لُوقا دی اِنجیل 16:1-31
16 فیر اوہنے اپنے شاگرداں نُوں کہیا: ”اِک امیر آدمی سی جدے مختار تے ایہہ اِلزام لگیا کہ اوہ اپنے مالک دا مال ضائع کر رہیا اے۔
2 ایس لئی مالک نے اوہنوں بلا کے کہیا: ”مَیں ایہہ تیرے بارے کیہہ سُن رہیا واں؟ مینوں اپنے کم دا سارا حساب کتاب دے کیونکہ ہُن تُوں میرے گھر دا مختار نئیں رہویں گا۔“
3 فیر مختار نے سوچیا: ”ہُن مَیں کیہہ کراں؟ مالک تے مینوں کم توں کڈھ دے گا۔ کھیتاں چ مٹی تے میرے کولوں پُٹی نئیں جانی تے بھیک منگن چ مینوں شرم آندی اے۔
4 ہاں، مینوں پتہ اے کہ مینوں کیہہ کرنا چاہی دا اے تاکہ جدوں میری نوکری چلی جائے تے لوک مینوں اپنے گھر ٹھہران۔“
5 فیر اوہنے اپنے مالک دے قرضداراں نُوں اِک اِک کر کے بلایا۔ اوہنے پہلے نُوں پچھیا: ”تُوں میرے مالک دا کِنّاں قرضہ دینا اے؟“
6 اوہنے کہیا: ”2200 لیٹر* زیتون دا تیل۔“ مختار نے اوہنوں کہیا: ”ایہہ لے اپنے کاغذ تے بہہ کے فٹافٹ ایہناں چ 1100 لیٹر لکھ دے۔“
7 فیر اوہنے اِک ہور نُوں پچھیا: ”تُوں میرے مالک دا کِنّاں قرضہ دینا اے؟“ اوہنے کہیا: ”کنک دِیاں 100 بوریاں۔“* فیر مختار نے اوہنوں کہیا: ”ایہہ لے اپنے کاغذ تے ایہناں چ 80 بوریاں لکھ دے۔“
8 بھانویں کہ ایہہ مختار بےایمان سی، فیر وی مالک نے اوہدی تعریف کیتی کیونکہ اوہنے عقلمندی نال کم لیا سی۔ ایس دُنیا دے لوک اپنے فائدے لئی دُوجیاں توں کم لین دے معاملے چ روشنی دے پُتراں نالوں بوہتے عقلمند نیں۔
9 مَیں توانوں کہنا واں کہ ایس بےایمان دُنیا دی دولت نال اپنے لئی دوست بناؤ تاکہ جدوں ایہہ دولت ختم ہو جائے تے اوہ دوست توانوں ہمیشاں قائم رہن والے گھراں چ جگہ دین۔
10 جیہڑا بندہ چھوٹے معاملیاں چ ایماندار ہوندا اے، اوہ وڈے معاملیاں چ وی ایماندار ہوندا اے۔ پر جیہڑا بندہ چھوٹے معاملیاں چ بےایمان ہوندا اے، اوہ وڈے معاملیاں چ وی بےایمان ہوندا اے۔
11 ایس لئی جے تُسی ایس دُنیا دی دولت دے معاملے چ ایماندار ثابت نئیں ہوندے تے فیر سچی دولت توانوں کون دَوے گا؟
12 تے جے تُسی دُوجیاں دِیاں چیزاں نُوں سنبھالن دے معاملے چ ایماندار ثابت نئیں ہوندے تے فیر توانوں اوہ انعام کون دَوے گا جیہڑا تواڈے لئی رکھیا گیا اے؟
13 کوئی وی نوکر دو مالکاں دی غلامی نئیں کر سکدا کیونکہ اوہ یاں تے اِک نال محبت کرے گا تے دُوجے نال نفرت۔ یاں فیر اوہ اِک دا وفادار رہوے گا تے دُوجے نُوں حقیر سمجھے گا۔ تُسی خدا تے دولت دونواں دی غلامی نئیں کر سکدے۔“
14 یسوع دِیاں گلاں سُن کے فریسی نک چڑھان لگ پئے کیونکہ اوہ پیسے نال بڑا پیار کردے سن۔
15 ایس لئی یسوع نے اوہناں نُوں کہیا: ”تُسی لوکاں دے سامنے تے نیک بن دے او، پر خدا تواڈے دِلاں نُوں جان دا اے کیونکہ انسان دی نظر چ جیہڑی چیز اہم اے، اوہ خدا دی نظر چ گھٹیا اے۔
16 شریعت تے نبیاں دی تلیم یوحنا دے زمانے تک سی۔ پر اوہدوں توں خدا دی بادشاہی دی خوشخبری سُنائی جا رہی اے تے ایہدے چ جان لئی ہر طرحاں دے لوک پورا زور لا رہے نیں۔
17 جیس طرحاں اسمان تے زمین نئیں مِٹ سکدے، اوسے طرحاں ایہہ وی نئیں ہو سکدا کہ شریعت چ لکھی کوئی گل پوری نہ ہووے۔
18 جیہڑا بندہ اپنی بیوی نُوں طلاق دیندا اے تے دُوجا ویاہ کردا اے، اوہ جنسی بدکاری* کردا اے تے جیہڑا بندہ اِک طلاقشُدہ عورت نال ویاہ کردا اے، اوہ جنسی بدکاری کردا اے۔
19 اِک امیر آدمی سی جیہڑا جامنی رنگ دے مہنگے مہنگے کپڑے پاندا سی۔ اوہ بڑے ٹھاٹھ باٹھ نال رہندا سی تے روز عیش کردا سی۔
20 پر اِک فقیر سی جدا ناں لعزر سی تے اوہدا جسم پھوڑیاں نال بھریا ہویا سی۔ لوک اوہنوں امیر آدمی دے دروازے دے سامنے بیٹھا جاندے سن۔
21 اوہ امیر آدمی دی میز توں ڈِگن والے روٹی دے ٹکڑیاں نال اپنا پیٹ بھرن لئی ترس دا سی۔ اوہدا ایناں ماڑا حال سی کہ کُتے آ کے اوہدے پھوڑے چٹ دے ہوندے سن۔
22 کجھ عرصے بعد اوہ فقیر مر گیا تے فرشتے اوہنوں چُک کے ابراہام کول* لے گئے۔
فیر اوہ امیر آدمی وی مر گیا تے اوہنوں دفن کر دِتا گیا۔
23 اوہ قبر چ تڑف رہیا سی۔ اوہنے اپنیاں اَکھاں چُک کے ویکھیا تے اوہنوں دُور ابراہام نظر آیا تے لعزر اوہدے نال کھلوتا سی۔
24 ایس لئی اوس آدمی نے اُچی آواز چ کہیا: ”اَے باپ ابراہام، میرے تے رحم کر تے لعزر نُوں کہہ کہ اوہ اپنی اُنگلی دا پوٹا پانی نال بھیوں کے آئے تے میری زبان تے لائے تے میری پیاس بجھائے کیونکہ مَیں اَگ دے ایس بھانبڑ چ تڑف رہیا واں۔“
25 پر ابراہام نے اوہنوں کہیا: ”پُتر، یاد کر تینوں ساری زندگی سُکھ ملیا اے جد کہ لعزر نُوں دُکھ ملیا اے۔ پر ہُن ایتھے اوہنوں سُکھ مِل رہیا اے تے تُوں تڑف رہیا ایں۔
26 نالے تیرے تے ساڈے درمیان اِک بوہت وڈی کھائی بنائی گئی اے تاکہ جیہڑے لو ک ایدھروں تیرے وَل جانا چاہندے نیں، اوہ نہ جا سکن تے نہ ای اودھروں کوئی ساڈے وَل آ سکے۔“
27 فیر اوس آدمی نے کہیا: ”اَے باپ، جے ایہہ گل اے تے فیر مَیں تیری مِنت کرنا واں کہ لعزر نُوں میرے باپ دے گھر گھل
28 کیونکہ میرے پنج بھرا نیں تے مَیں چاہنا واں کہ لعزر جا کے اوہناں نُوں چنگی طرحاں سمجھائے تاکہ اوہناں نُوں میرے وانگوں ایس جگہ تے آ کے تکلیف نہ سہنی پووے۔“
29 پر ابراہام نے کہیا: ”اوہناں کول موسیٰ تے دُوجے نبیاں دی تلیم ہے وے، اوہ اوہدے تے چلن۔“
30 پر اوس آدمی نے کہیا: ”اَے باپ ابراہام، ایہہ گل صحی اے۔ پر جے مُردیاں وچوں کوئی زندہ ہو کے اوہناں کول جائے گا تے اوہ ضرور توبہ کرن گے۔“
31 پر ابراہام نے اوہنوں کہیا: ”جے اوہ موسیٰ تے نبیاں دی تلیم تے نئیں چلدے تے فیر بھانویں مُردیاں وچوں وی کوئی زندہ ہو کے اوہناں کول چلا جائے، اوہ اوہدی گل وی نئیں منن گے۔““
فٹ نوٹ
^ یونانی چ: ”100 بتھ۔“ ایتھے تیل نُوں ناپن دے شاید اوس پیمانے وَل اشارہ کیتا گیا اے جنہوں بتھ کہیا جاندا سی۔ اِک بتھ 22 لیٹر دے برابر ہوندا سی۔
^ یونانی چ: ”سو کور۔“ ایس ایت چ یونانی لفظ ”کور“ دا ترجمہ بوری کیتا گیا اے۔ اِک بوری چ تقریباً 170 کلو گرام کنک آندی سی۔
^ یاں، ”زِنا،“ یعنی اپنے جیون ساتھی نال بےوفائی کرنا۔
^ یونانی چ: ”سینے دے کول۔“
