لُوقا دی اِنجیل 12:1-59
-
فریسیاں دا خمیر (1-3)
-
انساناں توں نئیں سگوں خدا توں ڈرو (4-7)
-
مسیح نُوں قبول کرنا ضروری اے (8-12)
-
بےوقوف امیر آدمی دی مثال (13-21)
-
فکر کرنا چھڈ دَوو (22-34)
-
چھوٹا گلّہ (32)
-
-
جاگدے رہوو (35-40)
-
وفادار مختار تے بےوفا مختار (41-48)
-
امن نئیں سگوں پُھٹ (49-53)
-
زمانے دِیاں نشانیاں نُوں پچھاننا (54-56)
-
جھگڑیاں نُوں حل کرنا (57-59)
12 اوس ویلے اوتھے ہزاراں لوک کٹھے ہو گئے۔ بِھیڑ اینی زیادہ سی کہ لوک اِک دُوجے تے ڈِگ رہے سن۔ یسوع نے اپنے شاگرداں وَل ویکھ کے کہیا: ”فریسیاں دے خمیر یعنی پاکھنڈ توں خبردار رہوو۔
2 پر جیہڑی وی چیز تے پردہ پیا ہویا اے، اوہنوں بےپردہ کیتا جائے گا تے جیہڑی وی گل راز چ وے، اوہنوں ظاہر کیتا جائے گا۔
3 ایس لئی تُسی جیہڑی وی گل نھیرے چ کہندے او، اوہ روشنی چ سُنائی جائے گی تے جیہڑی وی گل تُسی اپنے کمرے چ کسے دے کن چ کہندے او، اوہدا چرچا کوٹھے تے چڑھ کے کیتا جائے گا۔
4 ایہدے علاوہ میرے دوستو، مَیں توانوں کہنا واں کہ اوہناں لوکاں توں نہ ڈرو جیہڑے توانوں جانوں تے مار سکدے نیں، پر ایس توں زیادہ کجھ نئیں کر سکدے۔
5 پر مَیں توانوں کہنا واں کہ خدا کولوں ڈرو جیہڑا نہ صرف انسان نُوں مار سکدا اے سگوں اوہنوں ہنوم دی وادی چ سُٹن دا اِختیار وی رکھدا اے۔ مَیں فیر کہنا واں، صرف اوہدے کولوں ڈرو۔
6 کیہہ پنج چڑیاں دو پیسے* دِیاں نئیں وِک دِیاں؟ پر خدا ایہناں وچوں اِک نُوں وی نئیں بُھلدا*
7 سگوں اوہنوں تے ایہہ وی پتہ اے کہ تواڈے سِر تے کِنّے وال نیں۔ ایس لئی نہ ڈرو، تُسی تے بوہت ساریاں چڑیاں نالوں زیادہ قیمتی* او۔
8 مَیں توانوں کہنا واں کہ جیہڑا بندہ انساناں دے سامنے قبول کردا اے کہ اوہ میرا شاگرد اے، انسان دا بیٹا وی خدا دے فرشتیاں دے سامنے اوہنوں قبول کرے گا۔
9 پر جیہڑا انساناں دے سامنے میرا شاگرد ہون توں اِنکار کردا اے، انسان دا بیٹا وی خدا دے فرشتیاں دے سامنے اوہدا اِنکار کرے گا۔
10 جیہڑا بندہ انسان دے بیٹے دے خلاف بولدا اے، اوہنوں معاف کیتا جائے گا۔ پر جیہڑا پاک روح دے خلاف کفر بک دا اے، اوہنوں معاف نئیں کیتا جائے گا۔
11 جدوں لوک توانوں پنچائتاں،* سرکاری افسراں تے اِختیار رکھن والیاں دے سامنے پیش کرن تے فکر نہ کرنا کہ تُسی کیہہ کہوو گے یاں اپنی صفائی کیویں دَوو گے
12 کیونکہ اوس ویلے پاک روح توانوں دَسے گی کہ تُسی کیہہ کہنا اے۔“
13 فیر بِھیڑ وچوں اِک بندے نے یسوع نُوں کہیا: ”اُستاد، میرے بھرا نُوں کہہ کہ اوہ جائیداد وچوں میرا حصہ مینوں دے دَوے۔“
14 یسوع نے اوہنوں کہیا: ”بھراوا، تواڈا فیصلہ کرن یاں تواڈی جائیداد دا بٹوارا کرن دا اِختیار مینوں کنہے دِتا اے؟“
15 فیر یسوع نے لوکاں نُوں کہیا: ”خبردار رہوو* تے ہر طرحاں دے لالچ توں بچو کیونکہ انسان بھانویں جِنّاں وی امیر ہووے، اوہدا مال اوہنوں زندگی نئیں دے سکدا۔“
16 فیر اوہنے اوہناں نُوں ایہہ مثال دِتی: ”اِک امیر آدمی دے کھیتاں چ بڑی فصل ہوئی۔
17 ایس لئی اوہ سوچن لگ پیا: ”مَیں اینی ساری فصل کتھے رکھاں؟“
18 فیر اوہنے کہیا: ”مَیں اِنج کرنا واں کہ اپنے گوداماں نُوں ڈھا کے ہور وڈے گودام بنانا واں تے اپنی ساری فصل تے سارے مال نُوں اوتھے رکھنا واں
19 تے فیر مَیں اپنے آپ نُوں کہواں گا: ”تیرے کول ہُن کئی سالاں لئی مال جمع ہو گیا اے۔ آرام کر، کھا پی تے موجاں مار۔““
20 پر خدا نے اوہنوں کہیا: ”عقل دے اَنھیا، اَج رات ای تُوں مر* جائیں گا۔ فیر جیہڑیاں چیزاں تُوں جمع کیتیاں نیں، اوہ کِنہوں مِلن گیاں؟“
21 ہاں، اوہناں لوکاں دا ایہی انجام ہوئے گا جیہڑے اپنے لئی بوہت سارا مال جمع کردے نیں، پر خدا دی نظر چ امیر نئیں ہوندے۔“
22 فیر اوہنے اپنے شاگرداں نُوں کہیا: ”ایس لئی مَیں توانوں کہنا واں کہ ایہہ فکر کرنا چھڈ دَوو کہ تُسی زندہ رہن لئی کیہہ کھاؤ گے یاں جسم ڈھکن لئی کیہہ پاؤ گے
23 کیونکہ زندگی کھانے نالوں تے جسم کپڑیاں نالوں بوہتا قیمتی اے۔
24 ذرا کانواں تے غور کرو۔ اوہ نہ تے بیہہ بوندے نیں، نہ واڈھی کردے نیں تے نہ ای اوہناں کول دانہ جمع کرن لئی گودام ہوندے نیں۔ پر فیر وی خدا اوہناں نُوں کھانا دیندا اے۔ کیہہ تُسی پرندیاں نالوں بوہتے اہم نئیں او؟
25 تواڈے وچوں کون فکر کر کے اپنی زندگی دا اِک پل* وی ودھا سکدا اے؟
26 جے تُسی ایناں چھوٹا جیہا کم وی نئیں کر سکدے تے فیر باقی چیزاں دی فکر کرن دی کیہہ لوڑ اے؟
27 جنگلی پُھلاں تے غور کرو۔ اوہ نہ تے محنت کردے نیں تے نہ ای دھاگہ بناندے نیں۔ پر مَیں توانوں کہنا واں کہ سلیمان وی اپنی ساری شانوشوکت دے باوجود اینے شاندار کپڑے نئیں سی پاندا جِنّے ایہہ پُھل پاندے نیں۔
28 ایس لئی جے خدا ایہناں جنگلی بُوٹیاں نُوں اینے سوہنے طریقے نال سجاندا اے جیہڑے اَج ہے نیں تے کل تندور چ پائے جان گے تے اَے کمزور ایمان والیو، کیہہ اوہ توانوں پان لئی کپڑے نئیں دَوے گا؟
29 ایس لئی تُسی ایہہ فکر کرنا چھڈ دَوو کہ تُسی کیہہ کھاؤ گے یاں کیہہ پیو گے۔ ایہناں چیزاں بارے حدوں ودھ پریشان نہ ہویا کرو۔
30 ایہناں چیزاں دے پچھے تے دُنیا دے لوک بھج دے نیں۔ پر تواڈے اسمانی باپ نُوں پتہ اے کہ توانوں ایہناں ساریاں چیزاں دی لوڑ اے۔
31 ایس لئی خدا دی بادشاہی نُوں اہمیت دیندے رہوو تے فیر ایہہ ساریاں چیزاں وی توانوں دِتیاں جان گیاں۔
32 اَے چھوٹے گلّے نہ ڈر کیونکہ تواڈا اسمانی باپ تواڈے توں خوش اے تے توانوں بادشاہی دینا چاہندا اے۔
33 اپنیاں چیزاں ویچ دَوو تے ضرورتمنداں دی مدد کرو۔ پیسے رکھن لئی ایہو جہیاں تھیلیاں بناؤ جیہڑیاں خراب نہ ہون یعنی اسمان تے ایہو جیہا خزانہ جمع کرو جیہڑا کدی ختم نہ ہوئے۔ اوتھے نہ تے کوئی چور جا سکدا اے تے نہ ای کیڑا لگ سکدا اے۔
34 جِتھے تواڈا خزانہ اے، تواڈا دھیان* وی اوتھے ای ہوئے گا۔
35 تیار رہوو* تے اپنے دِیوے بال کے رکھو
36 تے اوہناں غلاماں ورگے بنو جیہڑے اپنے مالک دا شادی توں واپس آن دا اِنتظار کر رہے نیں تاکہ جدوں اوہ آ کے دروازہ کھڑکائے تے اوہ چھیتی نال کھول دین۔
37 اوہ غلام بڑے خوش ہون گے جدوں اوہناں دا مالک آ کے ویکھے گا کہ اوہ جاگ رہے نیں۔ مَیں توانوں سچ کہنا واں کہ مالک اوہناں نُوں میز تے بٹھائے گا تے کپڑے بدل کے* آپ اوہناں دی خدمت کرے گا۔
38 جے مالک اَدھی رات* نُوں یاں ایہدے بعد* وی آ کے ایہہ ویکھے کہ اوہدے نوکر جاگ رہے نیں تے تیار نیں تے اوہ بڑے خوش ہون گے۔
39 پر ایہہ گل یاد رکھو، جے گھر دے مالک نُوں پتہ ہوندا کہ چور کیہڑے ویلے آئے گا تے اوہ اپنے گھر ڈاکا نہ پین دیندا۔
40 تُسی وی ہمیشاں تیار رہوو کیونکہ انسان دا بیٹا اوس ویلے آئے گا جدے بارے تُسی سوچیا وی نئیں ہوئے گا۔“
41 فیر پطرس نے پچھیا: ”مالک، ایہہ مثال صرف ساڈے لئی اے یاں ساریاں لئی اے؟“
42 مالک نے کہیا: ”اوہ وفادار تے سمجھدار مختار اصل چ کون اے جنہوں اوہدا مالک اپنے سارے نوکراں چاکراں تے مقررہ کرے گا تاکہ اوہ اوہناں دی ضرورت دے مطابق صحی ویلے تے اوہناں نُوں کھانا دیندا رہوے؟
43 خوش اے اوہ غلام جدا مالک آ کے ویکھے کہ اوہ ایہہ کم کر رہیا اے۔
44 مَیں توانوں سچ کہنا واں کہ اوہ اوس غلام نُوں اپنی ساری جائیداد دا مختار بنا دَوے گا۔
45 پر جے کدی اوہ غلام ایہہ سوچن لگ پووے کہ ”میرا مالک آن چ دیر لا رہیا اے،“ تے نوکراں تے نوکرانیاں نُوں مارنا کُٹنا شروع کر دَوے، کھائے پیئے تے شراب دے نشے چ ٹُن ہو جائے
46 تے اوہدا مالک اوس دن تے اوس گھڑی آئے گا جدے بارے اوہنے سوچیا وی نئیں ہوئے گا۔ نالے اوہ اوہنوں بڑی سخت سزا دَوے گا تے اوہدا اوہ حشر کرے گا جیہڑا بےوفا لوکاں دا ہوندا اے۔
47 فیر اوس غلام نُوں بوہت سارے کوڑے مارے جان گے کیونکہ اوہ اپنے مالک دی مرضی جان دے ہوئیاں وی تیار نئیں ہویا تے اوہدے حکم تے عمل نئیں کیتا۔
48 پر اوس غلام نُوں گھٹ کوڑے مارے جان گے جنہے ایس لئی غلط کم کیتے کیونکہ اوہنوں اپنے مالک دی مرضی دا پتہ نئیں سی۔ اصل چ جنہوں بوہتی ذمےداری دِتی جاندی اے، اوہدے کولوں بوہتا حساب وی لیا جاندا اے تے جنہوں بوہتا اِختیار دِتا جاندا اے، اوہدے کولوں بوہتا حساب وی لیا جاندا اے۔
49 مَیں زمین تے اَگ لان آیا واں تے اَگ لگ گئی اے۔ بھلا ہور مینوں کیہہ چاہی دا اے؟
50 اصل چ مَیں اِک بپتسمہ لینا اے تے جدوں تک مَیں اوہ بپتسمہ لے نئیں لیندا، مَیں بوہت پریشان رہواں گا۔
51 کیہہ توانوں لگدا اے کہ مَیں زمین تے امن قائم کرن آیا واں؟ نئیں سگوں مَیں تے پُھٹ پان آیا واں۔
52 ہُن توں خانداناں چ پُھٹ پئی رہوے گی۔ جے اِک گھر چ پنج جی نیں تے تِن دو دے خلاف ہون گے تے دو تِن دے خلاف ہون گے۔
53 ہاں، اوہناں چ پُھٹ پے جائے گی۔ پیو پُتر دے خلاف ہو جائے گا تے پُتر پیو دے۔ ماں دھی دے خلاف ہو جائے گی تے دھی ماں دے۔ سّس نُونہہ دے خلاف ہو جائے گی تے نُونہہ سّس دے۔“
54 فیر یسوع نے لوکاں نُوں کہیا: ”جدوں تُسی مغرب وَلّوں بدّل چڑھدا ویکھدے او تے تُسی فوراً کہندے او کہ ”طوفان آن والا اے،“ تے اِنج ای ہوندا اے۔
55 نالے جدوں تُسی ویکھدے او کہ جنوب وَلّوں ہوا چل رہی اے تے تُسی کہندے او کہ ”بڑی گرمی ہوئے گی،“ تے اِنج ای ہوندا اے۔
56 پاکھنڈیو، تُسی زمین تے اسمان نُوں ویکھ کے موسم دا پتہ تے لا لیندے او، پر جو کجھ ہُن ہو رہیا اے اوہنوں ویکھ کے تُسی ایہہ پتہ کیوں نئیں لا سکدے کہ تُسی کیہڑے زمانے چ رہ رہے او؟
57 تُسی ایہہ کیوں نئیں سمجھدے کہ صحی کیہہ اے تے توانوں کیہہ کرنا چاہی دا اے؟
58 مثال لئی، جے کسے نے تیرے تے مُقدمہ کیتا اے تے حاکم کول جاندے ویلے راہ چ ای اوس بندے نال معاملے نُوں حل کرن دی کوشش کر۔ کِتے ایہہ نہ ہوئے کہ حاکم تینوں جج دے حوالے کر دَوے تے جج تینوں سپاہی دے حوالے کر دَوے تے سپاہی تینوں قید چ پا دَوے۔
59 مَیں تینوں کہنا واں کہ جدوں تک تُوں اِک اِک پیسہ* بھر نئیں دَویں گا، تینوں قید چوں رِہا نئیں کیتا جائے گا۔“
فٹ نوٹ
^ یونانی چ: ”2 اساریون۔“ 1 اساریون 45 منٹ مزدوری کرن نال مِلدا سی۔
^ یاں، ”نظرانداز نئیں کردا۔“
^ یاں، ”اہم۔“
^ یاں شاید، ”عبادتگاہواں۔“
^ یونانی چ: ”اپنیاں اَکھاں کُھلیاں رکھو۔“
^ یاں، ”تیری جان لے لئی جائے گی۔“
^ یونانی چ: ”2 گِٹھ۔“
^ یونانی: ”دل۔“
^ یونانی چ: ”لک بنھ کے تیار رہوو۔“
^ یونانی چ: ”لک بنھ کے۔“
^ یونانی چ: ”دُوجا پہر۔“ رات 9 توں 12 وجے دا وقت۔
^ یونانی چ: ”تیجا پہر۔“ رات 12 توں 3 وجے دا وقت۔
^ یونانی چ: ”آخری لپتون۔“
