ہرمجِدّون اوہ آخری جنگ اے جیہڑی انسانی حکومتاں تے خدا دے درمیان ہوئے گی۔ انسانی حکومتاں تے ایہناں دے ساتھی نہ صرف خدا دی حکمرانی نُوں رد کردے نیں سگوں اوہدی مخالفت وی کردے نیں۔ (‏زبور 2:‏2‏)‏ ہرمجِدّون دی جنگ چ انسانی حکومتاں نُوں ہمیشاں لئی ختم کر دِتا جائے گا۔—‏دانی‌ایل 2:‏44‏۔‏

 بائبل چ لفظ ہرمجِدّون دا ذکر صرف مکاشفہ 16:‏16 چ مِلدا اے۔ ایس ایت چ اوس جگہ نُوں عبرانی زبان چ ہرمجِدّون کہیا گیا اے جِتھے ساری زمین دے بادشاہواں نُوں لامحدود قدرت والے خدا دے عظیم دن دی جنگ لئی جمع کیتا جائے گا۔—‏مکاشفہ 16:‏14‏۔‏

 ہرمجِدّون دی جنگ چ کون کون لڑے گا؟‏ یسوع مسیح اپنی اسمانی فوجاں دے نال آئے گا تے خدا دے دُشمناں تے فتح حاصل کرے گا۔ (‏مکاشفہ 19:‏11-‏16،‏ 19-‏21‏)‏ ایہناں دُشمناں چ اوہ لوک وی شامل نیں جیہڑے خدا دے اِختیار دی مخالفت کردے نیں تے اوہدی توہین کردے نیں۔—‏حزقی‌ایل 39:‏7‏۔‏

 کیہہ ہرمجِدّون دی جنگ سچ مچ مشرقِ وسطیٰ چ لڑی جائے گی؟‏ جی نئیں۔ ایہہ جنگ کسے اِک علاقے چ نئیں سگوں پوری زمین تے لڑی جائے گی۔—‏یرمیاہ 25:‏32-‏34؛‏ حزقی‌ایل 39:‏17-‏20‏۔‏

 لفظ ”‏ہرمجِدّون“‏ اِک عبرانی اِصطلا‌ح چوں نکلیا اے جدا مطلب اے ”‏مجِدّو دا پہاڑ۔“‏ مجِدّو پرانے اِسرائیل دا اِک شہر سی۔ تریخ تے غور کرن نال پتہ چلدا اے کہ پرانے زمانے چ مجِدّو تے اوہدے نیڑے یزرعیل دی وادی اوہ علاقے سن جِتھے بوہت ساریاں جنگاں لڑیاں جاندیاں سن۔ ایہناں چوں کجھ جنگاں دا ذکر بائبل چ وی مِلدا اے۔ (‏قضاة 5:‏19، 20؛ 2-‏سلاطین 9:‏27؛‏ 23:‏29‏)‏ پر ہرمجِدّون پرانے مجِدّو دے نیڑے کسے وی علاقے نُوں نئیں کہیا جا سکدا کیونکہ اوتھے نہ تے کوئی ایناں وڈا پہاڑ اے تے نہ ای یزرعیل دی وادی اینی وڈی اے کہ اوتھے اوہ سارے لوک کٹھے ہو سکن جیہڑے خدا دے خلاف لڑن گے۔ اصل چ ہرمجِدّون اوہ صورتحال اے جدے چ ساری زمین دے بادشاہ یہوواہ دے خلاف لڑن دی آخری کوشش کرن گے۔‏

 ہرمجِدّون دی جنگ چ کیہہ ہوئے گا؟‏ اَسی ایہہ پوری طرحاں نئیں جان دے کہ خدا اپنے دُشمناں نُوں ختم کرن لئی اپنی طاقت نُوں کیویں استمال کرے گا۔ پر اَسی ایہہ اندازہ لا سکنے آں کہ اوہ ایہو جہیاں چیزاں نُوں ہتھیار دے طور تے استمال کرے گا جیہڑیاں اوہنے ماضی چ بھیڑے لوکاں نُوں سزا دین لئی استمال کیتیاں سن جیویں کہ اولے ، زلزلہ، طوفانی بارشاں، اَگ تے گندھک، اسمانی بجلی تے وَباواں وغیرہ۔ (‏ایوب 38:‏22، 23؛‏ حزقی‌ایل 38:‏19،‏ 22؛‏ حبقوق 3:‏10، 11؛‏ زکریاہ 14:‏12‏)‏ ایہہ سب ویکھ کہ خدا دے دُشمن اُلجھن چ پے جان گے تے ایہناں وچوں کجھ اِک دُوجے نُوں قتل کر دین گے۔ پر اخیر اوہناں نُوں ایس گل دا احساس ہو جائے گا کہ اصل چ خدا اوہناں دے خلاف لڑ رہیا اے۔ حزقی‌ایل 38:‏21،‏ 23؛‏ زکریاہ 14:‏13‏۔‏

 کیہہ ہرمجِدّون دی جنگ چ دُنیا ختم ہو جائے گی؟‏ ہرمجِدّون دی جنگ چ ایہہ زمین تباہ نئیں ہوئے گی کیونکہ انسان ایس زمین تے ہمیشاں تک رہن گے۔ (‏زبور 37:‏29؛‏ 96:‏10؛‏ واعظ 1:‏4‏)‏ ایہہ جنگ انساناں نُوں ختم نئیں کرے گی سگوں اوہناں نُوں بچائے گی۔ کیونکہ پاک کلام چ دَسیا گیا اے کہ خدا دے وفادار بندیاں دی اِک وڈی بِھیڑ ایس جنگ چوں بچ جائے گی۔—‏مکاشفہ 7:‏9،‏ 14؛‏ زبور 37:‏34‏۔‏

 بائبل چ لفظ دُنیا کدی کدار ایہو جہے لوکاں وَل اشارہ کردا اے جیہڑے بھیڑے کم کردے نیں تے خدا دے خلاف نیں۔ (‏1-‏یوحنا 2:‏15-‏17‏)‏ سو ہرمجِدّون دی ایہہ جنگ ایہناں بھیڑے لوکاں نُوں ختم کر دَوے گی۔—‏متی 24:‏3‏۔‏

 ہرمجِدّون دی جنگ کدوں ہوئے گی؟‏ وڈی مصیبت بارے جدے آخر چ ہرمجِدّون دی جنگ ہوئے گی یسوع نے کہیا:‏ اوس دن یاں اوس ویلے بارے کسے نُوں وی نئیں پتہ۔ نہ اسمان دے فرشتیاں نُوں تے نہ ای بیٹے نُوں سگوں صرف باپ نُوں۔ (‏متی 24:‏21،‏ 36‏)‏ پر بائبل چ ایہہ ضرور دَسیا گیا اے کہ ہر مجدون دی جنگ مسیح دی موجودگی دے دوران ہوئے گی۔ تے مسیح دی موجودگی 1914 توں شروع ہو گئی اے۔—‏متی 24:‏37-‏39‏۔‏