فِلپّیوں دے ناں خط 3:1-21
3 میرے بھراوو، آخر چ مَیں توانوں کہنا چاہنا واں کہ مالک نال اِک مُٹھ ہون دی وجہ توں خوش رہوو۔ توانوں ایہہ گلاں دُبارہ لکھن چ مینوں کوئی مسئلہ نئیں کیونکہ ایہہ تواڈے بھلے لئی نیں۔
2 جھوٹھے اُستاداں* توں خبردار رہوو، دُوجیاں نُوں نقصان پونچان والیاں توں خبردار رہوو۔ اوہناں لوکاں توں وی خبردار رہوو جیہڑے ختنہ کران تے زور دیندے نیں۔*
3 اصلی ختنہ تے ساڈا ہویا اے کیونکہ اَسی خدا دی روح دی رہنمائی چ پاک خدمت کرنے آں تے اَسی جسمانی گلاں اُتے نئیں سگوں مسیح یسوع اُتے فخر* کرنے آں۔
4 پر اصل چ میرے کول جسمانی گلاں اُتے فخر کرن دی وجہ ہے وے۔
ویکھیا جائے تے مَیں دُوجیاں نالوں بوہتا جسمانی گلاں تے فخر کر سکنا واں۔
5 مثال لئی، اَٹھویں دن میرا ختنہ ہویا، مَیں اِسرائیلی قوم چوں بنیمین دے قبیلے دا واں تے عبرانی ماں پیو دا عبرانی پُتر آں تے اِک فریسی دے طور تے شریعت دی سختی نال پابندی کرنا ساں۔
6 مَیں ایناں جوشیلا ساں کہ مسیحیاں تے ظلم کرنا ساں۔ مَیں شریعت تے عمل کر کے اپنے آپ نُوں بےاِلزام ثابت کیتا۔
7 ایہناں چیزاں نُوں مَیں فائدےمند سمجھنا ساں۔ پر ہُن مَیں ایہناں نُوں مسیح دی خاطر بےکار سمجھنا واں۔*
8 اصل چ مَیں اپنے مالک مسیح یسوع بارے قیمتی علم دے سامنے باقی ساریاں چیزاں نُوں بےکار سمجھنا واں۔ اوہدی خاطر مَیں ساریاں چیزاں نُوں ٹھوکر ماری اے تے اوہناں نُوں کُوڑے دا ڈھیر سمجھنا واں تاکہ مَیں مسیح نُوں پا سکاں
9 تے اوہدے نال اِک مُٹھ ہو جاواں۔ مینوں شریعت تے عمل کرن دی وجہ توں نیک نئیں ٹھہرایا گیا سگوں مسیح تے ایمان لیان دی وجہ توں نیک ٹھہرایا گیا اے کیونکہ خدا اوہناں نُوں نیک ٹھہراندا اے جیہڑے ایمان رکھدے نیں۔
10 میری خواہش اے کہ مَیں مسیح نُوں جاناں تے اوہنوں زندہ کرن والے دی طاقت نُوں جاناں تے اوہدے وانگوں دُکھ سہواں تے اوہدے ورگی موت مراں
11 تاکہ جے ہو سکے تے مَیں اوہناں لوکاں چ شامل ہونواں جنہاں نُوں مُردیاں چوں سب توں پہلاں زندہ کیتا جائے گا۔
12 مَیں ایہہ نئیں کہندا کہ مینوں انعام مِل گیا اے یاں مَیں منزل تے پونچ گیا واں سگوں مَیں اپنی پوری وا لا رہیا واں تاکہ اوہ مقصد پورا کر سکاں جدے لئی مسیح یسوع نے مینوں چُنیا اے۔
13 بھراوو، مَیں ایہہ نئیں سوچدا کہ مَیں انعام حاصل کر لیا اے۔ پر اِک گل پکی اے، مَیں پچھے چھڈیاں ہوئیاں چیزاں نُوں بُھل کے اوہناں چیزاں وَل ودھ رہیا واں جیہڑیاں میرے سامنے نیں۔
14 مَیں پوری وا لا رہیا واں تاکہ انعام یعنی اسمان تے اوہ زندگی حاصل کر سکاں جدے لئی خدا نے مینوں مسیح یسوع دے ذریعے بلایا اے۔
15 اَسی سارے جیہڑے پُختہ واں، سانوں ایہی صحی سوچ رکھنی چاہی دی اے۔ جے کسے معاملے بارے تواڈے چوں کسے دی سوچ فرق اے تے خدا اوہدے تے صحی سوچ نُوں ظاہر کر دے گا۔
16 بہرحال اَسی جِنّی وی ترقی کیتی اے، آؤ سچائی دی راہ تے اَگے ودھدے رہیے۔
17 بھراوو، تُسی سارے میری مثال تے عمل کرو تے اوہناں لوکاں تے وی غور کرو جیہڑے اوس مثال تے چلدے نیں جیہڑی اَسی تواڈے لئی قائم کیتی اے۔
18 کئی لوک ایہو جہے وی ہے نیں جنہاں بارے مَیں اکثر گل کرنا ساں۔ پر ہُن اوہناں بارے گل کردے ہوئیاں میریاں اَکھاں چ اتھرو آ جاندے نیں کیونکہ اوہ مسیح دی سُولی* دے دُشمن بن گئے نیں۔
19 اوہناں دا انجام تباہی اے تے اوہناں دا خدا، اوہناں دا ٹیڈھ اے۔ اوہ اوہناں گلاں تے فخر کردے نیں جنہاں تے اوہناں نُوں شرم آنی چاہی دی اے۔ اوہ بس دُنیا دِیاں چیزاں بارے سوچدے رہندے نیں۔
20 پر اَسی اسمان دے شہری آں تے بڑی بےتابی نال اپنے نجاتدہندہ یعنی مالک یسوع مسیح دا اِنتظار کر رہے آں جیہڑا اسمان توں آئے گا۔
21 اوہ اپنی عظیم طاقت دے ذریعے ساڈے معمولی جسماں نُوں بدل کے اپنے جسم ورگا شاندار بنا دے گا تے ایسے طاقت دے ذریعے اوہ ساریاں چیزاں نُوں اپنے تابع کر لے گا۔
فٹ نوٹ
^ یونانی چ: ”کُتیاں۔“
^ یونانی چ: ”جسم نُوں زخمی کردے نیں۔“
^ یونانی چ: ”بھروسا۔“
^ یاں شاید، ”مسیح دی خاطر خوشی خوشی چھڈ دِتا اے۔“
^ ”لفظاں دی وضاحت“ نُوں ویکھو۔
