جی نئیں۔ زمین کدی تباہ نئیں ہوئے گی۔ ایہہ نہ تے سڑ کے سواہ ہوئے گی تے نہ ای کوئی ہور سیارہ ایہدی جگہ لوے گا۔ سگوں بائبل چ دَسیا گیا اے کہ زمین نُوں ایس لئی بنایا گیا اے تاکہ ایہہ ہمیشاں تک آباد رہوے۔‏

•   ”‏صادق زمین دے وارث ہون گے تے ایہدے تے ہمیشاں ہسدے وَسدے رہن گے۔—‏زبور 37:‏29‏۔‏

•   ”‏[‏خدا]‏ نے زمین نُوں اوہدیاں بنیاداں تے قائم کیتا اے جیہڑی اپنی تھاں توں کدی ہٹائی نئیں جا سکدی۔—‏زبور 104:‏5‏۔‏

•   ”‏زمین ہمیشاں قائم رہندی اے۔“‏—‏واعظ 1:‏4‏۔‏

•   ”‏اوہنے ای زمین بنائی تے تیار کیتی۔ اوہنے ای ایہنوں قائم کیتا۔ اوہنے ایہنوں بے‌فائدہ پیدا نئیں کیتا سگوں اوہنوں آبادی لئی بنایا اے۔—‏یسعیاہ 45:‏18‏۔‏

 خدا انساناں نُوں ایہہ اجازت نئیں دَوے گا کہ اوہ آلودگی، جنگاں یاں کسے ہور ذریعے نال زمین نُوں بالکل ای تباہ کر دین۔ (‏مکاشفہ 11:‏18‏)‏ سگوں اوہ اوہناں لوکاں نُوں ای تباہ کر دَوے گا جیہڑے زمین نُوں تباہ کر رہے نیں۔ پراوہ اِنج کیویں کرے گا؟‏

 خدا انسانی حکومتاں نُوں ختم کر دے گا جیہڑیاں زمین دی حفاظت کرن دے لائق ای نئیں۔ اوہ انسانی حکومتاں دی جگہ اِک اسمانی حکومت قائم کرے گا۔ (‏دانی‌ایل 2:‏44؛‏ متی 6:‏9، 10‏)‏ ایس حکومت دا بادشاہ یسوع مسیح ہوئے گا۔(‏یسعیاہ 9:‏6، 7‏)‏ جدوں یسوع مسیح زمین تے سی تے اِک موقعے تے اوہنے ظاہر کیتا کہ اوہ قدرتی آفتاں تے وی قابو پا سکدا اے۔ (‏مرقس 4:‏35-‏41‏)‏ جدوں یسوع مسیح زمین تے حکمرانی کرنا شروع کرے گا تے اوہ زمین تے ایہدے تے موجود ساریاں قدرتی طاقتاں تے اپنے اِختیار نُوں پوری طرحاں استمال کرے گا۔ اوہ زمین نُوں فیر توں اوس طرحاں دا ای بنا دَوے گا جیس طرحاں عدن دا باغ سی۔—‏متی 19:‏28؛‏ لُوقا 23:‏43‏۔‏

 نئیں۔ پاک کلام چ ایہہ تلیم نئیں دِتی گئی۔ کئی لوک ایس غلط‌فہمی دا شکار ایس لئی نیں کیونکہ اوہ 2-‏پطرس 3:‏7 نُوں صحی طرحاں سمجھ نئیں پاؤندے جِتھے لکھیا اے:‏ موجودہ اسمان تے زمین اَگ لئی رکھے گئے نیں۔ ایس ایت دے صحی مطلب نُوں سمجھن لئی دو گلاں تے غور کرو:‏

1.   پاک کلام چ اِصطلا‌ح”‏ اسمان، زمین تے اَگ “‏اِک توں زیادہ چیزاں وَل اشارہ کردی اے۔‏ مثال دے طور تے زبور 33:‏8 چ لکھیا اے:‏ ساری زمین یہوواہ توں ڈرے۔ ایس ایت چ اِصطلا‌ح زمین انساناں وَل اشارہ کردی اے۔‏

2.   دُوجا پطرس 3:‏7 دے سیاق‌وسباق توں پتہ چلدا اے کہ ایس ایت چ اِصطلا‌ح اسمان، زمین تے اَگ دا کیہہ مطلب اے۔‏ 5 تے 6 ایتاں چ کجھ گلاں دا موازنہ نوح نبی دے زمانے چ ہون والے کماں نال کیتا گیا اے۔ نوح دے زمانے چ دُنیا نُوں تباہ کیتا گیا سی پر زمین نُوں تباہ نئیں کیتا گیا سی۔ سیلاب نال زمین نئیں سگوں بُرے لوک تباہ ہوئے سن۔ (‏پیدایش 6:‏11‏)‏ ایس سیلاب نے اَک لحاظ نال اسمان نُوں وی تباہ کیتا سی یعنی اوہناں لوکاں نُوں جیہڑے دُوجے انساناں تے حکومت کر رہے سن۔ ایس لئی بُرے لوک تباہ ہوئے نہ کہ زمین۔ نوح تے اوہدا خاندان دُنیا دی تباہی توں بچ گیا تے ایس زمین تے آباد ہو گیا۔—‏پیدایش 8:‏15-‏18‏۔‏

 دُوجا پطرس 3:‏7 چ جیس اَگ دا ذکر کیتا گیا اے اوہ زمین نُوں نئیں سگوں بُرے لوکاں نُوں ختم کرے گی، بالکل اوسے طرحاں جیویں نوح دے زمانے چ سیلاب نے زمین نُوں نئیں سگوں بُرے لوکاں نُوں ختم کیتا سی۔ خدا نے وعدہ کیتا اے کہ اوہ نویں اسمان تے نوِیں زمین نُوں قائم کرے گا جِتھے نیکی دا راج ہووے گا۔ (‏2-‏پطرس 3:‏13‏)‏ نویں اسمان دا مطلب اِک نوِیں حکومت یعنی خدا دی بادشاہی جیہڑی نوِیں زمین یعنی اِک نویں انسانی معاشرے اُتے حکومت کر ے گی۔ جدوں خدا دی بادشاہی زمین تے حکمرانی کرے گی تے پوری زمین عدن دے باغ وانگوں سوہنی بن جائے گی جِتھے سارے لوک امن تے سکون نال رہن گے۔—‏مکاشفہ 21:‏1-‏4‏۔‏