اِفسیوں دے ناں خط 3:1-21
3 مَیں پولُس ایس لئی قید آں کیونکہ مَیں مسیح یسوع دا شاگرد آں تے مَیں تواڈی یعنی غیریہودیاں دی مدد کیتی اے۔
2 تُسی ضرور سُنیا ہوئے گا کہ خدا نے مینوں تواڈی مدد کرن دی ذمےداری دِتی اے تاکہ تُسی اوہدی عظیم رحمت حاصل کر سکو۔
3 خدا نے میرے تے مُقدس راز ظاہر کیتا جیویں کہ مَیں توانوں پہلاں وی دَسیا اے۔
4 ایس لئی جدوں تُسی ایہہ خط پڑھو گے تے تُسی سمجھ جاؤ گے کہ مینوں مسیح بارے مُقدس راز دی کِنّی سمجھ دِتی گئی اے۔
5 ایہہ راز پچھلیاں پُشتاں تے ظاہر نئیں کیتا گیا سی۔ پر ہُن ایہہ پاک روح دے ذریعے خدا دے مُقدس رسولاں تے نبیاں تے ظاہر کیتا گیا اے۔
6 راز ایہہ سی کہ غیریہودیاں نُوں خوشخبری دے ذریعے تے مسیح یسوع نال اِک مُٹھ ہون دی وجہ توں ساڈے نال وراثت ملے گی۔ نالے اوہ ساڈے نال وعدیاں چ شامل ہون گے تے اَسی سارے اِکو ای جسم دے حصے ہونواں گے۔
7 خدا نے اپنی طاقت دے ذریعے مینوں عظیم رحمت دی نعمت بخشی تاکہ مَیں توانوں ایہہ راز سمجھان دی ذمےداری پوری کر سکاں۔
8 بھانویں کہ سارے مُقدساں وچوں میرا رُتبہ سب توں گھٹ اے، پر فیر وی مینوں ایہہ عظیم رحمت بخشی گئی تاکہ مَیں غیریہودیاں نُوں مسیح دے بےحد قیمتی خزانے بارے خوشخبری سُناواں
9 تے لوکاں نُوں دَساں کہ ساریاں چیزاں دے خالق نے اوس مُقدس راز نُوں ظاہر کرن دا کیہہ اِنتظام کیتا اے جیہڑا اوہنے کئی صدیاں توں لُکا کے رکھیا سی۔
10 ایہہ ایس لئی ہویا تاکہ کلیسیا دے ذریعے اسمانی حکومتاں تے اِختیار والیاں اُتے خدا دی حکمت دے بےشمار پہلو ظاہر ہون۔
11 ایہہ اوس مقصد دے مطابق اے جیہڑا اوہنے صدیاں پہلے ٹھہرایا سی تے جدا تعلق ساڈے مالک یسوع نال اے۔
12 اوہدے ذریعے اَسی بغیر جھجکے گل کر سکنے آں تے پورے بھروسے نال دُعا کر سکنے آں کیونکہ اَسی اوہدے تے ایمان رکھنے آں۔
13 ایس لئی مَیں تواڈی مِنت کرنا واں کہ تُسی اوہناں دُکھاں دی وجہ توں ہمت نہ ہارو جیہڑے مَیں تواڈی خاطر سہہ رہیا واں کیونکہ ایہناں دی وجہ توں خدا توانوں مان بخشے گا۔
14 ایس لئی مَیں اسمانی باپ دے سامنے گوڈے ٹیکنا واں
15 جدی وجہ توں زمین تے اسمان دے سارے خاندان وجود چ آئے نیں۔*
16 میری دُعا اے کہ اوہ اپنی عظیم شان تے پاک روح دی طاقت دے ذریعے تواڈے دِلاں نُوں مضبوط کرے
17 تے تواڈے ایمان دی وجہ توں مسیح تواڈے دِلاں چ وَسے تے تواڈے دل پیار نال بھرے رہن۔ نالے ایہہ وی دُعا اے کہ تواڈیاں جڑاں مضبوط تے ڈُونگیاں ہون تے تُسی نِیہہ تے قائم رہوو
18 تاکہ سارے مُقدس لوکاں دے نال تُسی سچائی دی چوڑائی، لمبائی، اونچائی تے گہرائی نُوں پوری طرحاں سمجھ سکو
19 تے مسیح دے پیار نُوں جان لوو جیہڑا ہر طرحاں دے علم نالوں ودھ کے وے تے تُسی خدا دِیاں ساریاں خوبیاں نال بھر جاؤ۔
20 خدا اپنی پاک روح دے ذریعے جیہڑی ساڈے تے اثر کر رہی اے، ساڈے لئی اوس توں وی کِتے زیادہ ودھ کے کر سکدا اے جو اَسی سوچنے یاں منگنے آں۔
21 کلیسیا تے مسیح یسوع دے ذریعے خدا دی وڈیائی، آن والیاں ساریاں پُشتاں تک ہمیشاں ہمیشاں ہوندی رہوے۔ آمین۔
فٹ نوٹ
^ یونانی چ: ”ہر خاندان نُوں ناں ملیا اے۔“
