رسولاں دے اعمال 3:1-26
3 اِک دن پطرس تے یوحنا دُعا کرن دے ویلے یعنی دوپہر دے کوئی 3 وجے* ہیکل جا رہے سن۔
2 اوس ویلے کجھ آدمی اِک بندے نُوں چُک کے لیا رہے سن جیہڑا پیدائشی لنگڑا سی۔ اوہ اوہنوں ہر روز ہیکل دے اوس دروازے اَگے بیٹھا جاندے سن جنہوں خوبصورت کہیا جاندا اے تاکہ اوہ آن جان والے لوکاں کولوں بھیکھ منگ سکے۔
3 جدوں اوہنے پطرس تے یوحنا نُوں ہیکل دے اندر جاندے ویکھیا تے اوہ اوہناں کولوں بھیکھ منگن لگ پیا۔
4 پر پطرس تے یوحنا نے اوہدے وَل ویکھیا تے فیر پطرس نے اوہنوں کہیا: ”ساڈے وَل ویکھ۔“
5 اوہ ایہہ سوچ کے اوہناں وَل دھیان نال ویکھن لگ پیا کہ اوہ اوہنوں کجھ دین گے۔
6 پر پطرس نے اوہنوں کہیا: ”میرے کول سونا چاندی تے ہے نئیں۔ پر جو میرے کول ہے وے، اوہ مَیں تینوں دینا واں۔ یسوع مسیح ناصری دے ناں تے اُٹھ تے چل پھر!“
7 فیر پطرس نے اوہدا سجا ہتھ پھڑیا تے اوہنوں کھڑا کیتا۔ اوسے ویلے اوہدے پیراں تے گِٹیاں چ جان آ گئی۔
8 اوہ چھیتی نال کھلو گیا تے ٹُرن پھرن لگ پیا تے اوہناں دے نال ہیکل دے اندر گیا۔ اوہ ٹُر پھر تے اُچھل رہیا سی تے خدا دی وڈیائی کر رہیا سی۔
9 سارے لوکاں نے ویکھیا کہ اوہ ٹُر پھر رہیا اے تے خدا دی وڈیائی کر رہیا اے۔
10 نالے اوہ پچھان گئے کہ ایہہ اوہی بندہ اے جیہڑا ہیکل دے اوس دروازے کول بہہ کے بھیکھ منگدا ہوندا سی جنہوں خوبصورت دروازہ کہیا جاندا اے۔ اوہ اوہنوں ٹُردے پھردے ویکھ کے دَنگ رہ گئے تے بڑے خوش ہوئے۔
11 اوس آدمی نے حالے تک پطرس تے یوحنا دا ہتھ پھڑیا ہویا سی تے اوہ سلیمان دے برانڈے چ کھلوتے ہوئے سن۔ سارے لوک اوس معجزے نُوں ویکھ کے بڑے حیران سن، ایس لئی اوہ بھج کے اوہناں وَل آئے۔
12 ایہہ ویکھ کے پطرس نے اوہناں لوکاں نُوں کہیا: ”اِسرائیلیو، تُسی اینے حیران کیوں ہو رہے او؟ تے تُسی سانوں اِنج کیوں ویکھ رہے او جیویں اَسی ایہنوں اپنی طاقت یاں نیکی* دی وجہ توں ٹھیک کیتا اے؟
13 ساڈے پیو دادیاں دے خدا یعنی ابراہام، اِضحاق تے یعقوب دے خدا نے اپنے خادم یسوع نُوں عزت تے شان بخشی۔ پر تُسی یسوع نُوں جانوں مارن لئی دُشمناں دے حوالے کر دِتا تے پیلاطُس دے سامنے اوہنوں ٹھکرا دِتا بھانویں کہ اوہنے اوہنوں چھڈن دا فیصلہ کر لیا سی۔
14 ہاں، تُسی اِک پاک تے نیک انسان نُوں ٹھکرا دِتا تے اِک قاتل نُوں رِہا کرن دی منگ کیتی۔
15 تُسی زندگی دین والے عظیم رہنما نُوں مار دِتا۔ پر خدا نے اوہنوں زندہ کر دِتا تے اَسی ایس گل دے گواہ واں۔
16 ایہہ آدمی جنہوں تُسی جان دے تے ویکھ رہے او، یسوع دے ناں تے اوہدے ناں اُتے ساڈے ایمان دی وجہ توں تندرست ہو گیا اے۔ ہاں، یسوع تے ساڈے ایمان دی وجہ توں ای ایہہ بندہ تواڈے ساریاں دے سامنے اپنے پیراں تے کھلوتا اے۔
17 بھراوو، مینوں پتہ اے کہ تُسی تے تواڈے حکمراناں نے ایہہ کم انجانے چ کیتا۔
18 پر ایس طرحاں خدا نے اوہناں گلاں نُوں پورا کیتا جیہڑیاں اوہنے اپنے نبیاں دے ذریعے کہیاں سن یعنی ایہہ کہ مسیح نُوں دُکھ سہنے پین گے۔
19 ایس لئی توبہ کرو تے خدا وَل مُڑ آؤ تاکہ تواڈے گُناہ مٹائے جان تے یہوواہ وَلّوں تازگی دے دن آن*
20 تے اوہ مسیح یعنی یسوع نُوں گھلے جنہوں تواڈے لئی چُنیا گیا اے۔
21 ضروری اے کہ اوہ اسمان تے اوس ویلے تک اِنتظار کرے جدوں تک اوہناں ساریاں چیزاں نُوں بحال کرن دا ویلا نئیں آ جاندا جنہاں بارے خدا نے پرانے زمانے چ اپنے مُقدس نبیاں دے ذریعے دَسیا سی۔
22 اصل چ موسیٰ نے کہیا سی: ”یہوواہ تواڈا خدا تواڈے بھراواں وچوں میرے ورگا اِک نبی گھلے گا۔ اوہ جو وی توانوں کہوے گا، تُسی اوہدے تے عمل کرنا۔
23 جیہڑا اوس نبی دی گل نئیں سُنے گا، اوہنوں تواڈی قوم چوں مٹا دِتا جائے گا۔“
24 ایہدے علاوہ سموئیل تے اوہدے بعد آن والے سارے نبیاں نے وی ایس زمانے بارے صاف صاف دَسیا سی۔
25 تُسی اوہناں نبیاں دے پُتر او تے اوس عہد دے وارث او جیہڑا خدا نے تواڈے پیو دادیاں نال کیتا سی۔ اوہنے ابراہام نُوں کہیا سی: ”تیری نسل دے ذریعے زمین دے سارے خانداناں نُوں برکت ملے گی۔“
26 خدا نے اپنے خادم* نُوں چُن کے سب توں پہلاں تواڈے کول گھلیا تاکہ اوہ توانوں بھیڑے کماں توں موڑے تے توانوں برکت دَوے۔“
فٹ نوٹ
^ یونانی چ: ”نوواں گھنٹہ۔“
^ یاں، ”خدا دی بندگی۔“
^ یعنی تواڈے دِلاں نُوں یہوواہ وَلّوں سکون ملے۔
^ یعنی یسوع۔
