لُوقا دی اِنجیل 11:1-54
11 یسوع اِک جگہ دُعا کر رہیا سی۔ جدوں اوہنے دُعا ختم کیتی تے اوہدے اِک شاگرد نے اوہنوں کہیا: ”مالک، سانوں وی دُعا کرنا سکھا جیویں یوحنا نے اپنے شاگرداں نُوں سکھایا سی۔“
2 ایس لئی یسوع نے اوہناں نُوں کہیا: ”جدوں وی تُسی دُعا کرو تے کہوو: ”اَے باپ، تیرا ناں پاک منیا جائے۔* تیری بادشاہی آئے۔
3 سانوں ہر روز ساڈی ضرورت دے مطابق روٹی دے
4 تے ساڈے گُناہ معاف کر کیونکہ اَسی اوہناں ساریاں نُوں معاف کرنے آں جیہڑے ساڈے خلاف گُناہ کردے نیں۔* نالے سانوں اَزمیش چ نہ پین دے۔““
5 فیر یسوع نے اوہناں نُوں کہیا: ”فرض کرو کہ تُسی اَدھی رات نُوں اپنے دوست کول جا کے کہندے او: ”یار، مینوں تِن روٹیاں تے دے
6 کیونکہ میرا اِک دوست بڑی دُوروں میرے گھر آیا اے تے میرے کول اوہنوں کھوان لئی کجھ نئیں اے۔“
7 پر اوہدا دوست اندروں جواب دیندا اے: ”مینوں پریشان نہ کر۔ دروازے تے تالا لگیا ہویا اے تے بچے وی میرے نال سُتے پئے نیں۔ مَیں اُٹھ کے تینوں کجھ نئیں دے سکدا۔“
8 پر مَیں توانوں کہنا واں کہ اوہ اُٹھ کے اوہنوں جو وی چاہی دا اے ضرور دَوے گا، دوستی دے ناتے نئیں سگوں ایس لئی کیونکہ اوہ اوہدے کولوں وار وار منگدا رہیا۔*
9 ایس لئی مَیں توانوں کہنا واں، منگدے رہوو تے توانوں دِتا جائے گا، لبھدے رہوو تے توانوں مِل جائے گا، دروازہ کھڑکاندے رہوو تے تواڈے لئی کھولیا جائے گا
10 کیونکہ جیہڑا منگدا اے، اوہنوں دِتا جاندا اے تے جیہڑا لبھدا اے، اوہنوں مِل جاندا اے تے جیہڑا دروازہ کھڑکاندا اے، اوہدے لئی کھولیا جائے گا۔
11 ذرا سوچو کہ جے تواڈا پُتر تواڈے کولوں مچھی منگے تے کیہہ تُسی اوہنوں سَپ دَوو گے؟
12 یاں جے اوہ آنڈا منگے تے کیہہ اوہنوں بچھو دَوو گے؟
13 جے تُسی گُناہگار ہون دے باوجود اپنے بچیاں نُوں چنگیاں چیزاں دینا جان دے او تے ایس گل دا بھروسا رکھو کہ تواڈا اسمانی باپ وی اوہناں نُوں پاک روح ضرور دَوے گا جیہڑے اوہدے کولوں منگدے نیں۔“
14 بعد چ یسوع نے اِک بندے چوں باغی فرشتے نُوں کڈھیا جنہے اوہنوں گُونگا کر دِتا سی۔ فیر اوہ بندہ بولن لگ پیا۔ ایہہ ویکھ کے لوک بڑے حیران ہوئے۔
15 پر اوہناں وچوں کجھ نے کہیا: ”اوہ باغی فرشتیاں دے سردار بعلزبُول* دی مدد نال ای باغی فرشتیاں نُوں کڈھدا اے،“
16 جد کہ دُوجے یسوع نُوں اَزمان لئی اوہنوں کہن لگ پئے: ”سانوں اسمانوں کوئی نشانی وکھا۔“
17 یسوع نے اوہناں دے دل دی گل پڑھ لئی* تے اوہناں نُوں کہیا: ”جیس بادشاہی چ پُھٹ پے جائے، اوہ تباہ ہو جاندی اے تے جیہڑے گھر چ پُھٹ پے جائے، اوہ وی ڈِگ جاندا اے۔
18 ایسے طرحاں جے شیطان وی آپ اپنی بادشاہی چ پُھٹ پا دَوے تے اوہدی بادشاہی بھلا کیویں قائم رہوے گی؟تے تُسی کہندے او کہ مَیں بعلزبُول دی مدد نال باغی فرشتے کڈھنا واں۔
19 جے مَیں بعلزبُول دی مدد نال باغی فرشتے کڈھنا واں تے فیر تواڈے چیلے کِدی مدد نال کڈھدے نیں؟ اِنج تواڈے چیلے ای ثابت کردے نیں کہ تواڈی گل غلط اے۔
20 پر جے مَیں خدا دی طاقت* نال باغی فرشتے کڈھنا واں تے سمجھ لوو کہ خدا دی بادشاہی تواڈے سِر تے پونچ گئی اے۔*
21 جدوں اِک طاقتور بندہ ہتھیار پھڑ کے اپنے گھر دی حفاظت کردا اے تے اوہدیاں چیزاں محفوظ رہندیاں نیں۔
22 پر جدوں اوہدے توں وی بوہتا طاقتور بندہ آ کے اوہنوں ہرا دیندا اے تے اوہ اوہدے سارے ہتھیار کھو لیندا اے جنہاں اُتے اوہنوں بھروسا سی تے اوہدیاں چیزاں لُٹ کے دُوجیاں چ وَنڈ دیندا اے۔
23 جیہڑا میرے نال نئیں، اوہ میرے خلاف اے تے جیہڑا میرے نال جمع* نئیں کردا، اوہ کھلاردا اے۔
24 جدوں اِک باغی فرشتہ کسے بندے چوں نکلدا اے تے اوہ رہن دی تھاں لبھن لئی ریگستاناں چ بھٹک دا پھردا اے۔ پر جدوں اوہنوں کوئی تھاں نئیں مِلدی تے اوہ سوچدا اے کہ ”مَیں اوسے گھر چ واپس جاواں گا جتھوں مَیں نکلیا ساں۔“
25 واپس آ کے اوہ ویکھدا اے کہ گھر صاف ستھرا تے سجیا ہویا اے۔
26 فیر اوہ جاکے اپنے نال سَت ہور باغی فرشتے لے آندا اے جیہڑے اوہدے نالوں وی بھیڑے ہوندے نیں تے اوہ سارے اوس بندے چ وڑھ کے رہن لگ پیندے نیں۔ ایس لئی اوس بندے دا حال پہلے نالوں وی بھیڑا ہو جاندا اے۔“
27 جدوں اوہ ایہہ گل کہہ رہیا سی تے بِھیڑ چوں اِک عورت نے اوہنوں اُچی اُچی کہیا: ”خوش اے اوہ عورت جنہے تینوں پیدا کیتا تے تینوں دودھ پیایا۔“
28 پر یسوع نے کہیا: ”نئیں سگوں خوش نیں اوہ لوک جیہڑے خدا دا کلام سُن دے تے اوہدے تے عمل کردے نیں۔“
29 جدوں بوہت سارے لوک اوہدے کول کٹھے ہو گئے تے اوہنے کہیا: ”ایہہ بھیڑی پُشت نشانی منگدی اے۔ پر ایہنوں یُوناہ نبی دی نشانی دے علاوہ ہور کوئی نشانی نئیں وکھائی جائے گی
30 کیونکہ جیویں یُوناہ نینوہ دے لوکاں لئی اِک نشانی ثابت ہویا، اوسے طرحاں انسان دا بیٹا وی ایس پُشت لئی نشانی ثابت ہوئے گا۔
31 عدالت دے دن سبا دی ملکہ* نُوں وی ایس پُشت دے لوکاں نال زندہ کیتا جائے گا تے اوہ ایہناں نُوں قصوروار ٹھہرائے گی کیونکہ اوہ بڑی دُوروں سلیمان دِیاں حکمت بھریاں گلاں سُنن آئی سی۔ پر ویکھو، ایتھے اِک ایہو جیہا بندہ موجود اے جیہڑا سلیمان توں وی وڈا اے۔
32 عدالت دے دن نینوہ دے لوک ایس پُشت نال زندہ کیتے جان گے تے اوہ ایہنوں قصوروار ٹھہران گے کیونکہ اوہناں نے یُوناہ دا پیغام سُن کے توبہ کیتی سی۔ پر ویکھو، ایتھے اِک ایہو جیہا بندہ موجود اے جیہڑا یُوناہ توں وی وڈا اے۔
33 کوئی وی بندہ دِیوا بال کے اوہنوں لُکا نئیں دیندا تے نہ ای ٹوکری تھلے رکھدا اے سگوں اوہنوں اُچی تھاں تے رکھدا اے تاکہ کمرے چ آن والے لوک روشنی نُوں ویکھ سکن۔
34 اَکھ جسم دا دِیوا اے۔ جے تیری اَکھ منزل تے ٹِکی ہوئی اے* تے تیرا سارا جسم وی روشن اے۔ پر جے تیری اَکھ لالچ نال بھری ہوئی اے* تے تیرا سارا جسم نھیرے وچ اے۔
35 ایس لئی دھیان رکھ کہ تیرے چ جیہڑی روشنی اے، اوہ کِتے نھیرا نہ ہووے۔
36 ایس لئی جے تیرا سارا جسم روشن اے، تے ایہدا اِک وی حصہ نھیرے چ نئیں اے تے ایہہ اِک دِیوے ورگا ہوئے گا جیہڑا توانوں روشنی دیندا اے۔“
37 جدوں یسوع نے ایہہ گلاں ختم کیتیاں تے اِک فریسی نے اوہنوں اپنے گھر کھانے تے بلایا۔ ایس لئی یسوع اوہدے گھر گیا تے کھانا کھان لئی بہہ گیا۔
38 پر فریسی ایہہ ویکھ کے حیران ہویا کہ یسوع نے روٹی کھان توں پہلاں اپنے ہتھ نئیں دھوتے۔*
39 پر مالک یسوع نے اوہنوں کہیا: ”تُسی فریسی پیالے تے تھالی نُوں باہروں تے صاف کردے او، پر اندروں تُسی لالچ تے بُرائی نال بھرے ہوئے او۔
40 عقل دے دُشمنو، جنہے انسان نُوں باہروں بنایا اے کیہہ اوہنے ای اندروں وی نئیں بنایا؟
41 ایس لئی دِلوں رحم کھا کے ضرورتمنداں دی مدد کرو تے فیر تُسی پوری طرحاں پاک صاف ہووو گے۔
42 پر فریسیو، تواڈے تے لعنت کیونکہ تُسی پودینے، سداب* تے ہر جڑی بُوٹی دا دسواں حصہ تے دیندے او، پر تُسی خدا وانگوں اِنصاف تے محبت نئیں کردے۔ دسواں حصہ تے دینا ای دینا اے، پر زیادہ ضروری گلاں نُوں وی نظرانداز نہ کرو۔
43 فریسیو، تواڈے تے لعنت کیونکہ تُسی عبادتگاہ چ سب توں اَگے* بیہنا پسند کردے او تے چاہندے او کہ بازاراں چ لوک توانوں سلام کرن۔
44 لعنت اے تواڈے تے کیونکہ تُسی اوہناں قبراں وانگوں او جیہڑیاں نظر نئیں آندیاں* جدی وجہ توں لوک انجانے چ اوہناں تے چلدے پھردے نیں۔“
45 ایہہ سُن کے شریعت دے اِک ماہر نے اوہنوں کہیا: ”اُستاد، تُوں ایہہ گلاں کہہ کے ساڈی بےعزتی کر رہیا ایں۔“
46 فیر یسوع نے کہیا: ”لعنت اے تواڈے تے تُسی جیہڑے شریعت دے ماہر او کیونکہ تُسی لوکاں تے ایناں بوجھ* پاندے او جنہوں چُکنا بوہت اوکھا ہوندا اے۔ پر آپ تُسی اوہنوں چُکن لئی اپنی اُنگلی وی نئیں ہلاندے!
47 لعنت اے تواڈے تے کیونکہ تُسی نبیاں دِیاں قبراں* بناندے او، پر اوہناں دا قتل تواڈے پیو دادیاں نے ای کیتا سی۔
48 توانوں اپنے پیو دادیاں دِیاں کرتُوتاں دا پتہ اے، پر فیر وی تُسی اوہناں نُوں غلط نئیں کہندے۔ اوہناں نے جیہڑے نبیاں دا قتل کیتا سی، تُسی اوہناں ای نبیاں دِیاں قبراں بناندے او۔
49 ایس لئی ساڈے حکمت والے خدا نے ایہہ وی کہیا: ”مَیں نبیاں تے رسولاں نُوں اوہناں کول گھلاں گا۔ اوہ اوہناں چوں کجھ نُوں مار دین گے تے کجھ تے ظلم کرن گے۔
50 ایس لئی ایس پُشت دے لوک اوہناں سارے نبیاں دے خون دے ذمےدار نیں جنہاں نُوں دُنیا دی نِیہہ رکھن دے ویلے توں قتل کیتا گیا اے
51 یعنی ہابل دے خون توں لے کے زکریاہ دے خون تک جنہوں قربانگاہ تے پاک کمرے* دے وچکار قتل کیتا گیا۔“ ہاں، مَیں توانوں کہنا واں کہ اوہناں دا خون ایس پُشت دے لوکاں دے سِر لگے گا۔
52 لعنت اے تواڈے تے جیہڑے شریعت دے ماہر او کیونکہ تُسی خدا دے علم دے دروازے دی چابی کھو لئی اے۔* تُسی نہ تے آپ اندر جاندے او تے نہ ای اوہناں لوکاں نُوں اندر جان دیندے او جیہڑے اندر جانا چاہندے نیں!“
53 ایس لئی جدوں یسوع اوس فریسی دے گھروں باہر نکلیا تے شریعت دے عالماں تے فریسیاں نے ڈران دھمکان لئی اوہنوں گھیر لیا تے اوہدے کولوں ہور بوہت سارے سوال پچھن لگ پئے
54 تاکہ اوہ اوہدی کسے وی گل نُوں پھڑ کے اوہنوں پھسا لین۔
فٹ نوٹ
^ یاں، ”پاک ٹھہرایا جائے، پاک ثابت ہوئے۔“
^ یونانی چ: ”اوہناں نُوں معاف کرنے آں جیہڑے ساڈے قرضدار نیں۔“
^ یاں، ”پچھا نئیں چھڈیا۔“
^ شیطان دا اِک ہور ناں۔
^ یاں، ”اوہناں دی سوچ جان لئی۔“
^ یونانی چ: ”اُنگلی۔“
^ یعنی اوہ سمجھ نئیں پائے کہ خدا دا چُنیا ہویا بادشاہ اوہناں کول آیا اے۔
^ یاں، ”لوکاں نُوں جمع۔“
^ یونانی چ: ”جنوب دی ملکہ۔“
^ یونانی چ: ”اَکھ سادہ اے۔“
^ یونانی چ: ”اَکھ بُری اے۔“
^ یعنی یہودیاں دی رویت مطابق ہتھ نئیں دھوتے۔ مرقس 7:3 نُوں ویکھو۔
^ ایس پودے نُوں دوائیاں بنان تے کھانے چ سواد لیان لئی استمال کیتا جاندا اے۔
^ یاں، ”ودھیا تھانواں تے۔“
^ یاں، ”جنہاں تے کوئی نشانی نئیں ہوندی۔“
^ یعنی اپنیاں رویتاں تے حکماں دا بوجھ۔
^ یاں، ”مزار۔“
^ یعنی ہیکل۔
^ یعنی لوکاں کولوں خدا دا علم حاصل کرن دا موقع کھو لیا اے۔
