پاک کلام چ بچہ ضائع کران دا ذکر واضح طور تے نئیں مِلدا پر بوہت ساریاں ایتاں توں پتہ چلدا اے کہ خدا انساناں دی زندگی نُوں ایتھوں تک کہ اِک ماں دے پیٹ چ پل رہے بچے دی زندگی نُوں وی کیہو جیہا خیال کردا اے۔‏

 زندگی خدا وَلّوں اِک نعمت اے۔ (‏پیدائش 9:‏6؛‏ زبور 36:‏9‏)‏ خدا دی نظر چ سارے جاندارں دی زندگی بوہت ای قیمتی اے، اِک ایہو جہے بچے دی زندگی وی جیہڑا حالے اپنی ماں دے پیٹ چ پل رہیا اے۔ ایس لئی جان بوجھ کے بچہ ضائع کرانا قتل کرن دے برابر اے۔‏

 خدا نے بنی‌اِسرائیل نُوں حکم دِتا سی کہ جے کجھ بندے آپس چ لڑائی کر رہے ہون تے ایس دوران ماں بنن والی کسے عورت نُوں سٹ لگ جائے تے اوہدا بچہ پیدا ہو جائے پر کوئی جانی نقصان نہ ہوئے تے اوہ بندہ جنہے چوٹ پونچائی اے اوناں ای جرمانہ بھر دَوے جناں اوس عورت دا شوہر کہوے تے ایہہ جرمانہ اوہ قاضیاں دے ذریعے بھرے۔ پر جے جانی نقصان ہو جائے تے تُوں جان دے بدلے جان لوَیں۔—‏خروج 21 :‏22 ،23‏۔‏ a

•  اِک انسان دی زندگی کدوں شروع ہوندی اے؟‏

•  کیہہ خدا اوس انسان نُوں معاف کرے گا جنہے بچہ ضائع کرایا ہووے؟‏

•  کیہہ اوہدوں وی بچہ ضائع کرانا غلط اے جدوں ماں یاں بچے وچوں کسے اِک دی زندگی خطرے چ ہووے؟‏

 خدا دی نظر چ اِک انسان دی زندگی اوسے ویلے شروع ہو جاندی اے جدوں حمل ٹھہر دا اے۔ آؤ پاک کلام چوں کجھ ایہو جہیاں ایتاں تے غور کرئیے جنہاں توں ظاہر ہوندا اے کہ خدا دی نظر چ ماں دے پیٹ چ پلن والے بچے دی زندگی اونی ای اہم اے جِنّی کہ اوس بچے دی جیہڑا پیدا ہو چُکیا اے۔‏

•   خدا دی پاک رُوح دی ہدیت نال داؤد نبی نے لکھیا کہ تیریاں اَکھاں نے مینوں اوہدوں وی ویکھیا جدوں میں اپنی ماں دے پیٹ چ ساں۔ (‏زبور 139:‏16‏)‏ ایہدے توں پتہ چلدا اے کہ خدا دی نظر چ داؤد اوہدوں وی اِک مکمل انسان سی جدوں اوہ حالے پیدا وی نئیں ہویا سی۔‏

•   ایہدے علاوہ خدا نے یرمیاہ نبی دی پیدائش توں پہلاں ای ایہہ فیصلہ کر لیا سی کہ اوہ اوہنوں اِک خاص کم لئی استمال کرے گا۔ ایس لئی اوہنے یرمیاہ نُوں کہیا کہ تینوں تیری ماں دے پیٹ چ خلق کرن توں پہلاں ای میں تینوں جاننا ساں تے تیرے پیدا ہون توں پہلاں ای میں تینوں مخصوص کیتا تے قوماں لئی نبی ٹھہرایا۔—‏یرمیاہ 1:‏5‏۔‏

•   یسوع دے شاگرد لُوقا نے جیہڑا اِک ڈاکٹر سی، اِک ماں دے پیٹ چ پلن والے بچے لئی اوہی یونانی لفظ استمال کیتا جیہڑا اوہنے اوس بچے لئی استمال کیتا سی جیہڑا پیدا ہو چُکیا سی۔—‏لُوقا 1:‏41؛‏ 2:‏12،‏ 16‏۔‏

 خدا اوہناں لوکاں نُوں معاف کر سکدا اے جنہاں نے کدی بچہ ضائع کرایا سی۔ جے ایہو جہے لوک زندگی بارے خدا دی سوچ اپنا لین تے اوہناں نُوں پچھتاوے دے بوجھ تھلے دبے رہن دی لوڑ نئیں۔ زبور 103:‏8-‏12 ایتاں چ لکھیا اے کہ یہوواہ b خدا بڑا رحیم تے کریم اے تے جیویں پورب پچھم توں دُور اے اُنج ای اوہ ساڈے گناہواں نُوں ساڈے توں دُور کر دیندا اے۔ ایس لئی یہوواہ خدا اوہناں سارے لوکاں نُوں معاف کرن لئی تیار اے جیہڑے اپنے گناہواں توں دلوں توبہ کردے نیں۔ جنہاں چ بچہ ضائع کران دا گناہ وی شامل اے۔—‏زبور 86:‏5‏۔‏

 پاک کلام چ ماں دے پیٹ چ پلن والے بچے دی زندگی بارے جو کجھ وی دَسیا گیا اے اوہدے توں ظاہر ہوندا اے کہ ایس گل نُوں وجہ بنا کے بچہ ضائع کرانا غلط اے کہ بچے چ پیدا ہون توں بعد نُقص ہون گے یاں حمل دی وجہ توں ماں نُوں کوئی خطرہ ہو سکدا اے۔‏

 پر کدی کدار شاید بچے دی پیدائش دے وقت ماں یاں بچے چوں کسے اِک نُوں بچان دا فیصلہ کرنا پوے۔ ایس صورت چ گھر والے فیصلہ کر سکدے نیں کہ اوہ کنہوں بچان گے۔‏