لُوقا دی اِنجیل 18:1-43
18 فیر یسوع نے اپنے شاگرداں نُوں اِک مثال دے ذریعے سمجھایا کہ ایہہ کِنّاں ضروری اے کہ اوہ ہمیشاں دُعا کردے رہن تے ہمت نہ ہارن۔
2 اوہنے کہیا: ”اِک شہر وچ اِک جج سی جنہوں نہ تے خدا دا ڈر سی تے نہ ای کسے بندے دی کوئی پرواہ۔
3 اوسے شہر چ اِک بیوہ وی سی جیہڑی وار وار اوہدے کول جا کے کہندی سی: ”میرے مخالف نے میرے تے مُقدمہ کیتا اے۔ میرا اِنصاف کر۔“
4 کجھ عرصے لئی تے اوس جج نے بیوہ دی مدد نئیں کیتی۔ پر فیر اوہنے سوچیا: ”بھانویں کہ مَیں نہ تے خدا کولوں ڈرنا واں تے نہ ای کسے بندے دی پرواہ کرنا واں
5 پر مَیں ایس بیوہ دا اِنصاف ضرور کراں گا کیونکہ ایہنے میرے نک چ دم کیتا ہویا اے، نئیں تے ایہہ وار وار میرے کول آ کے میرا سِر کھاندی رہوے گی۔““
6 فیر مالک یسوع نے کہیا: ”بھانویں کہ اوہ جج بھیڑا سی، پر فیر وی تُسی غور کیتا کہ اوہنے کیہہ کہیا۔
7 فیر کیہہ خدا اپنے چُنے ہوئے لوکاں دا اِنصاف نئیں کرے گا جیہڑے دن رات اوہدے اَگے اِلتجاواں کردے نیں؟ اوہ اوہناں لئی صبر وکھاندے ہوئیاں اوہناں دی ضرور سُنے گا۔
8 مَیں توانوں کہنا واں کہ اوہ چھیتی نال اوہناں دا اِنصاف کرے گا۔ پر جدوں انسان دا بیٹا آئے گا تے کیہہ اوہنوں زمین تے انساناں چ ایہو جیہا ایمان ملے گا؟“
9 فیر اوہنے اوہناں لوکاں لئی ایہہ مثال دِتی جیہڑے اپنے آپ نُوں نیک تے دُوجیاں نُوں گھٹیا سمجھدے نیں:
10 ”دو بندے دُعا کرن لئی ہیکل چ گئے جنہاں وچوں اِک فریسی سی تے دُوجا ٹیکس لین والا۔
11 فریسی کھلو کے اپنے دل چ ایہہ دُعا کرن لگ پیا: ”اَے خدا، مَیں تیرا شکر کرنا واں کہ مَیں باقی لوکاں وانگوں لُٹیرا، بھیڑا تے بدکار* نئیں آں تے نہ ای ایس ٹیکس لین والے ورگا واں۔
12 مَیں ہفتے چ دو واری روزہ رکھنا واں تے اپنی ساری کمائی دا دسواں حصہ دینا واں۔“
13 پر ٹیکس لین والا تھوڑی دُور کھلوتا ہویا سی۔ اوہنے اسمان وَل اَکھاں چُکن دی وی ہمت نہ کیتی سگوں اوہ وار وار اپنی چھاتی پِٹ کے ایہہ کہندا رہیا: ”اَے خدا، میرے تے رحم کر۔ مَیں بڑا گُناہگار آں۔“
14 مَیں توانوں کہنا واں کہ ایہہ بندہ فریسی نالوں زیادہ نیک ثابت ہو کے اپنے گھر گیا کیونکہ جیہڑا وڈا بن دا اے، اوہنوں چھوٹا کیتا جائے گا۔ پر جیہڑا چھوٹا بن دا اے، اوہنوں وڈا کیتا جائے گا۔“
15 فیر لوک اپنے چھوٹے بچیاں نُوں وی یسوع کول لیائے تاکہ اوہ اوہناں دے سِر تے ہتھ رکھے۔ پر ایہہ ویکھ کے شاگرد لوکاں نُوں جِھڑکن لگ پئے۔
16 پر یسوع نے بچیاں نُوں اپنے کول بلایا تے کہیا: ”بچیاں نُوں نہ روکو۔ ایہناں نُوں میرے کول آن دَوو کیونکہ خدا دی بادشاہی دے وارث اوہی لوک ہون گے جیہڑے ایہناں ورگے نیں۔
17 مَیں توانوں سچ کہنا واں کہ جیہڑا انسان خدا دی بادشاہی نُوں اونویں قبول نئیں کردا جیویں اِک چھوٹا بچہ کسے چیز نُوں قبول کردا اے، اوہ اوہدے چ بالکل نئیں جائے گا۔“
18 اِک حاکم نے یسوع نُوں کہیا: ”اُستاد، تُوں بوہت چنگا ایں۔ مینوں دَس کہ ہمیشاں دی زندگی پان لئی مینوں کیہہ کرنا چاہی دا اے؟“
19 یسوع نے اوہنوں کہیا: ”تُوں مینوں چنگا کیوں کہہ رہیا ایں؟ چنگا تے بس خدا ای اے۔
20 تینوں ایہہ حکم تے پتہ ای نیں: ”جنسی بدکاری* نہ کرِیں، خون نہ کرِیں، چوری نہ کرِیں، جھوٹھی گواہی نہ دوِیں تے اپنے ماں پیو دی عزت کرِیں۔““
21 فیر اوہنے کہیا: ”ایہناں سارے حکماں تے مَیں بچپن توں چل رہیا واں۔“
22 ایہہ سُن کے یسوع نے اوہنوں کہیا: ”تیرے چ بس اِک چیز دی کمی اے۔ اپنا سارا مال ویچ کے پیسے غریباں چ وَنڈ دے تاکہ تیرے لئی اسمان چ خزانہ جمع ہو جائے تے آ کے میرا شاگرد بن جا۔“
23 ایہہ سُن کے اوہ بوہت دُکھی ہو گیا کیونکہ اوہ بڑا امیر سی۔
24 یسوع نے اوہدے وَل ویکھیا تے کہیا: ”امیر لوکاں لئی اسمان دی بادشاہی چ جانا بوہت اوکھا ہوئے گا!
25 اصل چ اِک امیر آدمی دا اسمان دی بادشاہی چ جانا اوناں ای اوکھا اے جِنّاں اِک اُونٹھ دا سوئی دے نکے چوں لنگھنا۔“
26 اوہدی ایہہ گل سُن کے کجھ نے کہیا: ”تے فیر نجات کِنہوں ملے گی؟“
27 اوہنے کہیا: ”جیہڑے کم انسان لئی ناممکن نیں، اوہ خدا لئی ممکن نیں۔“
28 پر پطرس نے کہیا: ”ویکھ، اَسی تے اپنا سارا کجھ چھڈ چھڈا کے تیرے پچھے ٹُر پئے آں۔“
29 اوہنے اوہناں نُوں کہیا: ”مَیں توانوں سچ کہنا واں کہ جنہے وی خدا دی بادشاہی دی خاطر گھر یاں بیوی یاں بھراواں یاں ماں پیو یاں بچیاں نُوں چھڈیا اے،
30 اوہنوں ایس زمانے چ کئی گُنا زیادہ ملے گا۔ نالے آن والے زمانے چ اوہنوں ہمیشاں دی زندگی ملے گی۔“
31 فیر اوہنے 12 رسولاں نُوں اِک پاسے لجا کے کہیا: ”ویکھو، اَسی یروشلم جا رہے آں تے نبیاں نے انسان دے بیٹے بارے جو کجھ وی لکھیا سی اوہ سب پورا ہوئے گا۔
32 مثال لئی، اوہنوں غیریہودیاں دے حوالے کیتا جائے گا۔ اوہ اوہدا مذاق اُڈان گے، اوہدے نال بھیڑا سلوک کرن گے تے اوہدے اُتے تُھکن گے۔
33 اوہ اوہنوں کوڑے مارن گے تے جانوں مار دین گے۔ پر تیجے دن اوہ زندہ ہو جائے گا۔“
34 پر شاگرد ایہناں گلاں دا مطلب سمجھ نہ سکے کیونکہ ایہہ اوہناں کولوں لُکائیاں گئیاں سن۔ ایس لئی اوہناں نُوں کجھ وی سمجھ نہ آیا۔
35 جدوں یسوع یریحو دے نیڑے پونچیا تے اِک اَنھا فقیر سڑک دے کنارے بیٹھا ہویا سی۔
36 اوہ کولوں لنگھدی بِھیڑ دی آواز سُن کے پچھن لگ پیا کہ کیہہ ہو رہیا اے۔
37 لوکاں نے اوہنوں دَسیا: ”یسوع ناصری ایتھوں لنگھ رہیا اے۔“
38 ایہہ سُن کے اوہ اُچی اُچی کہن لگ پیا: ”اَے یسوع، داؤد دے پُتر، میرے تے رحم کر!“
39 پر جیہڑے لوک بِھیڑ چ اَگے سن اوہناں نے اوہنوں جِھڑکیا تے چپ رہن لئی کہیا۔ پر اوہ ہور وی اُچی اُچی کہن لگ پیا: ”داؤد دے پُتر، میرے تے رحم کر!“
40 یسوع رُک گیا تے اوہنے حکم دِتا کہ اوس بندے نُوں اوہدے کول لیایا جائے۔ جدوں اوہ اوہدے کول آیا تے یسوع نے اوہنوں پچھیا:
41 ”دَس، مَیں تیرے لئی کیہہ کراں؟“ اوہنے کہیا: ”مالک، میریاں اَکھاں ٹھیک کر دے۔“
42 ایس لئی یسوع نے اوہنوں کہیا: ”تیریاں اَکھاں ٹھیک ہو جان۔ تینوں اپنے ایمان دی وجہ توں شفا ملی اے۔“*
43 اوہدیاں اَکھاں دی روشنی فوراً واپس آ گئی تے اوہ خدا دی وڈیائی کردے ہوئیاں یسوع دے پچھے ٹُرن لگ پیا۔ نالے ایہہ ویکھ کے باقی سارے لوک وی خدا دی وڈیائی کرن لگ پئے۔
فٹ نوٹ
^ یاں، ”زِناکار،“ یعنی ایہو جیہا بندہ جیہڑا اپنے جیون ساتھی نال بےوفائی کردا اے۔
^ یاں، ”زِنا،“ یعنی اپنے جیون ساتھی نال بےوفائی کرنا۔
^ یاں، ”تیرے ایمان نے تینوں بچایا اے۔“
