بائبل چ جیس یونانی لفظ دا ترجمہ جی اُٹھنا کیتا گیا اے اوہ اے اناستاسیس ایہدا لفظی مطلب اے اُٹھنا یاں دُبارہ اُٹھ کھلونا۔ جیس بندے نُوں مُردیاں چوں زندہ کیتا جاندا اے اوہ بالکل اُنج دا ای ہوندا اے جِنج دا اوہ مرن توں پہلاں ہوندا سی۔—‏1-‏کُرنتھیوں 15:‏12، 13‏۔‏

 بائبل چ یونانی صحیفیاں (‏یعنی نویں عہدنامے)‏ دے نال نال عبرانی صحیفیاں (‏یعنی پرانے عہدنامے)‏ چ وی مُردیاں دے جی اُٹھن دی تلیم دِتی گئی اے۔ مثال لئی، خدا نے ہوسیع نبی دے ذریعے ایہہ وعدہ کیتا:‏ میں اوہناں نُوں قبر توں چھڈاواں گا تے اوہناں نُوں موت توں نجات دَواں گا۔—‏ہوسیع 13:‏14؛‏ ایوب 14:‏13-‏15؛‏ یسعیاہ 26:‏19؛‏ دانی‌ایل 12:‏2،‏ 13‏۔‏

 مُردیاں نُوں کتھے زندہ کیتا جائے گا؟‏ کجھ لوکاں نُوں اسمان تے زندگی حاصل کرن لئی زندہ کیتا جائے تاکہ اوہ یسوع مسیح نال مِل کے حکمرانی کرن۔ (‏2-‏کُرنتھیوں 5:‏1؛‏ مکاشفہ 5:‏9، 10‏)‏ بائبل چ لکھیا اے کہ ایہہ لوک سب توں پہلے زندہ ہون گے۔ (‏مکاشفہ 20:‏6؛‏ فِلپّیوں 3:‏11‏)‏ ایہدے توں پتہ چلدا اے کہ ایہناں توں بعد ہور وی بوہت سارے لوکاں نُوں زندہ کیتا جائے گا جیہڑے ایس زمین تے زندگی گزارن گے۔—‏زبور 37:‏29‏۔‏

 مُردیاں نُوں کیویں زندہ کیتا جائے گا؟‏ خدا نے یسوع مسیح نُوں مُردے زندہ کرن دا اِختیار دِتا اے۔ (‏یوحنا 11:‏25‏)‏ یسوع مسیح اوہناں سارے لوکاں نُوں زندہ کرے گا جیہڑے قبراں چ نیں۔ اوہناں دی شخصیت، سوچ تے یادداشت بالکل اوہو جہی ہوئے گی جیویں دی مرن توں پہلاں ہوندی سی۔ (‏یوحنا 5:‏ 28، 29‏)‏ اسمان تے زندگی پان والیاں نُوں روحانی جسم نال زندہ کیتا جائے گا جد کہ زمین دے زندگی پان والے لوکاں نُوں انسانی جسم نال زندہ کیتا جائے گا تے اوہ بالکل صحت‌مند تے تندرست ہون گے۔—‏یسعیاہ 33:‏24؛‏ 35:‏5، 6؛‏ 1-‏کُرنتھیوں 15:‏42-‏44،‏ 50‏۔‏

 کیہڑے لوکاں نُوں زندہ کیتا جائے گا؟‏ بائبل چ دَسیا گیا اے کہ خدا چنگے تے بھیڑے دونویں طرحاں دے لوکاں نُوں زندہ کرے گا۔ (‏اعمال 24:‏15‏)‏ چنگے لوکاں چ نوح، سارہ، ابراہام تے خدا دے کئی ہور وفادار بندے شامل ہون گے۔ ‏(‏پیدایش 6:‏9؛‏ عبرانیوں 11:‏11؛‏ یعقوب 2:‏21‏)‏ بھیڑے لوکاں چ اوہ لوک شامل ہون گے جنہاں نُوں خدا دے معیاراں بارے سکھن دا تے اوہناں تے عمل کرن دا موقع ای نئیں ملیا۔‏

 کجھ لوک اپنے بھیڑے کماں نُوں چھڈن تے سدُھرن لئی تیار نئیں ہوندے۔ جدوں ایہو جہے بھیڑے لوک مر جاندے نیں تے اوہناں لئی دُبارہ زندہ ہون دی کوئی امید نئیں ہوندی ۔—‏متی 23:‏33؛‏ عبرانیوں 10:‏26، 27‏۔‏

 مُردیاں نُوں کدوں زندہ کیتا جائے گا؟‏ بائبل چ پیشین‌گوئی کیتی گئی اے کہ جنہاں لوکاں نُوں اسمان تے زندگی ملے گی اوہناں نُوں مسیح دی موجودگی دے دوران زندہ کیتا جائے گا۔ مسیح دی موجودگی 1914 چ شروع ہوئی‏۔ (‏ 1-‏کُرنتھیوں 15:‏21-‏23‏)‏ زمین تے زندگی پان والے لوکاں نُوں مسیح دی 1000سالہ بادشاہی دے دوران زندہ کیتا جائے گا جدوں زمین فیر توں عدن دے باغ وانگوں سوہنی بن جائے گی۔—‏لُوقا 23:‏43؛‏ مکاشفہ 20:‏6،‏ 12، 13‏۔‏

 اَسی ایہہ ایمان کیوں رکھ سکنے آں کہ مُردے جی اُٹھن گے؟‏ بائبل چ نوں ایہو جہے لوکاں دا ذکر مِلدا اے جنہاں نُوں مُردیاں چوں زندہ کیتا گیا۔ تے کئی لوکاں نے ایہہ اپنی اَکھیں ویکھیا۔ (‏1-‏سلاطین 17:‏17-‏24؛‏ 2-‏سلاطین 4:‏32-‏37؛‏ 13:‏20، 21؛‏ لُوقا 7:‏11-‏17؛‏ 8:‏40-‏56؛‏ یوحنا 11:‏38-‏44؛‏ اعمال 9:‏36-‏42؛‏ 20:‏7-‏12؛‏ 1-‏کُرنتھیوں 15:‏3-‏6‏)‏ لعزر دے زندہ ہون دا واقعہ سب توں زیادہ مشہور تے خاص اے کیونکہ اوہنوں مرے ہوئیاں چار دن ہو گئے سن تے یسوع مسیح نے اوہنوں بوہت سارے لوکاں دے سامنے زندہ کیتا سی۔ (‏یوحنا 11:‏39،‏ 42‏)‏ یسوع مسیح دے دُشمن وی ایس گل توں اِنکار نئیں کر سکدے سن کہ اوہنے لعزر نُوں زندہ کیتا اے۔ ایس لئی اوہناں نے یسوع تے لعزر نُوں قتل کرن دا منصوبہ بنایا۔—‏یوحنا 11:‏47،‏ 53؛‏ 12:‏9-‏11‏۔‏

 بائبل توں پتہ چلدا اے کہ خدا کول نہ صرف مُردیاں نُوں زندہ کرن دی طاقت اے سگوں ایہہ اوہدی دلی خواہش وی اے۔ خدا دی یادداشت چ اوہناں لوکاں بارے ہر تفصیل محفوظ اے جنہاں نُوں اوہ زندہ کرے گا۔ (‏ایوب 37:‏23؛‏ متی 10:‏30؛‏ لُوقا 20:‏37، 38‏)‏ خدا مُردیاں نُوں زندہ کرنا چاہندا اے ایسے لئی پاک کلام چ خدا بارے لکھیا اے کہ تینوں اپنے ہتھیں بنائیاں ہوئیاں شیواں لئی دلی خواہش ہوئے گی۔—‏ایوب 14:‏15‏۔‏

مُردیاں دے جی اُٹھن بارے غلط نظریے

 غلط نظریہ:‏ زندہ ہون دا مطلب اے جسم چ روح واپس آ جانا۔‏

 سچائی:‏ بائبل توں پتہ چلدا اے کہ جدوں اِک انسان مر جاندا اے تے اوہدا وجود بالکل ختم ہو جاندا اے‏۔ انسان دے جسم چ کوئی روح نئیں جیہڑی انسان دے مرن توں زندہ رہندی اے۔ (‏واعظ 9:‏5،‏ 10‏)‏ ایس لئی کسے مُردے دے زندہ ہون دا مطلب ایہہ نئیں کہ اوہدے جسم چ روح واپس آ گئی اے سگوں اوہنوں فیر توں اِک جیوندے جاگدے انسان دے طور تے زندہ کیتا جاندا اے۔‏

 غلط نظریہ:‏ کجھ لوکاں نُوں زندہ تے کیتا جائے گا پر اوہناں نُوں فیر مار دِتا جائے گا۔‏

 سچائی:‏ بائبل چ دَسیا گیا اے کہ جنہاں نے زندہ ہو کے بھیڑے کم کیتے اوہناں نُوں سزا ملے گی۔ (‏یوحنا 5:‏29‏)‏ غور کرو کہ سزا دا فیصلہ اوہناں کماں دی بنا تے ہوئے گا جیہڑے اوہ زندہ ہون دے بعد کرن گے نہ کہ اوہناں کماں دی بنا تے جیہڑے اوہناں نے مرن توں پہلاں کیتے سن۔ یسوع مسیح نے کہیا سی کہ مُردے خدا دے بیٹے دی آواز سنن گے تے جیہڑے اوہدی گل تے دھیان دین گے اوہ زندہ رہن گے۔ (‏یوحنا 5:‏25‏)‏ جیہڑے لوک زندہ ہون دے بعد اوہناں گلاں تے دھیان دین گے تے عمل کرن گے جیہڑیاں اوہناں نُوں سکھائیاں جان گیاں تے اوہناں دے ناں زندگی دی کتاب چ لکھے جان گے۔—‏مکاشفہ 20:‏12، 13‏۔‏

 غلط نظریہ:‏ جدوں اِک انسان زندہ ہوئے گا تے اوہدا جسم اُنج دا ای ہوئے گا جِنج دا مرن توں پہلاں سی۔‏

 سچائی:‏ مرن توں بعد انسان دا جسم ہولی ہولی گل سڑ جاندا اے تے بالکل ختم ہو جاندا اے۔—‏واعظ 3:‏19، 20‏۔‏