لُوقا دی اِنجیل 15:1-32
15 یسوع دِیاں گلاں سُنن لئی ٹیکس لین والے تے گُناہگار لوک اوہدے آلے دَوالے جمع ہو گئے۔
2 ایہہ ویکھ کے فریسی تے شریعت دے عالم بُڑبُڑ کرن لگ پئے تے کہن لگ پئے: ”ایہہ بندہ تے گُناہگاراں دا دوست اے تے اوہناں نال کھاندا پیندا اے۔“
3 فیر یسوع نے لوکاں نُوں ایہہ مثال دِتی:
4 ”فرض کرو کہ اِک بندے کول 100 بھیڈاں نیں جنہاں وچوں اِک گواچ جاندی اے۔ کیہہ اوہ اپنیاں 99 بھیڈاں نُوں ویرانے چ چھڈ کے اوس بھیڈ نُوں اوہدوں تک لبھدا نئیں رہوے گا جدوں تک اوہ مِل نئیں جاندی؟
5 تے جدوں اوہ مِل جاندی اے تے اوہ اوہنوں اپنے موڈھیاں تے چُک کے خوشی مناندا اے۔
6 فیر گھر پونچ کے اوہ اپنے دوستاں تے گوانڈھیاں نُوں بلا کے اوہناں نُوں کہندا اے: ”میرے نال خوشی مناؤ کیونکہ میری گواچی ہوئی بھیڈ لبھ گئی اے۔“
7 مَیں توانوں کہنا واں کہ ایسے طرحاں اسمان تے جِنّی خوشی اِک گُناہگار دے توبہ کرن دی وجہ توں ہوندی اے، اونی 99 نیک لوکاں دی وجہ توں وی نئیں ہوندی جنہاں نُوں توبہ کرن دی لوڑ نئیں اے۔
8 یاں فرض کرو کہ اِک عورت دے کول چاندی دے دس سِکّے* نیں جنہاں وچوں اِک گواچ جاندا اے۔ کیہہ اوہ دِیوا بال کے اپنے سارے گھر چ جھاڑو نئیں پھیرے گی تے اوہدوں تک دھیان نال لبھدی نئیں رہوے گی جدوں تک اوہ مِل نئیں جاندا؟
9 تے جدوں اوہ اوہنوں مِل جاندا اے تے اوہ اپنیاں سہیلیاں تے گوانڈھیاں نُوں بلاندی اے تے اوہناں نُوں کہندی اے: ”میرے نال خوشی مناؤ کیونکہ میرا گواچیا ہویا چاندی دا سِکّہ لبھ گیا اے۔“
10 مَیں توانوں کہنا واں کہ ایسے طرحاں جدوں اِک گُناہگار توبہ کردا اے تے خدا دے فرشتے بڑی خوشی مناندے نیں۔“
11 فیر اوہنے کہیا: ”اِک آدمی دے دو پُتر سن۔
12 چھوٹے نے اپنے پیو نُوں کہیا: ”ابو، جائیداد وچوں میرا حصہ مینوں دے دے۔“ ایس لئی پیو نے اپنی جائیداد دونواں پُتراں چ وَنڈ دِتی۔
13 فیر کجھ دِناں بعد چھوٹا پُتر اپنا سارا کجھ سمیٹ کے کسے دُور دے ملک چ رہن لئی چلا گیا۔ اوتھے اوہنے عیاشی چ اپنا سارا پیسہ اُڈا دِتا۔
14 جدوں اوہ کنگلا ہو گیا تے اوسے دوران اوس ملک چ سخت کال پے گیا تے اوہ اِک اِک پیسے دا محتاج ہو گیا۔
15 ایتھوں تک کہ اوہ اوس ملک چ اِک بندے اَگے ترلے پان لگ پیا کہ اوہ اوہنوں کم تے رکھ لوے۔ اوس بندے نے اوہنوں اپنے کھیتاں چ سُور چران لئی بھیج دِتا۔
16 اوہ جوان اپنا پیٹ بھرن لئی اوہ پھلیاں کھان لئی وی ترس دا سی جیہڑیاں سُور کھاندے سن۔ پر کسے نے وی اوہنوں کھان لئی کجھ نہ دِتا۔
17 جدوں اوہدی عقل ٹھکانے آئی تے اوہنے سوچیا: ”میرے ابو دے اینے سارے مزدور رَج کے روٹی کھاندے نیں تے مَیں ایتھے بُھکھا مر رہیا واں۔
18 مَیں اپنے ابو کول واپس جانواں گا تے اوہنوں کہواں گا: ”ابو، مَیں خدا دے خلاف تے تیرے خلاف گُناہ کیتا اے۔
19 مَیں ایس لائق وی نئیں رہیا کہ مینوں تیرا پُتر کہیا جائے۔ مینوں اپنا مزدور ای رکھ لے۔““
20 ایس لئی اوہ اپنے پیو کول جان لئی نکل پیا۔ حالے اوہ اپنے گھر توں دُور ای سی کہ اوہدے پیو نے اوہنوں ویکھ لیا۔ اوہنوں اپنے پُتر دی حالت تے بڑا ترس آیا۔ اوہ اوہدے وَل بھجا بھجا گیا تے اوہنوں گلے لا لیا تے بڑے پیار نال اوہنوں چُمیا۔
21 پُتر نے کہیا: ”ابو، مَیں خدا دے خلاف تے تیرے خلاف گُناہ کیتا اے۔ مَیں ایس لائق نئیں رہیا کہ مینوں تیرا پُتر کہیا جائے۔“
22 پر پیو نے اپنے غلاماں نُوں کہیا: ”چھیتی چھیتی جاؤ تے سب توں ودھیا چوغہ لیا کے ایہنوں پواؤ۔ ایہدے ہتھ چ انگوٹھی تے پیراں چ جُتی پواؤ۔
23 نالے اِک پلیا ہویا وچھا حلال کرو تے آؤ اَسی سارے رَل کے کھائیے پئیے تے خوشی منائیے
24 کیونکہ میرا ایہہ پُتر مر گیا سی، پر ہُن دُبارہ زندہ ہو گیا اے۔ ایہہ گواچ گیا سی، پر ہُن مِل گیا اے۔“ فیر اوہ سارے خوشیاں منان لگ پئے۔
25 اوس ویلے اوہدا وڈا پُتر کھیتاں چ سی۔ جدوں اوہ واپس آیا تے گھر دے نیڑے پونچ کے اوہنے گان وجان تے نچن دی آواز سُنی۔
26 ایس لئی اوہنے اِک نوکر نُوں بلا کے پچھیا: ”ایہہ سب کیہہ ہو رہیا اے؟“
27 اوہنے کہیا: ”تیرا بھرا واپس آ گیا اے تے تیرے پیو نے اوہدے لئی پلیا ہویا وچھا حلال کرایا اے کیونکہ اوہدا پُتر اوہنوں صحی سلامت واپس مِل گیا اے۔“
28 پر وڈے مُنڈے نُوں ایہہ سُن کے غصہ چڑھ گیا تے اوہنے اندر جان توں اِنکار کر دِتا۔ فیر اوہدا پیو باہر آیا تے اوہنوں منان لگ پیا۔
29 اوہنے اپنے پیو نُوں کہیا: ”ویکھ، مَیں اینے سالاں تک تیری خدمت کردا رہیا واں تے کدی وی تیری نافرمانی نئیں کیتی۔ پر تُوں کدی مینوں بکری دا اِک بچہ وی نئیں دِتا کہ مَیں اپنے دوستاں نال مِل کے خوشی مناواں۔
30 پر جیویں ای تیرا ایہہ پُتر واپس آیا جنہے تیری دولت طوائفاں تے اُڈا دِتی، تُوں ایہدے لئی پلیا ہویا وچھا حلال کرایا۔“
31 پیو نے اوہنوں کہیا: ”پُتر، تُوں تے ہمیشاں ای میرے نال رہیا ایں تے میرا سارا کجھ تیرا ای اے۔
32 پر ہُن اَسی جشن تے خوشی کیوں نہ منائیے کیونکہ تیرا بھرا مر گیا سی، پر ہُن زندہ ہو گیا اے۔ اوہ گواچ گیا سی، پر ہُن مِل گیا اے۔““
فٹ نوٹ
^ یونانی چ: ”دِرہم۔“
