لُوقا دی اِنجیل 1:1-80
-
تھیُفِلُس دے ناں (1-4)
-
جبرائیل نے یوحنا بپتسمہ دین والے دی پیدائش دی پیشینگوئی کیتی (5-25)
-
جبرائیل نے یسوع دی پیدائش دی پیشینگوئی کیتی (26-38)
-
مریم الیشبع نُوں مِلن جاندی اے (39-45)
-
مریم یہوواہ دی وڈیائی کردی اے (46-56)
-
یوحنا دی پیدائش تے اوہدا ناں رکھنا (57-66)
-
زکریاہ دی پیشینگوئی (67-80)
1 جناب تھیُفِلُس، سانوں جیہڑیاں گلاں تے پورا یقین اے، اوہناں بارے بوہت سارے لوکاں نے معلومات کٹھی کر کے لکھی اے۔
2 سانوں ایہہ گلاں اوہناں لوکاں نے دَسیاں نیں جنہاں نے شروع توں ایہناں نُوں اپنی اَکھیں ویکھیا سی تے ایہناں بارے پیغام سُنایا سی۔
3 مَیں وی فیصلہ کیتا اے کہ مَیں تواڈے لئی ایہہ گلاں ترتیب نال لکھاں گا کیونکہ مَیں بڑے دھیان نال ایہناں گلاں بارے پتہ کیتا اے تے صحی معلومات کٹھی کیتی اے
4 تاکہ توانوں پتہ چل جائے کہ توانوں جیہڑیاں گلاں زبانی سکھائیاں گئیاں سن، اوہ بالکل سچیاں نیں۔
5 یہودیہ دے بادشاہ ہیرودیس دے زمانے چ اِک کاہن سی جدا ناں زکریاہ سی تے اوہ ابیاہ دے گھرانے چوں سی۔ اوہدی بیوی دا ناں الیشبع سی جیہڑی ہارون دی نسل چوں سی۔
6 اوہ دونویں بےاِلزام تے خدا دی نظر چ نیک سن تے یہوواہ دے سارے حکماں تے قانوناں دے مطابق چلدے سن۔
7 پر اوہناں دی کوئی اولاد نئیں سی کیونکہ الیشبع بانجھ سی تے اوہناں دونواں دی عمر وی کافی ہو گئی سی۔
8 زکریاہ کاہن اپنے گھرانے دی واری دے مطابق ہیکل چ خدا دے حضور خدمت کر رہیا سی۔
9 جدوں کاہناں دے رواج مطابق بخور بالن لئی اوہدی واری آئی تے اوہ یہوواہ دی ہیکل دے پاک کمرے چ گیا۔
10 اوہدوں بوہت سارے لوک باہر دُعا کر رہے سن کیونکہ اوہ بخور بالن دا ویلا سی۔
11 فیر اوہنوں یہوواہ دا اِک فرشتہ نظر آیا جیہڑا بخور دی قربانگاہ دے سجے پاسے کھلوتا ہویا سی۔
12 زکریاہ اوہنوں ویکھ کے گھبرا گیا تے بوہت ڈر گیا۔
13 پر فرشتے نے اوہنوں کہیا: ”زکریاہ نہ ڈر کیونکہ خدا نے تیری اِلتجا سُن لئی اے۔ تیری بیوی الیشبع دا پُتر ہوئے گا تے تُوں اپنے پُتر دا ناں یوحنا رکِھیں۔
14 تیری جھولی خوشیاں نال بھر جائے گی تے بوہت سارے لوک اوہدی پیدائش تے خوش ہون گے
15 کیونکہ اوہ یہوواہ دی نظر چ عظیم ہوئے گا۔ پر اوہ مے یاں کسے ہور طرحاں دی شراب بالکل نہ پیئے۔ اوہ اپنی پیدائش توں پہلاں ای* پاک روح نال بھریا ہوئے گا۔
16 اوہ کئی اِسرائیلیاں نُوں اوہناں دے خدا یہوواہ وَل موڑ لیائے گا۔
17 اوہ ایلیاہ ورگے جوش تے طاقت نال خدا دے اَگے اَگے جائے گا تاکہ جیہڑے پیو نیں، اوہناں دے دِلاں نُوں بچیاں دے دِلاں ورگا بنا دَوے* تے نافرمان لوکاں دی مدد کرے کہ اوہ سمجھدار بنن تے نیکی کرن۔ اِنج اوہ لوکاں نُوں یہوواہ لئی تیار کرے گا۔“
18 زکریاہ نے فرشتے نُوں کہیا: ”مَیں ایس گل تے یقین کیویں کراں؟ مَیں تے بُڈھا ہو گیا واں تے میری بیوی دی عمر وی کافی ہو گئی اے۔“
19 فرشتے نے اوہنوں کہیا: ”مَیں جبرائیل آں تے خدا دے حضور کھلوتا رہنا واں۔ اوہنے ای مینوں تیرے کول گھلیا اے تاکہ مَیں تینوں ایہہ خوشخبری سُناواں۔
20 پر تُوں میریاں گلاں دا یقین نئیں کیتا جیہڑیاں طے کیتے ہوئے ویلے تے ضرور پوریاں ہون گیاں۔ ایس لئی ویکھ، تُوں گُونگا ہو جائیں گا تے اوہدوں تک بول نئیں سکیں گا جدوں تک ایہہ گلاں پوریاں نہ ہو جان۔“
21 اوس ویلے لوک باہر زکریاہ دا اِنتظار کر رہے سن تے سوچ رہے سن کہ اوہ پاک کمرے چ اینی دیر کیوں لا رہیا اے۔
22 جدوں زکریاہ باہر آیا تے اوہ لوکاں نال کوئی گل نہ کر سکیا۔ اوہ سمجھ گئے کہ اوہنے پاک کمرے چ ضرور کوئی رُویا ویکھی ہونی اے۔ گُونگا ہون دی وجہ توں اوہ اوہناں نال اشاریاں چ گلاں کردا رہیا۔
23 جدوں ہیکل چ زکریاہ دی خدمت دے دن پورے ہو گئے تے اوہ اپنے گھر چلا گیا۔
24 کجھ دِناں بعد زکریاہ دی بیوی الیشبع حاملہ ہو گئی تے پنج مہینے تک گھروں باہر نہ نکلی۔ اوہنے کہیا:
25 ”یہوواہ نے ایس عمر چ میرے تے مہربانی کیتی اے۔ اوہنے میرے تے دھیان دِتا اے تاکہ لوکاں چ میری رُسوائی نُوں دُور کرے۔“
26 جدوں الیشبع دا چھیواں مہینہ چل رہیا سی تے خدا نے اپنے فرشتے جبرائیل نُوں گلیل دے شہر ناصرت چ
27 اِک کنواری کول گھلیا۔ اوہدی منگنی داؤد دے گھرانے چوں یوسف ناں دے اِک بندے نال ہوئی سی۔ اوس کنواری دا ناں مریم سی۔
28 جبرائیل نے گھر دے اندر جا کے مریم نُوں کہیا: ”سلام، یہوواہ تیرے توں بوہت خوش اے تے تیرے نال اے۔“
29 پر مریم فرشتے دی ایہہ گل سُن کے بوہت گھبرا گئی تے سوچن لگ پئی کہ اوہدی گل دا کیہہ مطلب اے۔
30 ایس لئی فرشتے نے اوہنوں کہیا: ”مریم، گھبرا نہ کیونکہ تیرے تے خدا دی مہربانی ہوئی اے۔
31 ویکھ، تُوں حاملہ ہوئیں گی تے تیرا اِک پُتر ہوئے گا۔ تُوں اوہدا ناں یسوع رکِھیں۔
32 اوہ عظیم ہوئے گا تے اوہنوں خدا تعالیٰ دا پُتر کہیا جائے گا تے یہوواہ خدا اوہدے پیو داؤد دا تخت اوہنوں دَوے گا
33 تے اوہ یعقوب دے گھرانے اُتے ہمیشاں بادشاہی کرے گا تے اوہدی بادشاہی کدی ختم نئیں ہوئے گی۔“
34 پر مریم نے فرشتے نُوں کہیا: ”ایہہ کیویں ہو سکدا اے؟ میرا تے حالے ویاہ وی نئیں ہویا۔“*
35 فرشتے نے اوہنوں کہیا: ”خدا دی پاک روح تیرے تے نازل ہوئے گی تے خدا تعالیٰ دی طاقت تیرے تے سایہ کرے گی۔ ایسے لئی اوس بچے نُوں مُقدس تے خدا دا پُتر کہیا جائے گا۔
36 ویکھ، تیری رشتےدار الیشبع جنہوں لوک بانجھ کہندے سن، اوہ وی بڑھاپے چ حاملہ ہوئی اے۔ اوہدا چھیواں مہینہ چل رہیا اے تے اوہدا پُتر پیدا ہوئے گا
37 کیونکہ ہو نئیں سکدا کہ خدا دی کہی ہوئی گل پوری نہ ہوئے۔“
38 فیر مریم نے کہیا: ”ویکھ، مَیں یہوواہ دی بندی آں۔ جیویں تُوں کہیا اے، اُنج ای ہووے۔“ ایہدے بعد جبرائیل اوتھوں چلا گیا۔
39 ایس لئی اوہناں دِناں چ مریم چھیتی چھیتی یہوداہ دے اِک پہاڑی شہر وَل ٹُر پئی
40 تے زکریاہ دے گھر گئی۔ اوتھے اوہنے الیشبع نُوں سلام کیتا۔
41 جیویں ای الیشبع نے مریم دی آواز سُنی تے اوہدے پیٹ چ بچہ اُچھل پیا۔ الیشبع پاک روح نال بھر گئی
42 تے اوہنے اُچی آواز چ کہیا: ”عورتاں وچوں تُوں مبارک ایں تے مبارک اے تیرے پیٹ دا پھل۔
43 میرے لئی ایہہ بڑے مان دی گل اے کہ میرے مالک دی ماں مینوں مِلن آئی اے
44 کیونکہ ویکھ، جیویں ای تیری آواز میرے کناں چ پئی تے میرے پیٹ چ بچہ خوشی دے مارے اُچھل پیا۔
45 خوش ہو کہ تُوں یہوواہ دِیاں ساریاں گلاں تے یقین کیتا کیونکہ اوہ اوہناں نُوں ضرور پورا کرے گا۔“
46 مریم نے کہیا: ”میری جان یہوواہ دی وڈیائی کردی اے۔
47 خدا میرا نجاتدہندہ اے تے اوہدے توں میرا دل بڑا خوش اے
48 کیونکہ اوہنے اپنی ایس معمولی جہی بندی وَل دھیان دِتا اے۔ ویکھو، آن والیاں ساریاں پُشتاں مینوں مبارک کہن گیاں
49 کیونکہ طاقتور خدا نے میرے لئی وڈے وڈے کم کیتے نیں تے اوہدا ناں پاک اے۔
50 جیہڑے اوہدے توں ڈردے نیں، اوہ اوہناں دی ہر پُشت اُتے رحم کردا اے۔
51 اوہنے اپنی بانہہ دے زور نال زبردست کم کیتے نیں تے گھمنڈی لوکاں نُوں تتربتر کر دِتا اے کیونکہ اوہناں دے دِلاں چ کھوٹ اے۔
52 اوہنے حاکماں دے تخت اُلٹ دِتے نیں تے معمولی لوکاں نُوں اُچا کیتا اے۔
53 اوہنے چنگیاں چیزاں نال بُھکھیاں دا پیٹ بھریا اے تے امیراں نُوں خالی ہتھ گھلیا اے۔
54 اوہ اپنے خادم اِسرائیل دی مدد کرن آیا اے کیونکہ اوہنے ساڈے پیو دادیاں نال وعدہ کیتا سی کہ
55 اوہ ابراہام تے اوہدی اولاد اُتے ہمیشاں رحم کردا رہوے گا۔“
56 مریم تِن مہینے تک الیشبع دے نال رہی تے فیر اپنے گھر چلی گئی۔
57 فیر الیشبع دا بچہ پیدا کرن دا ویلا آ گیا تے اوہنے اِک پُتر جمیا۔
58 جدوں اوہدے گوانڈھیاں تے رشتےداراں نے سُنیا کہ یہوواہ نے اوہدے تے بڑی مہربانی کیتی اے تے اوہناں نے اوہدے نال خوشی منائی۔
59 اوہ اَٹھویں دن آئے جدوں بچے دا ختنہ ہونا سی۔ اوہ اوہدا ناں اوہدے پیو دے ناں تے زکریاہ رکھنا چاہندے سن۔
60 پر اوہدی ماں نے کہیا: ”نئیں، ایہدا ناں یوحنا ہوئے گا۔“
61 پر اوہناں نے کہیا: ”تیرے کسے وی رشتےدار دا ایہہ ناں نئیں اے۔“
62 فیر اوہناں نے اشاریاں نال بچے دے پیو نُوں پچھیا کہ اوہ اوہدا ناں کیہہ رکھنا چاہندا اے۔
63 ایس لئی اوہنے اِک تختی منگوائی تے اوہدے تے لکھیا: ”ایہدا ناں یوحنا اے۔“ ایہہ ویکھ کے سارے بوہت حیران ہو گئے۔
64 اوسے ویلے اوہدی زبان کُھل گئی تے اوہ بولن لگ پیا تے خدا دی وڈیائی کرن لگ پیا۔
65 اوہناں دے آنڈگوانڈھ دے سارے لوکاں چ ڈر پھیل گیا تے یہودیہ دے سارے پہاڑی علاقے چ ایہناں ساریاں گلاں دی خبر پھیل گئی۔
66 جنہاں نے وی ایہہ گلاں سُنیاں، اوہناں نے ایہناں نُوں اپنے دل چ رکھیا تے کہیا: ”ایہہ بچہ وڈا ہو کے کیہہ کیہہ کرے گا؟“ اوہناں نے ایہہ ایس لئی کہیا کیونکہ بچے تے یہوواہ دا ہتھ سی۔
67 فیر اوہدا پیو زکریاہ پاک روح نال بھر گیا تے اوہنے خدا وَلّوں ایہہ پیغام سُنایا:
68 ”اِسرائیل دے خدا یہوواہ دی وڈیائی ہووے کیونکہ اوہنے اپنے بندیاں وَل دھیان دِتا اے تے اوہناں نُوں نجات دَوائی اے۔
69 اوہنے اپنے خادم داؤد دے گھرانے چوں ساڈے لئی اِک طاقتور نجاتدہندہ پیدا کیتا اے*
70 جیویں کہ اوہنے پرانے زمانے چ اپنے پاک نبیاں دے ذریعے کہیا سی
71 کہ اوہ سانوں ساڈے دُشمناں تے ساڈے توں نفرت کرن والے سارے لوکاں توں نجات دَوائے گا۔
72 نالے اوہ ساڈے پیو دادیاں نال کیتے ہوئے اپنے وعدے دے مطابق ساڈے تے رحم کرے گا تے اپنے مُقدس عہد نُوں یاد کرے گا
73 یعنی اوس عہد نُوں جیہڑا اوہنے ساڈے پیو ابراہام نال کیتا سی
74 کہ اوہ سانوں دُشمناں دے ہتھوں چھڈا کے سانوں ایہہ مان بخشے گا کہ اَسی دلیری نال اوہدی خدمت کریئے
75 تاکہ اَسی اپنی ساری زندگی اوہدیاں نظراں چ نیک تے وفادار رہیے۔
76 پر تینوں میرے پُتر، خدا تعالیٰ دا نبی کہیا جائے گا کیونکہ تُوں یہوواہ دے اَگے اَگے جا کے اوہدیاں راہواں تیار کریں گا۔
77 تُوں اوہدے لوکاں نُوں ایہہ پیغام دَویں گا کہ خدا اوہناں دے گُناہ معاف کر کے اوہناں نُوں نجات دَوے گا
78 کیونکہ ساڈا خدا بڑا ہمدرد تے رحمدل اے۔ جیویں سورج چڑھدے ویلے اسمان توں روشنی چمکدی اے، اوسے طرحاں اوہدا رحم
79 ہنیرے تے موت دے سائے چ بیٹھے ہوئے لوکاں نُوں روشنی بخشے گا۔ ایہہ روشنی سانوں صلح دی راہ تے لے جائے گی۔“
80 اوہ بچہ وڈا تے سمجھدار* ہوندا گیا تے اوہدوں تک ویرانے چ رہیا جدوں تک اوہنے اِسرائیل چ مُنادی شروع نئیں کیتی۔
فٹ نوٹ
^ یاں، ”اپنی ماں دے پیٹ چ۔“
^ یونانی چ: ”بچیاں وَل موڑے۔“
^ یونانی چ: ”مَیں تے حالے کنواری آں۔“
^ یونانی چ: ”نجات دا سینگ کھڑا کیتا اے۔“
^ یاں، ”پُختہ۔“
