طِطُس دے ناں خط 2:1-15
2 پر تُوں اوہ گلاں دَسدا رہ جیہڑیاں صحی* تلیم دے مطابق نیں۔
2 وڈی عمر دے آدمیاں نُوں چنگیاں عادتاں دے مالک، پُختہ* تے سمجھدار ہونا چاہی دا اے۔ اوہناں نُوں مضبوط ایمان، پیار تے مشکلاں چ صبر رکھن والے ہونا چاہی دا اے۔
3 ایسے طرحاں وڈی عمر والیاں عورتاں دے چالچلن توں ظاہر ہونا چاہی دا اے کہ اوہ خدا دا خوف رکھدیاں نیں۔ اوہناں نُوں دُوجیاں بارے جھوٹھیاں گلاں نئیں پھیلانیاں چاہی دِیاں تے نہ ای اوہناں نُوں زیادہ مے پین دی عادت ہونی چاہی دی اے سگوں اوہناں نُوں چنگیاں گلاں سکھانیاں چاہی دِیاں نیں
4 تاکہ اوہ جوان عورتاں نُوں نصیحت* کر سکن کہ اوہ اپنے شوہر تے بچیاں نُوں پیار کرن
5 تے سمجھدار تے نیک ہون۔ نالے پاک چالچلن رکھن والیاں تے اپنے گھر بار نُوں سنبھالن والیاں ہون۔ اوہ اپنے شوہر دے تابع ہون تاکہ خدا دے کلام دی بدنامی نہ ہووے۔
6 ایسے طرحاں تُوں جوان بھراواں نُوں وی تاکید کردا رہ کہ اوہ سمجھدار ہون۔
7 تُوں ہر معاملے چ چنگے کم کر کے دُوجیاں لئی اِک ودھیا مثال بن۔ پورے احترام* نال سچیاں گلاں سکھا۔*
8 تلیم دیندے ویلے صحی* تے حوصلہ دین والیاں گلاں کر جنہاں چوں کوئی نُقص نہ کڈھ سکے تاکہ ساڈی مخالفت کرن والے شرمندہ ہون تے اوہناں نُوں ساڈے بارے کوئی بھیڑی گل کہن دا موقع نہ ملے۔
9 غلام ہر معاملے چ اپنے مالکاں دے تابع رہن، اوہناں نُوں خوش کرن دی کوشش کرن، بدتمیزی نال جواب نہ دین
10 تے اوہناں دی کوئی چیز چوری نہ کرن سگوں پوری طرحاں بھروسے دے لائق ہون تاکہ اوہ ہر معاملے چ ساڈے نجات دین والے خدا دی تلیم دی شان ودھا سکن۔
11 خدا نے اپنی عظیم رحمت ظاہر کیتی اے جدے ذریعے ہر طرحاں دے لوکاں نُوں نجات مِلدی اے۔
12 ایہہ عظیم رحمت سانوں سکھاندی اے کہ اَسی بُرائی تے دُنیا دِیاں خواہشاں نُوں ردّ کریئے تے ایس زمانے چ خدا دی بندگی کردے ہوئیاں سمجھداری تے نیکی نال زندگی گزاریئے۔
13 ایہدے نال نال آؤ اَسی اوس ویلے دا اِنتظار کردے رہیے جدوں ساڈی شاندار امید پوری ہوئے گی تے ساڈے عظیم خدا تے ساڈے نجاتدہندہ یسوع مسیح دی شان ظاہر ہوئے گی۔
14 یسوع مسیح نے ساڈے لئی اپنی جان قربان کیتی تاکہ اوہ سانوں ہر طرحاں دی بُرائی توں آزاد* کرے تے سانوں پاک کر کے اپنی قوم بنا لوے جیہڑی اوہدی خاص ملکیت ہووے تے جوش نال چنگے کم کرے۔
15 تُوں پورے اِختیار نال ایہہ گلاں سکھاندا رہ، نصحیتاں* دیندا رہ تے درستی کردا رہ۔ کوئی وی تیرے اِختیار دی بےقدری نہ کرے۔
فٹ نوٹ
^ یاں، ”فائدےمند۔“
^ یونانی چ: ”سنجیدہ۔“
^ یاں، ”تربیت۔“
^ یونانی چ: ”سنجیدگی۔“
^ یاںشاید، ”سچے دل نال تلیم دے ۔“
^ یاں، ”فائدےمند۔“
^ یونانی چ: ”فدیہ دے کے رِہا کرے، چھڈاوے۔“
^ یاں، ”حوصلہ۔“
