اگست 15 تے 16، 2020 نُوں موزمبیق چ کتابِ‌مُقدس دا ترجمہ ”‏نوِیں دُنیا—‏متی توں مکاشفہ“‏ چھانگا تے مکوا زبان چ ریلیز ہویا۔ ایہہ ترجمہ الیکٹرانک فارمیٹ چ ریلیز ہویا۔ 8000 توں زیادہ مبشر چھانگا زبان بولدے نیں تے 1700 توں زیادہ مبشر مکوا زبان بولدے نیں۔‏

موزمبیق دی برانچ کمیٹی دے ممبر ڈیوڈ اموریم نے ایس ترجمے نُوں ریلیز کیتا۔ اوہناں دی تقریر پہلے توں ریکارڈ کیتی گئی تے فیر مبشراں نُوں سنوائی گئی۔ ایس پروگرام نُوں ٹی‌وی تے 30 توں زیادہ ریڈیو سٹیشناں توں نشر کرن دا اِنتظام وی کیتا گیا۔‏

موزمبیق دے جنوبی علاقیاں چ رہن والے تقریباً 19 لکھ لوک چھانگا زبان بولدے نیں۔ ایہہ زبان تقریباً تسونگا زبان ورگی اے جیہڑی موزمبیق دے گوانڈھی ملک جنوبی افریقہ چ بولی جاندی اے۔‏

مکوا زبان بولن والے لوک موزمبیق دے شمالی علاقیاں چ رہندے نیں۔ ایہہ زبان 58 لکھ لوک بولدے نیں تے ایتھوں دے زیادہ‌تر مقامی لوکاں دی زبان ایہو ای اے۔‏

ایہہ زباناں بولن والے مبشراں لئی کئی سالاں تک بائبل حاصل کرنا بوہت ای اوکھا سی۔ ایتھے بائبل بوہت مہنگی سی تے دکاندار یہوواہ دے گواہواں نُوں بائبل ویچنا نئیں چاہندے سن۔ ترجمہ کرن والی ٹیم دے اِک ممبر نے کہیا:‏ ”‏کجھ کلیسیاواں کول صرف اِک ای بائبل ہوندی سی جنہوں عبادت‌گاہ چ رکھیا جاندا سی۔ تقریر دین والے بھرا وی ایہی بائبل استمال کردے سن تے ہفتے دے دوران ہون والی عبادت چ اپنا حصہ پیش کرن والے وی ایہی بائبل استمال کردے سن۔“‏

ایہہ بھین بھرا اپنیاں زباناں چھانگا تے مکوا چ ترجمہ ”‏نوِیں دُنیا—‏متی توں مکاشفہ“‏ حاصل کر کے بوہت خوش نیں تے اَسی وی ایہناں دی خوشی چ شریک آں۔ سانوں یقین اے کہ ایہہ بائبلاں لوکاں نُوں سچائی دے بارے صحی علم سکھان چ بوہت مددگار ثابت ہون گیاں۔—‏1-‏تیمُتھیُس 2:‏3، 4‏۔‏