اِفسیوں دے ناں خط 2:1-22
2 ایہدے علاوہ تُسی اپنیاں غلطیاں تے گُناہواں دی وجہ توں مرے ہوئے سو، پر خدا نے توانوں زندہ کیتا۔
2 تُسی پہلاں دُنیا دے لوکاں وانگوں زندگی گزار رہے سو تے اوس حاکم دی مرضی مطابق چلدے سو جیہڑا دُنیا دی سوچ اُتے اِختیار رکھدا اے۔ ایہہ سوچ* دُنیا چ ہوا وانگوں پھیلی ہوئی اے تے نافرمان لوکاں تے اثر کر رہی اے۔
3 ہاں، اَسی سارے پہلاں دُنیا دے لوکاں وانگوں اپنے جسم دِیاں خواہشاں تے اپنی سوچ مطابق چلنے ساں تے جسم دے کم کرنے ساں تے اپنی پیدائش توں ای باقی لوکاں وانگوں خدا دے قہر دے لائق ساں۔
4 پر خدا بڑا ای رحیم اے تے اوہ ساڈے نال بوہت زیادہ پیار کردا اے۔
5 اوہنے سانوں زندہ کر کے مسیح نال اِک مُٹھ کیتا بھانویں کہ اَسی اپنے گُناہواں دی وجہ توں مرے ہوئے ساں۔اوہدی عظیم رحمت دی وجہ توں توانوں بچایا گیا اے۔
6 ایہدے علاوہ مسیح یسوع نال اِک مُٹھ ہون دی وجہ توں خدا نے سانوں زندہ کیتا تے اسمان چ مسیح نال بیٹھایا
7 تاکہ خدا آن والے زمانے چ ساڈے تے مہربان ہو کے سانوں بےشمار برکتاں دَوے کیونکہ اَسی مسیح یسوع نال اِک مُٹھ آں۔ اوہدی عظیم رحمت واقعی بےمثال اے۔
8 توانوں ایسے عظیم رحمت دی وجہ توں بچایا گیا اے کیونکہ تُسی ایمان لیائے او۔ ایہہ نجات توانوں اپنی وجہ توں نئیں ملی سگوں ایہہ خدا وَلّوں نعمت اے۔
9 ایہہ نجات کسے نُوں اوہدے کماں دی وجہ توں نئیں مِلدی تاکہ کسے انسان نُوں شیخی مارن دا موقع نہ ملے۔
10 اَسی خدا دے ہتھاں دی کاریگری آں تے مسیح یسوع نال اِک مُٹھ ہون دی وجہ توں اوہنے سانوں چنگے کم کرن لئی بلایا اے جیہڑے خدا نے پہلاں توں ای طے کیتے ہوئے سن۔
11 تُسی جیہڑے پیدائشی طور تے غیریہودی او، یاد رکھو کہ اوہ لوک جنہاں دا انساناں دے ہتھیں ختنہ ہویا اے، اوہ پہلاں توانوں کہندے ہوندے سن کہ ”تواڈا تے ختنہ ای نئیں ہویا۔“
12 اوس ویلے تُسی مسیح نُوں نئیں جان دے سو تے اِسرائیلی قوم نال تواڈا کوئی واسطہ نئیں سی۔ نالے خدا نے اوس قوم نال جیہڑے وعدے تے عہد کیتے سن، اوہناں چ تواڈا کوئی حصہ نئیں سی۔تُسی دُنیا چ تے ہے سو، پر تواڈے کول کوئی امید نئیں سی تے تُسی خدا نُوں نئیں جان دے سو۔
13 تُسی پہلاں خدا توں بوہت دُور سو۔ پر مسیح یسوع دے خون دے ذریعے ہُن تُسی اوہدے نال اِک مُٹھ ہو گئے او تے خدا دے نیڑے آ گئے او۔
14 مسیح نے یہودیاں تے غیریہودیاں دے وچکار کھڑی دیوار نُوں ڈھا کے اوہناں نُوں کٹھا کر دِتا تے اوہناں چ صلح کرائی۔
15 اوہنے اپنے جسم دی قربانی دے کے دُشمنی دی وجہ نُوں مٹا دِتا یعنی شریعت نُوں اوہدے حکماں تے قانوناں سمیت ختم کر دِتا تاکہ یہودیاں تے غیریہودیاں دی صلح کرا کے اوہناں نُوں اپنے نال اِک مُٹھ کر لوے تے اوہ اِک نوِیں قوم* بن جان۔
16 نالے اوہنے سُولی* تے اپنی جان قربان کر کے ایہناں دونواں قوماں چ دُشمنی نُوں مٹا دِتا تاکہ اوہدے ذریعے ایہناں دی خدا نال پوری طرحاں صلح ہو جائے تے اوہ اوہدے لئی اِک قوم* بن جان۔
17 اوہنے آ کے توانوں، جیہڑے خدا توں دُور سو تے سانوں، جیہڑے خدا دے نیڑے ساں امن دی خوشخبری سُنائی
18 کیونکہ اوہدی قربانی دی وجہ توں اَسی دونویں یعنی یہودی تے غیریہودی اِکو پاک روح دے ذریعے بغیر کسے رکاوٹ دے باپ دے نیڑے جا سکنے آں۔
19 ایس لئی تُسی ہُن اجنبی تے پردیسی نئیں رہے سگوں توانوں اوہ شہریت مِل گئی اے جیہڑی مُقدس لوکاں کول اے تے تُسی خدا دے گھر دے جی بن گئے او۔
20 تُسی اوہ عمارت او جدی نِیہہ رسول تے نبی نیں تے ایس نِیہہ دا سب توں اہم پتھر مسیح یسوع اے۔
21 ایس پوری عمارت دے سارے حصے اِک دُوجے نال چنگی طرحاں جُڑے ہوئے نیں تے مسیح نال اِک مُٹھ نیں جدی وجہ توں ایہہ عمارت یہوواہ لئی اِک مُقدس ہیکل بن دی جا رہی اے۔
22 تُسی وی جیہڑے مسیح نال اِک مُٹھ او، اِک ایہو جہی عمارت بن رہے او جدے چ خدا اپنی پاک روح دے ذریعے وَسے گا۔
فٹ نوٹ
^ یونانی چ: ”روح۔“
^ یونانی چ: ”نواں انسان۔“
^ ”لفظاں دی وضاحت“ نُوں ویکھو۔
^ یونانی چ: ”جسم۔“
