فلیمون دے ناں خط 1:1-25
1 مَیں پولُس جیہڑا مسیح یسوع دی خدمت دی وجہ توں قید آں، بھرا تیمُتھیُس نال مِل کے ایہہ خط ساڈے بھرا تے ہمخدمت فلیمون دے ناں لکھ رہیا واں۔
2 نالے ایہہ خط تیرے گھر چ جمع ہون والی کلیسیا، ساڈی بھین افیہ تے ارخِپُس لئی وی اے جیہڑا ساڈے وانگوں مسیح دا فوجی اے۔
3 دُعا اے کہ ساڈا باپ خدا تے ساڈا مالک یسوع مسیح توانوں عظیم رحمت تے سلامتی بخشن۔
4 جدوں وی مَیں اپنیاں دُعاواں چ تیرا ذکر کرنا واں تے مَیں اپنے خدا دا شکر کرنا واں
5 کیونکہ مَیں تیرے ایمان تے اوس پیار بارے سُن دا رہنا واں جیہڑا تُوں ساڈے مالک یسوع تے سارے مُقدس لوکاں نال کرنا ایں۔
6 میری دُعا اے کہ تُوں اوس ایمان دے وسیلے جیہڑا اَسی سارے وی رکھنے آں، ہر اوس چنگی چیز نُوں پچھان جائیں جیہڑی سانوں مسیح دے ذریعے ملی اے۔
7 میرے بھرا، تیرے پیار بارے سُن کے مینوں بڑی تسلی تے خوشی ملی اے کیونکہ تیرے ذریعے مُقدس لوکاں دے دِلاں نُوں تازگی ملی اے۔
8 ایس لئی بھانویں کہ مَیں مسیح دا رسول ہون دی وجہ توں تینوں سِدھا سِدھا حکم وی دے سکنا واں کہ تینوں کیہہ کرنا چاہی دا اے،
9 پر ایہدی بجائے مَیں محبت دا واسطہ دے کے تینوں درخاست کرنا واں کیونکہ مَیں پولُس اِک وڈیرا آدمی آں تے مسیح یسوع دی خدمت دی وجہ توں ہُن اِک قیدی وی آں۔
10 مَیں اپنے بچے اُنیسمس لئی تیرے کولوں درخاست کر رہیا واں کیونکہ میری قید* دے دوران اوہ میرے لئی پُتر وانگوں بن گیا۔
11 اوہ پہلاں تیرے کسے کم دا نئیں سی۔ پر ہُن اوہ تیرے تے میرے دونواں لئی بڑے کم دا اے۔
12 مَیں اوہنوں، ہاں اپنے کلیجے دے ٹکڑے نُوں تیرے کول واپس گھل رہیا واں۔
13 مَیں اوہنوں اپنے کول رکھنا چاہنا واں تاکہ جدوں تک مَیں خوشخبری دی وجہ توں قید چ آں، تیری جگہ اوہ میری خدمت کرے۔
14 پر مَیں تیری اجازت دے بغیر کجھ نئیں کرنا چاہندا تاکہ تُوں ایہہ بھلا کم مجبور ہو کے نئیں سگوں اپنی مرضی نال کریں۔
15 شاید اوہ ایسے وجہ توں تھوڑے چِر* لئی تینوں چھڈ کے چلا گیا سی تاکہ ہمیشاں لئی تیرے کول واپس آ جائے۔
16 پر اِک غلام دے طور تے نئیں سگوں ایس توں وی ودھ کے یعنی اِک پیارے بھرا دے طور تے۔ مینوں اوہدے نال بوہت پیار اے۔ پر تینوں تے اوہدے نال ہور وی زیادہ پیار ہوئے گا کیونکہ ہُن اوہ تیرا غلام ای نئیں سگوں تیرا مسیحی بھرا وی اے۔
17 ایس لئی جے تُوں مینوں اپنا دوست* سمجھنا ایں تے تُوں اوہنوں اوسے طرحاں ملِیں جیویں تُوں مینوں مِلدا۔
18 ایہدے علاوہ جے اوہنے تیرا کوئی نقصان کیتا اے یاں تیرا کوئی اُدھار دینا اے تے اوہنوں میرے کھاتے چ پا دوِیں۔
19 مَیں پولُس اپنے ہتھیں لکھ رہیا واں کہ جو وی تیرا بن دا اے، مَیں دے دَواں گا۔ نالے مینوں ایہہ دَسن دی لوڑ نئیں کہ تُوں آپ اپنی زندگی لئی میرا قرضدار ایں۔
20 میرے بھرا، ساڈے مالک دی خاطر میرے تے ایہہ مہربانی کر دے۔ ہاں، مسیح دی خاطر میرے دل نُوں خوش کردے۔
21 مَیں تینوں ایس لئی لکھ رہیا واں کیونکہ مینوں پورا یقین اے کہ تُوں میری گل منیں گا۔ تے مَیں تینوں جو کرن لئی کہواں گا تُوں اوہدے توں وی ودھ کے میرے لئی کریں گا۔
22 نالے میرے ٹھہرن دا وی اِنتظام کرِیں کیونکہ مینوں امید اے کہ تواڈیاں دُعاواں دی وجہ توں مَیں قید توں رِہا ہو کے توانوں چھیتی مِلن آواں گا۔
23 اِپَفراس وَلّوں سلام جیہڑا میرے وانگوں مسیح یسوع تے ایمان رکھن دی وجہ توں قید اے۔
24 نالے میرے ہمخدمت مرقس، ارِسترخس، دیماس تے لُوقا وَلّوں وی سلام۔
25 میری دُعا اے کہ تواڈے نیک جذبے دی وجہ توں مالک یسوع مسیح دی عظیم رحمت تواڈے تے ہووے۔
