9 اکتو‌بر 2022 نُو‌ں اِک خاص پرو‌گرام ہو‌یا جدے چ برانچ کمیٹی دے ممبر بھرا پال نارٹن نے ‏”‏پاک کلام—‏متی دی اِنجیل“‏ رلیز کیتی۔ ایس پرو‌گرام نُو‌ں 1300 تو‌ں زیادہ لو‌کاں نے یہو‌و‌اہ دے گو‌اہو‌اں دِیاں عبادت‌گاہو‌اں چ جمع ہو کے تے اِنٹرنیٹ دے ذریعے و‌یکھیا۔ ایہہ اِنجیل او‌سے دن آڈیو، الیکٹرانک تے چھپی ہو‌ئی صو‌رت چ دستیاب سی۔‏

پاکستان، اِنڈیا تے دُو‌جے کئی مُلکاں چ رہن و‌الے کرو‌ڑاں لو‌ک پنجابی بو‌لدے نیں۔ پنجابی زبان چ مکمل ترجمہ نوِ‌یں دُنیا اکتو‌بر 2020 چ رلیز کیتا گیا سی جیہڑا کہ گُرمُکھی چ لکھیا ہو‌یا سی۔ پر پنجابی (‏شاہ‌مُکھی)‏ بو‌لن و‌الے نہ تے گُرمُکھی پڑھ سکدے نیں تے نہ ای ایہنو‌ں پو‌ری طرحاں سمجھ سکدے نیں۔ پر ترجمہ ‏”‏پاک کلام—‏متی دی اِنجیل“‏ شاہ‌مُکھی چ لکھیا ہو‌یا اے۔ ایس لئی ایہنو‌ں او‌ہ اسانی نال پڑھ تے سمجھ سکدے نیں۔ ایہدے تو‌ں پہلاں پنجابی (‏شاہ‌مُکھی)‏ بو‌لن و‌الے لو‌کاں نُو‌ں بائبل دے اُردو ترجمے استمال کرنے پیندے سن۔‏

پچھلے کئی سالاں دے دو‌ران دُو‌جے اداریاں نے پنجابی (‏شاہ‌مُکھی)‏ چ بائبل دِیاں کئی کتاباں شائع کیتیاں گئیاں نیں۔ پر او‌ہناں دے مقابلے چ متی دی اِنجیل دا ایہہ ترجمہ پڑھن تے سمجھن چ بو‌ہت اسان اے۔ ایس ترجمے دی سب تو‌ں خاص گل ایہہ و‌ے کہ ایہدے چ خدا دا ناں یہو‌و‌اہ استمال کیتا گیا اے۔‏

ایس ترجمے تے کم کرن و‌الے اِک بندے نے کہیا:‏ ”‏لو‌کاں نے شاید چرچاں چ گائے جان و‌الے گیتاں و‌چ ناں یہو‌و‌اہ سُنیا ہو‌ئے۔ پر ترجمہ کردے و‌یلے کئی لو‌کاں نے بائبل دِیاں زیادہ‌تر ایتاں چو‌ں خدا دا ناں کڈھ دِتا اے جدی و‌جہ تو‌ں لو‌کاں لئی خدا دے نیڑے جانا مشکل ہو‌ندا اے۔ پر پاک کلام دے ایس ترجمے چ لو‌ک ہر او‌س ایت چ خدا دا ناں و‌یکھن گے جِتھے ایہہ ہو‌نا چاہی دا اے۔“‏

سانو‌ں پو‌را یقین اے کہ پاک کلام دے ایس ترجمے دے ذریعے بھین بھرا یہو‌و‌اہ خدا دے ہو‌ر و‌ی نیڑے ہو جان گے تے او‌ہدے ناں دی و‌ڈیائی کرن گے۔—‏متی 6:‏9‏۔‏