وڈیرے ماں پیو دی دیکھ‌بھال کرن دی ذمے‌داری بچیاں دی اے۔ پاک کلام چ بچیاں نُوں نصیحت کیتی گئی اے کہ اوہ اپنے ماں پیو دی دیکھ‌بھال کرن کیونکہ ایہہ خدا نُوں پسند اے۔ (‏1-‏تیمُتھیُس 5:‏4‏)‏ جدوں بچے اپنے وڈیرے ماں پیو دی چنگی طرحاں دیکھ‌بھال کر دے نیں تے اوہ پاک کلام دے ایس اصول تے عمل کر رہے ہوندے نیں کہ اپنے ماں پیو دی عزت کرو۔—‏اِفسیوں 6:‏2، 3‏۔‏

 پاک کلام چ ایہہ تے نئیں دَسیا گیا کہ سانوں اپنے وڈیرے ماں پیو دی دیکھ‌بھال کیہڑے کیہڑے طریقیاں نال کرنی چاہی دی اے۔ پر ایہدے چ ایہو جہے لوکاں دِیاں مثالاں ضرور مِلدیاں نیں جنہاں نے اپنے وڈے ڈیریاں دی دیکھ‌بھال بڑی چنگی طرحاں کیتی سی۔ ایہدے چ ایہو جہے اصول وی دِتے گئے نیں جیہڑے اوہناں لوکاں دے کم آ سکدے نیں جیہڑے اپنے وڈیرے ماں پیو دی دیکھ‌بھال کردے نیں۔‏

•  پرانے زمانے چ خدا دے کجھ بندیاں نے اپنے وڈے وڈیریاں دی دیکھ‌بھال کیویں کیتی؟‏

•  پاک کلام چ دِتے کیہڑے اصول اوہناں لوکاں دے کم آ سکدے نیں جیہڑے اپنے وڈیرے ماں پیو دی دیکھ بھال کر دے نیں؟‏

•  کیہہ پاک کلام چ وڈیرے ماں پیو دی دیکھ بھال کرن دا کوئی خاص طریقہ دَسیا گیا اے؟‏

 اوہناں نے اپنے حالات دے مطابق فرق فرق طریقیاں نال اِنج کیتا۔‏

•   یوسف جِتھے رہندا سی اوہ علاقہ اوتھوں کافی دُور سی جِتھے اوہدا وڈیرا پیو رہندا سی۔ جدوں یوسف دے حالات بہتر ہو گئے تے اوہنے اپنے پیو نُوں اپنے نیڑے دے علاقے چ رہن لئی بلا لیا۔ اوتھے اوہنے اپنے پیو لئی گھر دا بندوبست کیتا، اوہدے کھان پین تے اوہدیاں دُوجیاں ضرورتاں دا وی پورا خیال رکھیا۔—‏پیدایش 45:‏9-‏11؛‏ 47:‏11، 12‏۔‏

•   رُوت اپنی سس دے نال اوہدے ملک چ چلی گئی۔ اوہنے اپنی سس دی دیکھ‌بھال کرن تے اوہدیاں ضرورتاں پوریاں کرن لئی بڑی محنت کیتی۔—‏رُوت 1:‏16؛‏ 2:‏2،‏ 17، 18،‏ 23‏۔‏

•   یسوع مسیح نے اپنی موت توں کجھ دیر پہلاں اپنی بیوہ ماں دی دیکھ‌بھال کرن دی ذمے‌داری اپنے اِک شاگرد نُوں دِتی۔—‏یوحنا 19:‏26، 27‏۔‏ a

 جیہڑے لوک اپنے وڈیرے ماں پیو دی دیکھ‌بھال کردے نیں اوہ کدی کدی جسمانی تے جذباتی لحاظ نال بڑا تھک جاندے نیں۔ پاک کلام چ دِتے گئے اصول ایہناں لوکاں دے بڑے کم آ سکدے نیں۔‏

•   اپنے ماں پیو دی عزت کرو:‏

   پاک کلام دا اصول:‏ تُوں اپنے پیو تے اپنی ماں دی عزت کرِیں۔—‏خروج 20:‏21‏۔‏

   ایس اصل تے کیویں عمل کیتا جا سکدا اے؟‏ اپنے ماں پیو نُوں اوہناں دے حالاتاں دے مطابق اوہ کرن دَوو جو اوہ کرنا چاہندے نیں،اِنج تُسی اوہناں لئی عزت ظاہر کرو گے۔ جے ممکن اے تے اوہناں نُوں ایہہ فیصلہ کرن دَوو کہ اوہناں دی دیکھ‌بھال کیویں کیتی جائے گی۔ ایہدے نال نال تُسی اوہناں دی مدد کرن لئی جو وی کر سکدے اوہ ضرور کرو، ایس طرحاں وی تُسی اوہناں لئی عزت ظاہر کر رہے ہووو گے۔‏

•   اپنے ماں پیو نُوں سمجھو تے اوہناں نُوں معاف کرو:‏

   پاک کلام دا اصول:‏ آدمی دی ڈونگی سمجھ اوہدے غصے نُوں ٹھنڈا کر دی اے تے غلطی نُوں معاف کرن چ اوہدی شان اے۔—‏امثال 19:‏11‏۔‏

   ایس اصول تے کیویں عمل کیتا جا سکدا اے؟‏ جے تواڈے وڈیرے ماں پیو توانوں کوئی ایہو جہی گل کہہ دین جدے توں تواڈا دل دُکھے یاں توانوں ایہہ لگے کہ اوہناں نے تواڈی خدمت دی کوئی قدر نئیں کیتی تے اپنے آپ کولوں پچھو:‏ ”‏جے میں اوہناں ورگے مسٔلیاں چوں لنگھ رہیا ہوندا تے مینوں کیہو جیہا لگدا؟“‏ جے تُسی اپنے ماں پیو دے حالاتاں نُوں سمجھو گے تے اوہناں نُوں معاف کرو گے تے اِنج تُسی معاملیاں نُوں وِگڑن توں بچا سکو گے۔‏

•   دُوجیاں نال مشورہ کرو:‏

   پاک کلام دا اصول:‏ جے صلاح نہ ملے تے ارادے پورے نئیں ہوندے۔ پر جے صلاح دین والے بوہتے ہون تے کامیابی مِلدی اے۔—‏امثال 15:‏22‏۔‏

   ایس اصول تے کیویں عمل کیتا جا سکدا اے؟‏ ایس گل بارے جانن دی کوشش کرو کہ تواڈے ماں پیو نُوں صحت دے جیہڑے مسٔلیاں دا سامنا اے اوہناں چ مریض دی دیکھ‌بھال کیویں کیتی جا سکدی اے۔ ویکھو کہ تواڈے علاقے چ ایہو جہے مریضاں دی دیکھ‌بھال کرن لئی کیہڑیاں کیہڑیاں سہولتاں موجود نیں ۔ ایہو جہے لوکاں نال مشورہ کرو جنہاں نے اپنے وڈیرے ماں پیو دی دیکھ‌بھال کیتی اے۔ جے تواڈے ہور وی بھین بھرا ہے نیں تے اوہناں نال مِل کے ایس بارے گل بات کرو کہ تواڈے ماں پیو دِیاں ضرورتاں کیہہ نیں، ایہناں ضرورتاں نُوں کیویں پورا کیتا جا سکدا اے تے ایہناں ذمے‌داریاں نُوں پورا کرن لئی تُسی ذمے‌داریاں نُوں آپس چ کیویں وَنڈ سکدے او۔‏

•   خاکسار بنو:‏

   پاک کلام دا اصول:‏ خاکسار بندہ سمجھ‌داری نال کم لیندا اے۔—‏امثال 11:‏2‏۔‏

   ایس اصول تے کیویں عمل کیتا جا سکدا اے؟‏ ایس گل نُوں سمجھو کہ تُسی سارا کجھ نئیں کر سکدے۔ مثال لئی، ساڈے وچوں ہر اِک کول وقت تے طاقت اِک حد تک ای ہوندی اے۔ ایس لئی اَسی اپنے ماں پیو لئی اوناں نئیں کر سکدے جِنّاں اَسی کرنا چاہنے آں۔ جے توانوں لگدا اے کہ اپنے وڈیرے ماں پیو دی دیکھ‌بھال کر ن دی وجہ توں تُسی بوہت زیادہ تھک گئے او تے تُسی اپنے گھر دے دُوجے جیاں کولوں مدد لے سکدے او یاں کسے ایہو جہے بندے نُوں ایس کم لئی رکھ سکدے او جیہڑا مریضاں دی دیکھ‌بھال کر سکدا اے۔‏

•   اپنا خیال رکھو:‏

   پاک کلام دا اصول:‏ کوئی وی بندہ اپنے جسم توں نفرت نئیں کردا سگوں اوہنوں پیار کردا اے تے اوہنوں کھواندا پیاندا اے۔—‏اِفسیوں 5:‏29‏۔‏

   ایس اصول تے کیویں عمل کیتا جا سکدا اے؟‏ بھانویں کہ اپنے وڈیرے ماں پیو دی دیکھ‌بھال کرنا تواڈی ذمے‌داری اے پر ایہدے نال نال توانوں اپنی تے اپنے گھرانے دِیاں ضرورتاں دا وی خیال رکھنا چاہی دا اے۔ خاص کر کے جے تُسی شادی‌شُدہ او۔ توانوں اپنی صحت دا خیال رکھن، چنگی طرحاں آرام کرن تے اپنی نیندر پوری کرن دی وی ضرورت اے۔ (‏واعظ 4:‏6‏)‏ توانوں دیکھ‌بھال کرن دے کم توں کدی کدی وقفہ وی لینا چاہی دا اے۔ جے تُسی اِنج کرو گے تے تُسی ذہنی ،جذباتی تے جسمانی طور تے نئیں تھکو گے۔ سگوں اِنج تُسی اپنے ماں پیو دی ہور چنگی طرحاں دیکھ‌بھال کر سکو گے۔‏

 پاک کلام چ وڈیرے ماں پیو د دی دیکھ‌بھال کرن دا کوئی خاص طریقہ نئیں دَسیا گیا۔ بعض گھرانیاں چ جتھوں تک ممکن ہووے بچے آپ اپنے ماں پیو دی دیکھ‌بھال کردے نیں۔ پر کدی کدار صورتحال ایہو جہی ہو جاندی اے کہ اوہناں نُوں اپنے ماں پیو دی دیکھ‌بھال کرن لئی کسے ایہو جے بندے نُوں رکھنا پیندا اے جیہڑا مریضاں دی دیکھ‌بھال کرنا جان دا ہوئے۔ ایس صورت چ سارے گھر والیاں نُوں مِل کے گل بات کرنی چاہی دی اے تاکہ ایہو جیہا فیصلہ کیتا جا سکے جیہڑا ساریاں لئی بہتر ہوئے۔—‏گلتیوں 6:‏4، 5‏۔‏