جی ہاں۔ جدوں لوک اپنے طور طریقے بدل لیندے نیں تے خدا وی اوہناں بارے اپنا ارادہ بدل لیندا اے۔ مثال دے طور تے جدوں خدا نے بنی‌اِسرائیل نُوں اپنے نبی دے ذریعے سزا دا پیغام سنایا تے اوہناں نُوں آکھیا:‏ شاید اوہ سنن تے ہر اِک اپنے بھیڑے کماں توں باز آئے تے مَیں وی اوس عذاب توں جیہڑا اوہناں دے بھیڑے کماں دی وجہ توں اوہناں تے لیانا چاہنا واں باز آواں گا۔‏‏—‏یرمیاہ 26:‏3‏۔‏

 پاک کلام دے بوہت سارے ترجمیاں چ ایس ایت دا ترجمہ جیس طرحاں کیتا گیا اے اوہدے توں ایہہ مطلب سمجھ آندا اے کہ خدا جیہڑا عذاب لیانا چاہندا سی اوہدی وجہ توں اوہ پچھتایا۔ ایہدے توں لگ سکدا اے کہ خدا کولوں غلطی ہوئی۔ پر ایہناں ترجمیاں چ جیہڑے عبرانی لفظ دا ترجمہ پچھتانا کیتا گیا اے اوہدا مطلب اے:‏ اپنی سوچ یاں ارادے نُوں بدلنا۔ اِک عالم دے مطابق ایس ایت چ جیہڑے عبرانی لفظ دا ترجمہ باز آنا کیتا گیا اے اوہدا مطلب اے:‏ جدوں کوئی اپنا چال‌چلن بدل لیندا اے تے خدا وی اوہنوں سزا دین دا اپنا ارادہ بدل لیندا اے۔‏

 بھانویں کہ ایہہ سچ اے کہ خدا اپنا ارادہ بدل سکدا اے پر ایہدا مطلب ایہہ نئیں اے کہ اوہ لازمی اِنج کرے گا وی۔ آؤ پاک کلام چ لکھیاں کجھ ایہو جیہاں مثالاں تے غور کریئے جنہاں چ خدا نے اپنا ارادہ نئیں بدلیا۔‏

•   خدا نے بلق دی وجہ توں اپنا ارادہ نئیں بدلیا تے اوہنوں بنی‌اِسرائیل تے لعنت نئیں کرن دِتی۔—‏گنتی 23:‏18-‏20‏۔‏

•   بنی‌اِسرائیل دا بادشاہ ساؤل جان بجھُ کے غلط کم کرن لگ پیا جدی وجہ توں یہوواہ نے اوہنوں بادشاہ دے طور رد کرن دا اپنا ارادہ نئیں بدلیا۔—‏1-‏سموئیل 15:‏28، 29‏۔‏

•   خدا نے وعدہ کیتا اے کہ یسوع مسیح ہمیشاں کاہن رہن گے۔ خدا اپنے ایس ارادے نُوں کدی نئیں بدلے گا۔—‏زبور 110:‏4‏۔‏

 جی بالکل۔ خدا نے آپ اپنے کلام چ کہیا اے کہ مَیں یہوواہ لاتبدیل یعنی کدی نہ بدلن والا خدا واں۔ (‏ملاکی 3:‏6‏)‏ پاک کلام چ ایہہ وی دَسیا گیا اے کہ خدا پرچھانوے وانگوں نئیں اے جیہڑا بدلدا رہندا اے۔ (‏یعقوب 1:‏17‏)‏ پر ایہدا ایہہ مطلب نئیں کہ خدا اپنے ارادے یاں فیصلے نُوں بدلدا نئیں۔ خدا اصل چ ایس لحاظ نال لاتبدیل اے کہ اوہدی ذات، محبت تے انصاف کدی نئیں بدلدے۔ (‏اِستثنا 32:‏4؛‏ 1-‏یوحنا 4:‏8‏)‏ پر اوہ فرق فرق موقعے تے لوکاں نُوں فرق فرق ہدیتاں دے سکدا اے۔ مثال دے طور تے اِک وار جدوں بادشاہ داؤد نُوں لگاتار دو جنگاں لڑنیاں پیاں تے خدا نے اوہنوں ایس معاملے بارے دو فرق ہدیتاں دِتیاں تے اوہ دونویں ای اوہناں جنگاں لئی فائدےمند ثابت ہوئیاں۔—‏2-‏سموئیل 5:‏18-‏25‏۔‏

 بالکل نئیں۔ پر اوہنوں ایس گل دا افسوس ضرور اے کہ زیادہ‌تر انسان اوہدا حکم نئیں من دے۔ پاک کلام چ دَسیا گیا اے کہ نوح دے طوفان توں پہلاں لوکاں دے بھیڑے کم ویکھ کے یہوواہ ملول ہویا یعنی اوہنوں بوہت افسوس ہویا تے اوہنے زمین تے انسان نُوں پیدا کرن دی وجہ توں دل چ غم کیتا۔ (‏پیدایش 6:‏6‏)‏ ایس ایت چ جیس عبرانی لفظ دا ترجمہ ملول کیتا گیا اے اوہ اِک ایہو جہے لفظ توں نکلیا اے جدا مطلب اے:‏ اپنا ارادہ بدل لینا۔ ایس لئی طوفان توں پہلاں زمین تے موجود بوہت سارے لوکاں بارے خدا نے اپنا ارادہ یاں اپنی سوچ بدل لئی کیونکہ اوہ بوہت ای بھیڑے کم کرن لگ پئے سن۔ (‏پیدایش 6:‏5،‏ 11‏)‏ بھانویں کہ خدا نُوں ایس گل دا دُکھ سی کہ اوہناں لوکاں نے غلط راہ چُنی اے پر فیر وی اوہنے سارے انساناں لئی اپنے ارادے نُوں نئیں بدلیا سگوں نوح تے اوہدے خاندان دے ذریعے انساناں دی نسل نُوں مٹن توں بچا لیا۔—‏پیدایش 8:‏21؛‏ 2-‏پطرس 2:‏5،‏ 9‏۔‏