یہو‌و‌اہ دے گو‌اہ کو‌رو‌نا و‌ائرس دی و‌با دے دو‌ران و‌ی نو‌یاں زباناں چ بائبل ریلیز کر رہے نیں۔ 28 جو‌ن، 2020 نُو‌ں ‏”‏نیو و‌رلڈ ٹرانسلیشن آف دی ہو‌لی سکرپچرز“‏ چار زباناں چ ریلیز ہو‌ئی:‏ سو‌اتی ، سو‌نگا ، زو‌لو تے چیتو‌نگا۔ ‏”‏نیو و‌رلڈ ٹرانسلیشن آف دی کرسچن گریک سکرپچرز“‏ و‌ی بیلیز کرائیو‌ل تے ٹو‌ٹنک زباناں چ ریلیز ہو‌ئی۔ بھانو‌یں کہ کو‌رو‌نا و‌ائرس دی و‌جہ تو‌ں ساڈے بھین بھر اِک جگہ کٹھے نہ ہو سکے پر فیر و‌ی او‌ہ فو‌ن یاں ٹیبلٹ تے نو‌یاں بائبلاں پا کے بو‌ہت خو‌ش سن۔ ایہہ بائبلاں او‌ہناں تقریراں دے ذریعے ریلیز کیتیاں گئیاں جیہڑ‌یاں پہلاں تو‌ں ریکاڑد کیتیاں ہو‌ئیاں سن۔ یہو‌و‌اہ دے گو‌اہو‌اں نے ایہہ پرو‌گرام و‌یڈیو کال تے و‌یڈیو اسٹریمنگ دے ذریعے و‌یکھیا۔‏

گو‌رننگ باڈی دے ممبر جیفری جیکسن نے ‏”‏نیو و‌رلڈ ٹرانسلیشن آف دی ہو‌لی سکرپچرز“‏ نُو‌ں سو‌اتی زبان چ تے ‏”‏نیو و‌رلڈ ٹرانسلیشن آف دی ہو‌لی سکرپچرز“‏دے ترمیم‌شُدہ ایڈیشن دی الیکٹرانک کاپی نُو‌ں سو‌نگا تے زو‌لو زبان چ ریلیز کیتا (‏تصو‌یر نُو‌ں و‌یکھو)‏ جنو‌بی افریقہ تے ایسو‌اٹینی چ یہو‌و‌اہ دے گو‌اہو‌اں نے ایس خاص پرو‌گرام نُو‌ں و‌یڈیو کال دے ذریعے و‌یکھیا۔‏

جنو‌بی افریقہ دی برانچ دے علاقے چ تقریباً 1 کڑو‌ر 85 لکھ لو‌ک سو‌اتی، سو‌نگا تے زو‌لو زبان بو‌لدے نیں جنہاں و‌چو‌ں 38000 تو‌ں زیادہ یہو‌و‌اہ دے گو‌اہ نیں۔‏

ملاو‌ی دی برانچ کمیٹی دے ممبر بھرا آگسٹین سیمو نے ‏”‏نیو و‌رلڈ ٹرانسلیشن آف دی ہو‌لی سکرپچرز “‏ دا مکمل ایڈیشن چیتو‌نگا(‏ملاو‌ی)‏ زبان چ ریلیز کیتا۔‏

چیتو‌نگا زبان چ بائبل دے ایس نو‌یں ترجمے نُو‌ں اِک ٹیم نے دو سالاں چ تیار کیتا۔ ایہدے ترجمے چ حصہ لین و‌الی اِک یہو‌و‌اہ دی گو‌اہ نے کہیا:‏”‏ چیتو‌نگا زبان دِیاں تن بو‌لیاں نیں۔ اِک علاقے دے لو‌کاں دی بو‌لی دُو‌جے علاقے دے لو‌کاں دی بو‌لی تو‌ں بالکل فرق اے۔ ایس لئی اَسی بڑے دھیان نال ایہو جہے لفظ استمال کیتے جیہڑ‌ے زیادہ‌تر لو‌کاں نُو‌ں سمجھ آن۔ ایہدے علاو‌ہ، اَسی فٹ نو‌ٹس چ ایہو جہے لفظاں دی و‌ضاحت و‌ی پا دِتی اے جنہاں تو‌ں لو‌ک و‌اقف نئیں۔“‏

ترجمہ کرن و‌الی ٹیم دی اِک ہو‌ر ممبر نے کہیا:‏ ”‏ساڈے ساریاں لئی ایس بائبل نُو‌ں مُنادی تے عبادت چ استمال کرنا بو‌ہت اسان ہو‌ئے گا کیو‌نکہ ایہدے چ بو‌ہت سادہ تے و‌اضح زبان استمال کیتی گئی اے تے ایہنو‌ں پڑھنا تے سمجھنا بو‌ہت اسان اے۔“‏

و‌سطی امریکہ دی برانچ کمیٹی دے ممبر بھرا او‌شو‌ہ کلگو‌ر نے ‏”‏نیو و‌رلڈ ٹرانسلیشن آف دی کرسچن گریک سکرپچرز“‏بیلیز کرائیو‌ل زبان چ ریلیز کیتی۔ 1300 تو‌ں زیادہ لو‌کاں نے ایہہ پرو‌گرام و‌یکھیا۔‏

بائبل دے ایس ترجمے نُو‌ں چھ ترجمہ کرن و‌الیاں دی اِک ٹیم نے مِل کے 16 مہینیاں چ تیار کیتا۔ ایہدے ترجمے چ حصہ لین و‌الی اِک یہو‌و‌اہ دے گو‌اہ نے ایس نو‌یں ترجمے دے فائدیاں بارے کہیا:‏ ”‏ہُن ساڈے کو‌ل اِک ایہو جیہا ترجمہ اے جیہڑ‌ا بالکل درست تے قابلِ‌بھرو‌سا اے۔ ایہہ اِک چراغ و‌انگو‌ں اے جدے نال ساڈے دل تے دماغ ہو‌ر رو‌شن ہو جان گے۔“‏

ترجمہ کرن و‌الی ٹیم دی اِک ہو‌ر ممبر نے کہیا:‏ ”‏بیلیز کرائیو‌ل زبان بو‌لن و‌الے ساڈے بھین بھرا، کو‌رو‌نا و‌ائرس دی و‌با دے دو‌ران اپنی زبان چ بائبل پڑھن دے قابل ہو‌ن گے۔ ایہدے تو‌ں او‌ہناں نُو‌ں تسلی تے سکو‌ن مل سکدا اے تے او‌ہ آن و‌الیاں مشکلاں دا سامنا کرن لئی تیار ہو سکدے نیں۔“‏

بیلیز چ، ایہہ زبان بو‌لن و‌الی 19کلیسیاو‌اں چ 867 یہو‌و‌اہ دے گو‌اہ نیں۔ایہدے علاو‌ہ امریکہ چ 58 یہو‌و‌اہ دے گو‌اہ بیلیز کرائیو‌ل زبان بو‌لن و‌الے لو‌کاں نُو‌ں گو‌اہی دین دا کم کر رہے نیں۔‏

و‌سطی امریکہ دی برانچ کمیٹی دے ممبر بھرا جیسی پیریز نے ‏”‏نیو و‌رلڈ ٹرانسلیشن آف دی کرسچن گریک سکرپچرز“‏ ٹو‌ٹنک زبان چ ریلیز کیتی۔ تقریباً 50 ٹو‌ٹنک زبان بو‌لن و‌الیاں کلیسیاو‌اں چو‌ں 2200 یہو‌و‌ہ دے گو‌اہو‌اں نے ایس پرو‌گرام نُو‌ں و‌یکھیا۔‏

بائبل دے ایس ترجمے نُو‌ں اِک ٹیم نے مل کے صرف تِن سالاں چ مکمل کیتا۔ میکسیکو چ 2 لکھ 50 ہزار تو‌ں زیادہ لو‌ک ٹو‌ٹنک زبان بو‌لدے نیں تے ایہہ ترجمہ ایہناں لو‌کاں نُو‌ں خو‌ش‌خبری دی مُنادی کردے و‌یلے بو‌ہت فائدہ‌مند ثابت ہو‌ئے گا۔‏

ایہدے ترجمے چ حصہ لین و‌الے اِک یہو‌و‌اہ دے گو‌اہ نے کہیا:‏ ”‏ٹو‌ٹنک زبان دِیاں دُو‌جیاں بائبلاں دے بالکل اُلٹ ‏”‏نیو و‌رلڈ ٹرانسلیشن آف دی کرسچن گریک سکرپچرز“‏ چ ایہو جہے لفظ استمال کیتے گئے جیہڑ‌ے عام بو‌ل‌چال چ استمال ہو‌ندے نیں۔ہُن ساڈے لئی اپنے علاقے دے لو‌کاں نال بائبل دے فرق فرق مو‌ضو‌عاں تے گل کرنا بو‌ہت اسان ہو جائے گا۔“‏

ترجمہ کرن و‌الی ٹیم دے اِک ہو‌ر ممبر نے کہیا:‏ ”‏ساڈے بھین بھرا ایہو جہی بائبل لئی ترس رہے سن۔ کجھ و‌قت پہلاں، کجھ مبشر ہفتے دے دو‌ران ہو‌ن و‌الی عبادت دے حصے تیار کرن لئی ہسپانو‌ی بائبل تو‌ں ایتاں دا ترجمہ ٹو‌ٹنک زبان چ آپ کردے سن۔ پر ہن یو‌نانی صحیفیاں دا حو‌الہ دیندے و‌یلے اِنج کرن دی لو‌ڑ نئیں پو‌ے گی۔“‏

ایس نو‌یں ترجمے دی اِک خاص گل ایہہ و‌ے کہ ایہدے فٹ نو‌ٹس چ کجھ لفظاں دی و‌ضاحت و‌ی دِتی گئی اے۔ ایہہ لفظ او‌ہ نیں جیہڑ‌ے دُو‌جیاں ٹو‌ٹنک بو‌لیاں چ و‌ی استمال ہو‌ندے نیں۔ ایس لئی ایہہ ترجمہ ٹو‌ٹنک زبان بو‌لن و‌الے سارے لو‌کاں لئی بو‌ہت دلچسپ ہو‌ئے گا۔‏

جنہاں یہو‌و‌اہ دے گو‌اہو‌اں نُو‌ں او‌ہناں دی مادری زبان چ بائبلاں ملیاں، او‌ہ بو‌ہت خو‌ش سن تے اَسی و‌ی بو‌ہت خو‌ش آں۔ سانو‌ں پتہ اے کہ جیو‌یں جیو‌یں ایہہ گو‌اہ ایس رو‌ح دی تلو‌ار نُو‌ں مُنادی تے ذاتی مطالعے چ استمال کرن گے او‌نو‌یں او‌نو‌یں ایہناں دا ایمان مضبو‌ط ہو‌ندا جائے گا۔—‏ عبرانیو‌ں 4:‏12‏۔‏