پاک کلام چ کئی وار یسوع نُوں خدا دا پُتر کہیا گیا اے۔ (‏یوحنا 1:‏49‏)‏ ایس گل توں ظاہر ہوندا اے کہ خدا خالق اے جنہے ساریاں نُوں زندگی دِتی اے تے یسوع نُوں وی اوہنے ای خلق کیتا اے۔ (‏زبور 36:‏9؛‏ مکاشفہ 4:‏11‏)‏ پاک کلام چ ایہہ تلیم نئیں دِتی گئی کہ خدا نے یسوع نُوں اُنج پیدا کیتا اے جیویں انسان بچے پیدا کردے نیں۔‏

 پاک کلام چ فرشتیاں نُوں وی خدا دے پُتر کہیا گیا اے۔ (‏ایوب 1:‏6‏)‏ پہلے انسان آدم دے بارے وی کہیا گیا اے کہ اوہ خدا دا پُتر سی۔ (‏لُوقا 3:‏38‏)‏ یسوع خدا دی پہلی تخلیق سی یعنی اوہنوں خدا نے سب چیزاں توں پہلاں بنایا سی ایس لئی اوہنوں خدا دا پہلوٹھا پُتر کہیا گیا اے۔‏

•  کیہہ یسوع زمین تے آن توں پہلاں اسمان تے رہندا سی؟‏

•  زمین تے آن توں پہلاں یسوع کیہہ کردا سی؟‏

 جی ہاں۔ یسوع زمین تے انسان دے طور تے پیدا ہون توں پہلاں اسمان تے اِک روحانی ہستی دے طور تے رہندا سی۔ یسوع نے آپ کہیا:‏ میں اسمان توں اُتریا واں۔‏‏—‏یوحنا 6:‏38؛‏ 8:‏23‏۔‏

 خدا نے سب توں پہلاں یسوع نُوں بنایا سی۔ ایہدے بارے پاک کلام چ لکھیا اے:‏

•   اوہ ساریاں چیزاں توں پہلاں بنیا اے۔‏‏—‏کُلسّیوں 1:‏15‏۔‏

•   اوہ خدا دِیاں بنائیاں ہوئیاں چیزاں دی ابتدا یعنی شروع اے۔‏‏—‏مکاشفہ 3:‏14‏۔‏

 بائبل دی ایہہ پیشین‌گوئی یسوع تے ای پوری ہوئی جدے چ کہیا گیا سی کہ اوہدی شروعات پرانے زمانے توں اے۔‏‏—‏میکاہ 5:‏2؛‏ متی 2:‏4-‏6‏۔‏

 اوہدا اسمان تے اِک اُچا عہدہ سی۔‏ یسوع نے اپنے ایس عہدے دا ذکر اوہدوں کیتا جدوں اوہنے دُعا چ کہیا:‏ اَے باپ، مینوں اوہ شان‌دار رُتبہ دے جیہڑا میں دُنیا بنن توں پہلاں تیرے حضور رکھنا ساں۔‏‏—‏یوحنا 17:‏5‏۔‏

 اوہنے باقی ساریاں چیزاں تخلیق کرن چ اپنے باپ دا ساتھ دِتا۔‏ یسوع نے اِک ماہر کاریگر وانگوں اپنے باپ یعنی خدا دے نال کم کیتا۔ (‏امثال 8:‏30‏)‏ یسوع دے بارے بائبل چ لکھیا اے:‏ اوہدے ذریعے اسمان تے زمین دِیاں ساریاں چیزاں بنائیاں گئیاں نیں۔‏‏—‏کُلسّیوں 1:‏16‏۔‏

 خدا نے یسوع نال مِل کے ساریاں چیزاں نُوں بنایا اے جنہاں چ فرشتے تے پوری کائنات شامل اے۔ (‏مکاشفہ 5:‏11‏)‏ خدا تے یسوع نے بڑی حد تک اِنج کم کیتا جیویں اِک نقشہ بنان والا تے اِک کاریگر مِل کے کم کردے نیں۔ نقشہ بنان والا عمارت دا ڈیزائن بناندا اے تے کاریگر اوس ڈیزائن دے مطابق عمارت بناندا اے۔‏

 اوہ کلام سی یعنی خدا وَلّوں پیغام پونچاندا سی۔‏ بائبل چ یسوع نُوں کلام وی کہیا گیا اے۔ (‏یوحنا 1:‏1‏)‏ ایہہ لقب اوہنوں اسمان تے دِتا گیا سی۔ایس توں پتہ چلدا اے کہ خدا اپنے بیٹے یسوع دے ذریعے دُوجے فرشتیاں تک معلومات تے ہدیتاں پونچاندا سی۔‏

 لگدا اے کہ یسوع زمین تے انساناں تک وی خدا دا پیغام پونچاندا سی۔ خدا نے باغِ‌عدن چ آدم تے حوا نُوں ہدیتاں دین لئی یسوع دے ذریعے ای اوہناں نال گل کیتی۔ (‏پیدایش 2:‏16، 17‏)‏ شاید یسوع ای اوہ فرشتہ سی جنہے بیابان چ بنی‌اِسرائیل دی رہنمائی کیتی تے جدی ہدیتاں تے بنی اِسرائیل نے عمل کرنا سی۔—‏خروج 23:‏20-‏23‏۔‏ a