اِفسیوں دے ناں خط 5:1-33
5 ایس لئی پیارے بچیاں وانگوں خدا دی مثال تے عمل کرو
2 تے پیار دی راہ تے چلدے رہوو جیویں مسیح نے ساڈے* نال پیار کیتا تے ساڈی* خاطر اپنی جان قربان کر دِتی جیہڑی خدا دے حضور اِک خوشبودار چڑھاوے وانگوں سی۔
3 تواڈے وچ جنسی بدکاری،* کسے وی طرحاں دی ناپاکی یاں لالچ دا ذکر تک نہ ہووے کیونکہ مُقدس لوکاں لئی اِنج کرنا ٹھیک نئیں اے۔
4 نالے تواڈا چالچلن وی بےہودہ نہ ہووے تے نہ ای تُسی فضول گلاں تے گندے مذاق کرو کیونکہ اِنج کرنا صحی نئیں اے۔ ایہدی بجائے تُسی خدا دی شکرگزاری کرو۔
5 تُسی جان دے او تے چنگی طرحاں سمجھ گئے او کہ ایہو جیہا کوئی وی بندہ مسیح تے خدا دی بادشاہی دا وارث نئیں ہوئے گا جیہڑا جنسی بدکاری* کردا اے، ناپاک یاں لالچی اے کیونکہ لالچ بُتپرستی دے برابر اے۔
6 تُسی کسے وی انسان دِیاں فضول گلاں دے دھوکھے چ نہ آؤ کیونکہ ایہو جہیاں گلاں دی وجہ توں نافرمان لوکاں تے خدا دا قہر نازل ہوئے گا۔
7 ایس لئی اوہناں دے کماں چ شامل نہ ہووو
8 کیونکہ تُسی پہلاں نھیرے چ سو، پر ہُن تُسی مالک نال اِک مُٹھ ہون دی وجہ توں روشنی چ آ گئے او۔ ایس لئی روشنی دے پُتراں وانگوں چلدے رہوو
9 کیونکہ جیہڑا روشنی چ چلدا اے اوہ ہر طرحاں دا بھلا کم کردا اے، نیک ہوندا اے تے سچائی دے مطابق زندگی گزاردا اے۔
10 تُسی ہمیشاں ایہہ پتہ کردے رہوو کہ مالک نُوں کیہڑے کم پسند نیں
11 تے اوہ فضول کم کرنے چھڈ دَوو جیہڑے نھیرے چ چلن والے لوک کردے نیں سگوں ایہناں کماں دا پردہفاش کرو۔
12 اوہ لوک چوری چھپے جیہڑے کم کردے نیں، اوہناں دا ذکر کردیاں وی شرم آندی اے۔
13 روشنی چ سارے کماں دا پردہفاش ہو جاندا اے تے اِنج غلط کماں دی اصلیت سامنے آ جاندی اے۔
14 ایس لئی لکھیا اے: ”اَے سون والیا، جاگ تے مُردیاں وچوں اُٹھ پے تے مسیح تیرے تے روشنی وانگوں چمکے گا۔“
15 ایس لئی تُسی اپنے چالچلن تے پورا دھیان رکھو تاکہ تُسی بےوقوفاں وانگوں نئیں سگوں عقلمنداں وانگوں چلو
16 تے اپنے وقت نُوں سمجھداری نال استمال کرو* کیونکہ زمانہ بُرا اے۔
17 ایس لئی ناسمجھ نہ بنو سگوں یہوواہ دی مرضی نُوں سمجھن دی کوشش کردے رہوو۔
18 نالے شرابی نہ بنو کیونکہ شرابی بندہ عیاشی چ پے جاندا اے* سگوں پاک روح نال بھردے جاؤ۔
19 اِک دُوجے دا* حوصلہ ودھان لئی زبور تے گیت گاؤ، خدا دی حمد کرو تے اپنے دِلاں چ یہوواہ دی وڈیائی لئی گاندے وجاندے رہیا کرو۔
20 نالے ساڈے مالک یسوع مسیح دا ناں لے کے ساریاں چیزاں لئی ساڈے خدا تے باپ دی ہمیشاں شکرگزاری کردے رہوو۔
21 مسیح دا احترام کردے ہوئیاں اِک دُوجے دے تابع رہوو۔
22 بیویو، تُسی اپنے اپنے شوہر دے تابع رہوو جیویں تُسی مالک دے تابع او
23 کیونکہ شوہر اپنی بیوی دا سربراہ* اے، بالکل اونویں جیویں مسیح کلیسیا دا سربراہ* اے تے اوہدا* نجاتدہندہ اے۔
24 اصل چ جیویں کلیسیا مسیح دے تابع وے، اوسے طرحاں بیوی نُوں وی ہر گل چ اپنے شوہر دے تابع رہنا چاہی دا اے۔
25 شوہرو، تُسی اپنی اپنی بیوی نال پیار کردے رہوو، بالکل اونویں جیویں مسیح نے کلیسیا نال پیار کیتا تے اوہدے لئی اپنی جان دے دِتی
26 تاکہ اوہ ایہنوں پاک کرے تے خدا دے کلام دے پانی نال دھو کے صاف کرے۔
27 اوہ چاہندا اے کہ کلیسیا اوہدی نظر چ شاندار ہووے تے اوہدے چ کوئی داغ، نُقص* یاں خامی نہ ہووے سگوں اوہ پاک تے بےداغ ہووے۔
28 ایسے طرحاں ہر شوہر اپنی بیوی نُوں اُنج ای پیار کرے جیویں اوہ اپنے جسم نُوں پیار کردا اے۔ جیہڑا شوہر اپنی بیوی نُوں پیار کردا اے، اوہ اصل چ اپنے آپ نُوں پیار کردا اے
29 کیونکہ کوئی وی انسان اپنے جسم نال نفرت نئیں کردا سگوں اوہنوں کھواندا پیاندا اے تے بڑے پیار نال اوہدی دیکھبھال کردا اے، بالکل اُنج ای جیویں مسیح کلیسیا دی دیکھبھال کردا اے
30 کیونکہ اَسی سارے اوہدے جسم دے حصے آں۔
31 ”ایس لئی مرد اپنے ماں پیو نُوں چھڈ کے اپنی بیوی نال رہوے گا تے اوہ دونویں اِک جسم ہون گے۔“
32 اصل چ مَیں جیس مُقدس راز دی گل کر رہیا واں، اوہ مسیح تے کلیسیا بارے وے تے بڑا اہم اے۔
33 فیر وی تُسی سارے اپنی اپنی بیوی نال اُنج ای پیار کرو جیویں تُسی اپنے آپ نال کردے او تے بیوی اپنے شوہر دی دِلوں عزت کرے۔
فٹ نوٹ
^ یاں شاید، ”تواڈے۔“
^ یاں شاید، ”تواڈی۔“
^ یونانی چ: ”پورنیا۔“ ”لفظاں دی وضاحت“ نُوں ویکھو۔
^ ”لفظاں دی وضاحت“ چ ”جنسی بدکاری“ نُوں ویکھو۔
^ یونانی چ: ”وقت نُوں خریدو۔“
^ یاں شاید، ”بےقابو ہو جاندا اے۔“
^ یاں شاید، ”اپنا۔“
^ یونانی چ: ”سِر۔“
^ یونانی چ: ”سِر۔“
^ یونانی چ: ”ایس جسم دا۔“
^ یونانی چ: ”جُھری۔“
