدا کولوں دُعا کرو کہ اوہ توانوں ہمت تے طاقت دَوے۔‏ جے تُسی خدا کولوں دُعا کرو گے تے اوہ توانوں ایہو جیہا اطمینان دَوے گا جیہڑا سمجھ توں باہر اے۔ ایس اطمینان دی وجہ توں تُسی بوہتے پریشان نئیں ہووو گے تے اوکھے ویلے چ ثابت‌قدم رہ سکو گے۔—‏فِلپّیوں 4:‏6، 7‏۔‏

2.   اپنی سوچ صحی رکھو۔‏ پاک کلام چ لکھیا اے کہ خوشی نال بھریا دل شفا دیندا اے پر دُکھی دل ہڈیاں نُوں سُکا دیندا اے۔ (‏امثال 17:‏22‏)‏ ایس لئی ہاسا مذاق کرنا سکھو کیونکہ ایہدے نال تُسی نہ صرف مایوسی چوں نکل سکو گے سگوں تواڈی صحت تے وی چنگا اثر پوے گا۔‏

3.   چنگے مستقبل دی امید رکھو۔‏ کسے چنگی گل دی امید رکھن نال تُسی لمے عرصے توں بیمار ہون دے باوجود وی خوش رہ سکو گے۔ (‏رومیوں 12:‏12‏)‏ پاک کلام چ اِک ایہو جہے وقت بارے دَسیا گیا اے جدوں کوئی وی نئیں کہوے گا کہ میں بیمار آں۔ (‏یسعیاہ 33:‏24‏)‏ اوس ویلے خدا لوکاں نُوں اوہناں ساریاں بیماریاں توں شفا دَوے گا جنہاں دا علاج اَج وڈے وڈے ڈاکٹر وی نئیں کر سکدے۔ مثال لئی پاک کلام چ دَسیا گیا اے کہ بُڈھے لوک فیر توں جوان تے صحت‌مند ہو جان گے۔ ایوب 33:‏25 چ دَسیا گیا اے کہ اوہدوں اِک وڈیرے بندے دا جسم بچے دے جسم نالوں وی تازہ ہو جائے گا تے اوہدی جوانی دے دن واپس آ جان گے۔‏

 نوٹ:‏ بھانویں کہ یہوواہ دے گواہ جان دے نیں کہ خدا بیماریاں نال نبڑن چ اوہناں دی مدد کردا اے پر فیر وی اوہ وڈیاں بیماریاں دا علاج کراندے نیں۔ (‏مرقس 2:‏17‏)‏ پر اَسی کسے نُوں کوئی خاص علاج کران بارے مشورے نئیں دیندے۔ ہر بندے نُوں اپنی صحت تے علاج بارے آپ فیصلہ کرنا چاہی دا اے۔‏