جی نئیں۔ پاک کلام چ ایہہ نئیں دَسیا گیا کہ پیسہ کوئی بُری چیز اے تے نہ ای پاک کلام چ ایہہ دَسیا گیا اے کہ پیسہ ای ہر مسئلے دی جڑ اے۔ عام طور تے آکھیا جاندا اے کہ پیسہ ہر طرحاں دی بُرائی دی جڑ اے پر ایہہ گل صحی نئیں۔ اصل چ پاک کلام چ دَسیا گیا اے کہ پیسے نال پیار ہر طرحاں دی بُرائی دی جڑ اے۔—‏1-‏تیمُتھیُس 6:‏10‏۔‏

•  پاک کلام چ پیسے بارے کیہہ دَسیا گیا اے؟‏

•  پاک کلام چ پیسے نال پیار کرن توں کیوں خبردار کیتا گیا اے؟‏

•  پاک کلام چ پیسے بارے جیہڑے مشورے دِتے گئے نیں اَسی اوہناں توں کیویں فائدہ حاصل کر سکنے آں؟‏

•  پیسے بارے پاک کلام دِیاں کجھ ایتاں

 پاک کلام چ دَسیا گیا اے کہ جدوں اَسی پیسے نُوں سمجھ‌داری نال استمال کرنے آں تے ایہہ ساڈے لئی اِک پناہ‌گاہ وانگوں ثابت ہوندا اے۔ (‏واعظ 7:‏12‏)‏ ایہدے علاوہ پاک کلام چ اوہناں لوکاں دی تعریف کیتی گئی اے جیہڑے کُھلے دل نال دُوجیاں دی مدد کردے نیں۔ ایہدے چ پیسے دے ذریعے دُوجیاں دی مدد کرنا وی شامل اے۔—‏امثال 11:‏25‏۔‏

 پر ایہدے نال نال پاک کلام چ ایس گل توں وی خبردار کیتا گیا اے کہ ساڈا پورا دھیان بس پیسے تے ای نئیں ہونا چاہی دا۔ ایس بارے عبرانیوں 13:‏5 چ دَسیا گیا اے:‏ تواڈی زندگی توں ظاہر ہووے کہ توانوں پیسے نال پیار نئیں اے سگوں تُسی اوہناں چیزاں توں مطمئن او جیہڑیاں تواڈے کول نیں۔ ایہدا مطلب اے کہ سانوں پیسے نُوں سمجھ‌داری نال استمال کرنا چاہی دا اے تے مال‌ودولت پچھے نئیں بھجنا چاہی دا۔ ایہدی بجائے جے ساڈے کول زندگی دِیاں بنیادی چیزاں جیویں کہ کھانا، کپڑے تے سر چھپان لئی چھت ہے وے تے سانوں ایہناں چیزاں تے مطمئن رہنا چاہی دا اے۔—‏1-‏تیمُتھیُس 6:‏8‏۔‏

 جیہڑے لوک لالچی نیں اوہناں نُوں ہمیشاں دی زندگی نئیں ملے گی۔ (‏اِفسیوں 5:‏5‏)‏ ایہدی پہلی وجہ ایہہ وے کہ لالچ بُت‌پرستی دی اِک قسم اے۔ (‏کُلسّیوں 3:‏5‏)‏ ایہدی دُوجی وجہ ایہہ وے کہ لالچی لوک اپنیاں خواہشاں نُوں پورا کرن دی کوشش چ خدا دے معیاراں دے مطابق زندگی گزارنا چھڈ دیندے نیں۔ امثال 28:‏20 چ دَسیا گیا اے:‏ جیہڑا دولت مند بنن چ چھیتی کردا اے اوہ بے‌سزا نئیں رہوے گا۔ جیہڑے لوک راتوں رات امیر بننا چاہندے نیں، اوہ بوہت وڈے جُرم کرن لگ پیندے نیں جیویں کہ دُوجیاں نُوں ڈران دھمکان لئی پیسے لینا، فراڈ کرنا، اغوا کرنا یاں دُوجیاں نُوں قتل کرنا وغیرہ۔‏

 جے پیسے نال پیار کرن دی وجہ توں اِک شخص غلط کماں چ نئیں وی پیندا تے فیر وی ایہدا اوہدے تے بھیڑا اثر پے سکدا اے۔ پاک کلام چ دَسیا گیا اے کہ جیہڑے امیر بنن تے تُلے نیں، اوہ ازمیشاں تے پھندیاں تے بوہت ساریاں فضول تے نقصان‌دہ خواہشاں وچ پھس گئے نیں۔—‏1-‏تیمُتھیُس 6:‏9‏۔‏

 جے اَسی پیسے دی خاطر غلط کماں چ نئیں پیندے تے خدا نُوں ناراض کرن والے کم نئیں کردے تے ایہدا کیہہ فائدہ ہوئے گا۔ ساڈی اپنی نظر چ ساڈی عزت ودھے گی تے سانوں خدا دی خوشنودی وی حاصل ہوئے گی جدی وجہ توں اوہ ساڈی مدد کرے گا۔ جیہڑے لوک دلوں خدا نُوں خوش کرن دی کوشش کردے نیں، خدا اوہناں نال ایہہ وعدہ کردا اے:‏ مَیں تینوں کدی نئیں چھڈاں گا۔ مَیں تینوں کدی رد نئیں کراں گا۔ (‏عبرانیوں 13:‏5، 6‏)‏ اوہنے سانوں اپنے کلام چ ایہہ یقین وی دَوایا اے کہ دیانت‌دار آدمی نُوں بوہت برکتاں مِلن گیاں۔—‏امثال 28:‏20‏۔‏