رسولاں دے اعمال 26:1-32
26 اگرِپا نے پولُس نُوں کہیا: ”تُوں اپنی صفائی دے سکنا ایں۔“ فیر پولُس نے ہتھ نال اشارہ کر کے کہیا:
2 ”بادشاہ اگرِپا، مَیں بڑا خوش آں کہ مینوں تواڈے سامنے اوہناں اِلزاماں دی صفائی پیش کرن دا موقع ملیا اے جیہڑے یہودیاں نے میرے تے لائے نیں
3 کیونکہ تُسی یہودیاں دِیاں ساریاں رویتاں تے اوہناں دے جھگڑیاں بارے چنگی طرحاں جان دے او۔ ایس لئی مَیں اِلتجا کرنا واں کہ تُسی میری گل دھیان نال سُنو۔
4 بوہت سارے یہودیاں نُوں چنگی طرحاں پتہ اے کہ مَیں بچپن توں ای اپنی قوم تے یروشلم وچ کیہو جہی زندگی گزاری اے۔
5 اوہ مینوں پہلاں توں ای جان دے نیں۔ ایس لئی جے اوہ چاہن تے اوہ ایس گل دی گواہی دے سکدے نیں کہ مَیں اِک فریسی ساں یعنی میرا تعلق اوس فرقے نال سی جیہڑا یہودیاں دے باقی سارے فرقیاں نالوں زیادہ مذہبی اے۔
6 پر ہُن میرے تے مُقدمہ ایس لئی چلایا جا رہیا اے کیونکہ مَیں امید رکھنا واں کہ اوہ وعدہ پورا ہوئے گا جیہڑا خدا نے ساڈے پیو دادیاں نال کیتا سی۔
7 ساڈے 12 قبیلے وی ایہی امید رکھدے نیں کہ ایہہ وعدہ پورا ہوئے گا۔ ایسے لئی اوہ دن رات لگن نال خدا دی خدمت کردے نیں۔ اَے بادشاہ، یہودیاں نے ایسے امید دی وجہ توں میرے تے اِلزام لائے نیں۔
8 توانوں ساریاں نُوں ایس گل تے یقین کرنا مشکل کیوں لگدا اے کہ خدا مُردیاں نُوں زندہ کر سکدا اے؟
9 پہلاں مَیں ایہہ مننا ساں کہ مینوں یسوع ناصری دے ناں دی مخالفت کرن توں ذرا وی پچھے نئیں ہٹنا چاہی دا۔
10 مَیں یروشلم چ ایہی کیتا سی۔ مَیں بوہت سارے مُقدس لوکاں نُوں قید کرایا کیونکہ مینوں وڈے کاہناں وَلّوں ایہہ اِختیار ملیا سی تے جدوں اوہناں لوکاں نُوں موت دی سزا سُنائی جاندی سی تے مَیں وی ایہدی حمایت کرنا ساں۔
11 مَیں ساریاں عبادتگاہواں چ جا کے اوہناں نُوں سزا دینا ساں تے اوہناں نُوں مجبور کرن دی کوشش کرنا ساں کہ اوہ اپنے ایمان توں پھر جان۔ مینوں اوہناں توں اینی نفرت سی کہ مَیں اوہناں تے ظلم کرن لئی دُوجے شہراں چ وی گیا۔
12 ایسے مقصد لئی مَیں دمشق جا رہیا ساں کیونکہ وڈے کاہناں نے مینوں حکم تے اِختیار دِتا سی۔
13 پر فیر اَے بادشاہ، دوپہر نُوں راہ چ میرے تے میرے ساتھیاں دے آلے دَوالے اسمانوں اِک ایہو جہی روشنی چمکی جیہڑی سورج دی روشنی نالوں وی تیز سی۔
14 اَسی سارے زمین تے ڈِگ پئے۔ فیر مینوں اِک آواز سُنائی دِتی جنہے عبرانی زبان چ مینوں کہیا: ”ساؤل، ساؤل، تُوں میرے تے ظلم کیوں کر رہیا ایں؟ تُوں خدا دی مرضی دے خلاف جا کے اپنا ای نقصان کر رہیا ایں۔“*
15 پر مَیں پچھیا: ”مالک، تُوں کون ایں؟“ مالک نے کہیا: ”مَیں یسوع آں جدے تے تُوں ظلم کر رہیا ایں۔
16 ہُن اُٹھ کے اپنے پیراں تے کھلو جا۔ مَیں ایس لئی تیرے تے ظاہر ہویا واں کیونکہ مَیں تینوں اپنا خادم تے گواہ چُنیا اے تاکہ تُوں لوکاں نُوں اوہ گلاں دَسیں جیہڑیاں تُوں ویکھیاں نیں تے جیہڑیاں مَیں تینوں اپنے بارے وکھاواں گا۔
17 مَیں تینوں یہودیاں تے غیریہودیاں دے ہتھوں بچاواں گا۔ مَیں تینوں اوہناں کول ایس لئی گھل رہیا واں
18 تاکہ تُوں اوہناں دِیاں اَکھاں کھولیں تے اوہناں نُوں نھیرے چوں کڈھ کے روشنی چ لیاویں تے اوہناں نُوں شیطان دے قبضے* چوں چھڈا کے خدا دے نیڑے لیاویں۔ میرے تے ایمان لیان دی وجہ توں اوہناں نُوں گُناہواں دی معافی ملے گی تے دُوجے مُقدس لوکاں وانگوں وراثت ملے گی۔“
19 ایس لئی بادشاہ اگرِپا، جدوں مالک نے مینوں اسمان توں رُویا وکھائی تے مَیں اوہدی گل منی۔
20 مَیں جا کے پہلاں دمشق دے لوکاں نُوں تے فیر یروشلم تے پورے یہودیہ چ رہن والیاں نُوں تے غیریہودیاں نُوں وی ایہہ پیغام دِتا کہ اوہ توبہ کر کے خدا وَل مُڑن تے اپنے کماں توں ثابت کرن کہ اوہناں نے توبہ کیتی اے۔
21 ایسے وجہ توں یہودیاں نے ہیکل چ مینوں پھڑ کے جانوں مارن دی کوشش کیتی۔
22 پر خدا دی مدد نال مَیں ہُن تک چھوٹے وڈے ساریاں نُوں گواہی دے رہیا واں تے صرف اوہناں پیشینگوئیاں بارے دَس رہیا واں جیہڑیاں موسیٰ تے دُوجے نبیاں نے کیتیاں سن
23 یعنی ایہہ کہ مسیح نُوں دُکھ سہنا پئے گا تے اوہ اوہناں وچوں پہلا* ہوئے گا جنہاں نُوں مُردیاں چوں زندہ کیتا جائے گا تے اوہ یہودی تے غیریہودی لوکاں نُوں روشنی دا پیغام دَوے گا۔“
24 جدوں پولُس اپنی صفائی چ ایہہ گلاں کہہ رہیا سی تے فیستُس نے اُچی آواز چ کہیا: ”پولُس، تیرا دماغ خراب ہو گیا اے۔ ایناں زیادہ علم حاصل کر کے تُوں پاگل ہو گیا ایں۔“
25 پر پولُس نے کہیا: ”جناب فیستُس، مَیں پاگل نئیں آں سگوں مَیں سچ کہہ رہیا واں تے سمجھداری دِیاں گلاں دَس رہیا واں۔
26 اصل چ بادشاہ اگرِپا جدے نال مَیں کُھل کے گل کر رہیا واں، ایہناں گلاں نُوں چنگی طرحاں جان دا اے سگوں مینوں پورا یقین اے کہ ایہناں وچوں کوئی وی گل اوہدے توں چھپی نئیں اے کیونکہ ایہہ گلاں لُک چھپ کے نئیں کیتیاں گئیاں۔
27 بادشاہ اگرِپا، کیہہ تُسی نبیاں تے ایمان رکھدے او؟ مینوں پتہ اے کہ تُسی ایمان رکھدے او۔“
28 پر اگرِپا نے پولُس نُوں کہیا: ”مینوں تے لگدا اے کہ تُوں تھوڑی ای دیر چ مینوں مسیحی بنن تے راضی کر لویں گا۔“
29 ایہہ سُن کے پولُس نے کہیا: ”بھانویں دیر تھوڑی لگے یاں بوہتی، میری تے خدا کولوں ایہی دُعا اے کہ صرف تُسی ای نئیں سگوں ایتھے میری گل سُنن والے سارے لوک میرے ورگے بن جان۔ پر میرے وانگوں بیڑیاں نال بنھے نہ ہون۔“
30 فیر بادشاہ کھلو گیا تے اوہدے نال ای حاکم، برنیکے تے دُوجے بندے وی کھلو گئے۔
31 پر اوتھوں جاندے ویلے اوہ آپس چ کہہ رہے سن: ”ایس بندے نے ایہو جیہا کوئی کم نئیں کیتا کہ ایہنوں موت دی سزا دِتی جائے یاں قید کیتا جائے۔“
32 فیر اگرِپا نے فیستُس نُوں کہیا: ”جے ایس بندے نے روم دے بادشاہ اَگے جان دی درخاست نہ کیتی ہوندی تے ایہہ رِہا ہو سکدا سی۔“
فٹ نوٹ
^ یونانی چ: ”تُوں لاٹھی نُوں لت مار کے اپنا ای نقصان کر رہیا ایں۔“ ایس ایت چ اوس نوکیلی لاٹھی دی گل ہو رہی اے جدے چبھن نال جانور اَگے نُوں ٹُردا رہندا سی۔
^ یونانی چ : ”اختیار۔“
^ یعنی اوہ پہلا انسان جنہوں اسمان تے جان لئی زندہ کیتا گیا۔
